مش تجربة ملهمة

قلت الكلام كله
ومقولتش الكلمة
جربت ياما لقيت
مش تجربة ملهمة
إنك تكون قارب
متكونش شط غريب..

الكلمة مش معنى
الكلمة مش فكرة
ولا لذة مـ اللذات
الكلمة دي بالذات
تتقال عشان حاجة
غامضة على مؤلمة
مش تجربة ملهمة
إنك تكون قوّال
البغبان العال
للجيّد, المحفوظ
الجخّ*.. سهل و لذيذ
الجخّ منه كتير
الجخ للجماهير
مُنتج بختم البيع
موزون على التصقيف
والشعر مش فُندام
ولا نمرة فـ بروجرام
مع ساندوتش خفيف
الشعر مش مراجيح
الشعر غابة..
ومخيف
الشعر برق عنيف..
يتلف حواس العباد
يكشف حواس العبيد
على خدعة الملموس
الشعر شِبه المسّ
بيعرّفه الممسوس
جرّب..لكن عاجز
عن كلمة مش فـ كلام
مش حاضرة, مش فـ قاموس..
قلت الكلام كله
ومقولتش الكلمة
أسمعها, ترضيني..
شعري ملوش لازمة
لو يوم يراضيني
شعري يخوّفني
شعري يبكّيني
شعري يطمّعني
أمشي له..يتلاشى
أثبت..يناديني..
من ميت مكان: من هنا
مش تجربة ملهمة
إنك تكون تمثال
متكونش جرافيتي
إنك تكون فكرة
متكونش ضرب خيال..

____________

* الجخّ: بالعامية المصرية هو الكلام الكثير بلا وزن, أو الكذب الكثيف, جخّ يجخّ جخاً فهو جخّاخ