19 July 2009

أنا شفت أفلام أحلى من دي بكتير


ماذا يعني أن يُكتب في بداية فيلم " 1000 مبروك " أن الفيلم مستوحى من أسطورة سيزيفيوس بدلا من سيزيف ؟
ماذا يعني أن يكون كاتب سيناريو الفيلم التعبان ملّة شخصين : محمد دياب و كذلك أخوه خالد دياب ؟
ماذا يعني أن يكون إعلان الفيلم الشهير بالتريلر أفضل من الفيلم نفسه ؟
ماذا يعني أن يقدم أحمد حلمي مواعظ و أماثل في نهاية الفيلم ؟
ماذا يعني أن يعبّر الإبن في الفيلم بتضامنه مع مرض أمه و احتمالية فقدانها لشعرها في علاج السرطان بحلاقة شعره على الزيرو ؟
ماذا يعني أن الأم عندما تحتاج إلى عقار الترامادول تذهب لشراؤه من "تجار مخدرات" في القلعة بدلا من أقرب صيدلية و خمسة جنيه في جيب الصيدلي أو مكالمة تليفون لأقرب طبيب معرفة ؟
ماذا يعني أن تحادث الأخت صديقها عبر الإنترنت من غرفة أخيها العصبي و العنيف باستخدام الكاميرا بحجة أنه في الحمام ؟
ماذا يعني أصلا أن نرى الفيديو شات يتم عبر برنامج ويندوز ميديا بلاير ؟
ماذا يعني أن يظل العريس حتى الساعة 12 ليلا عدة مرات بعيدا عن فرحه المنتظر جالسا مع صديقه في الكوفي شوب دون أن يبدو على صديقه أي استغراب او قلق ؟
ماذا يعني أن البطل لم يحاول الإتصال بحبيبته و و مزّته و زوجة المستقبل ليحكي لها وقائع وفياته العجيبة ولو مرة واحدة بدلا من صديقه طوال الفيلم ؟
ماذا يعني اصرار أحمد حلمي على تقديم "صعبانيات كوميدية" مثل آسف على الإزعاج و 1000 مبروك ؟

12 comments:

عمرو عزت said...

أنا قلت كده برضه

Mo'men said...

عايز كومديا ذكيه و جديده .. روح "طير انت" و لكنه ايضا مقتبس.. بس فيه شغل حلو

Noonu said...

و ليه مفيش أبطال في الفيلم غيره؟

Markos Samir said...

Sisyphus ده الأسم الصح
لما أتنين كتاب يكتبوا عمل ده معناه أنهم بيتبادلوا الأفكار (زى ما يوسف شاهين و خالد يوسف أخرجوا هى فوضى مع بعض)
انه يقدم مواعظ الناس الى ما بيفهموش الفيلم يفهموا من أخر كلمة(يا رب يفهموا)
أى حاجة تانية دى مشكلة السينارسيت لو مش عاجبك أكتب أحسن منه وورينا شطارتك وان شاء الله نشوف ليك عمل قريب
وماتنساش
أدفن نفسك

Anonymous said...

طول عمري رأيي ان احمد حلمي افلامه كلها متوسطة


قفشة واحدة من احمد عيد اذكى من أفلام احمد حلمي كلها

Anonymous said...

انا ماشفتش الفيلم بس لولا اختلاف الاذواق لبارت السلع

أبو أمل said...

انا من المتحمسين جدا لأحمد حلمي

رغم اني ما شفتش الفيلم

اود دعوتك لمتابعة

تدوينة

ديواني سلم لفوق

Alaa Eddeen Shams Al-Qaisi said...

سيزيف هو تعريب/الإسم العربي لسيزيفيوس:
http://ar.wikipedia.org/wiki/%D8%B3%D9%8A%D8%B2%D9%8A%D9%81

وبالتالي كلا الإسمين صحيح

أما بالنسبة للفيلم ... هو عجبني ... يمكن عشان كان نفسي أسمع إن تغير الواقع داخل إطار القدر ممكن يغير من معني الاحداث فيسبب شعور بالرضا

بالنسبة لاحمد حلمي هو ممثل بارع وأفضل بكثير جدا من عادل إمام ومحمد سعد ...

وواضح إن افلامه تتطور ... فاكرين صايع بحر؟؟؟؟ ولا زكي شان؟؟؟؟ ... أكيد أكيد مستوى أفلامه إختلف ... وأكيد أكيد افلامه احسن من بوبوس و لا عمر وسلمى (على الرغم من إن لم أشاهدهما ولا ناوي)

Anonymous said...

الفيلم حلو و زى اى حاجه فى الدنيا ليها سلبيتها و اجابتها و مفيش حاجه كامله ابدا

بدل النقد و اننا نطلع القطط الفطسانه ليه ماحدش بص على فكره
ان الواقع ممكن يتغير بس القدر لا

انا عن نفسى طلعت من الفيلم بحاجات حلوة

بعيدا بقى عن التافصيل اللى لا تودى ولا تجيب

و ليه دايما دايما دايما بنشوف فى كل حاجه الحاجه الوحشه و نقول بصو شوفو و مابنبصش احنا اتعلمنا ايه ولا ايه الحلو ؟

Anonymous said...

علي كل الغلطات الي فيه الفلم مقبول لانه حاول نوعا ما يقدم حاجة جديدة من ناحية الفكرة بس كالعادة الحسابات التجارية بتتفوق و بيظهر غلطات زي الي انت قلتها
حاجة كمان برضه في الفلم في المستشفي ساعة لما الاب قاله انت اتهمتني اني مختلس و امك بتاعت مخدرات الكلام ده كان حاصل في اعادة يوم تاني مش اليوم ده وبما ان الكلام بيتعاد فاليوم لاغي
وبعدين ليه النهاية الكئيبة يعني جراوند هوج داي مثلا نفس الفكرة و النهاية حلوة و الفيلم كوميدي
بس من وجهة نظري احمد حلمي بيتطور و بيحاول انه يعمل لنفسه خط تاني خالص
بس انا مش شايف المشكلة انه شخصين يكتبوا سيناريو تعبان عادي جدا

مي كامل said...

سعيدة اني قريت البوست ده
ليك وجهة نظر مختلفة يا محمود
:)
فتحتلي زوايا مكنتش واخدة بالي منها صحيح
بالذات الميديا بلاير.. بقى كانو بالميديا بلاير بقى بتقول؟

:D
اتفق معاك في البوست

Anonymous said...

وايه معنى كل اسألتك الغريبهدي ؟؟؟ هو انت ماتعرفشي حاجه اسمها احلام ؟؟ يعني احلام لو فيها شئ بيحدث في الواقع بعد كده بيتحقق بطريقه مختلفه عن الحلم ... الحلم يعني انباء او بشرى او اخبار او تحذير بأسلوب مبالغ فيه وصعب تصديقه لأن احداث اي حلم بتكون صعب حدوثها في الحقيقه ..... الفيلم اكترر من راااااااائع ... واحمد حلمي اثبت انه عبقريه في اداء الكوميدي والتراجيدي وبجد بجد فنان فظيع ................... اما ان الفيلم مستوحى من اسطوره اغريقيه ماعرفشي عن الأسطوره حاجه لكن اصدقه من غير ما يستوحوه اصلا لأن عالم الأحلام عالم مختلف ...... ولا انت مابتحلمشي ....
الأجابه على تساؤلاتك هي ..... انها احداث حلم غير طبيعيه بيعرف من خلالها بعض احداث الواقع ... ومنه بيتعلم درس انه ازاي يكون بني ادم بجد يسارك الأخرين مشاعرهم وانه يكون انسان ايجابي في حياته اللي ضحى بيها في الأخر ليثبت لهم انه اتعلم فعلا الدرس.... فهمت ولا لأ؟؟؟؟

سحر علي ..... شاعره وكاتبة قصه قصيره