08 January 2013

خفيف





شفت وشّ جميل
شفّ روحي الأسى
أيام..
وكل ده يتنسي
من قبل ما أنساه
يكون اتنسى
حتى الخيال..
الباقي..يتلاشى
ويسيب ترابه الغايم
الشفاف
يعذبني..
لعلّ
وعسى.

قلبي النهاردة خفيف..
على كل شيء كاين
على كل شيء بيكون
هذا الوجود البَهيْ
الآسر..المُنتهي..
حسرة على الموجود.
حسرة على التفاصيل..
المخفي
والباين
في صنعة الفانيين.
زايل بيخلق خيال
الضلّ
 للزايلين..
تطمينة..
وكماين
أعلى البهاء
هاين..بمرّ الزمن
حيمرّ زي ما مرّ
يسحب ف روح المجرة
ويحط ف النسيان.
حسرة على المحدود
بالذكرى، كالابريق..
فايض
ومش مليان.         


حتى اللي ماشوفتوش
حتى اللي ماسمعتوش
و مالمستوش
ومش حلمسه..
لفظ
وبشر
ووحوش..
أرض وكلام ووشوش
لحن وكمال ورتوش
قايم على روحي..
زي الندا المجهول
يا شطّ ما رحتوش..
ارحم كيان زايل
ارحم كيان بيزول
إنك
هناك..موجود.


مرّيت على جنينة
ومريت على جنّة
مريت على حيّة..
ومريت على حوّا
وعرفت معنى ربيع
وعرفت معنى خريف
قلبي النهاردة خفيف..
من غير ولا أحداث
أنا عايز اجرّب كل الناس..
وانسخ ف روحي الوش
والتعريف
قبل الطوفان، بعده..
الصباح بيفوق
ذهنه بياض ممدود
عينه..فراغ
ومخيف.
قلبي النهاردة خفيف.



8/1/2013