01 January 2008

إنه حقا عالم رائع سعيد







إمبارح كان أخر يوم في الباطنة
باي باي باطنة
ليلة رأس السنة قضيتها في درس عملي جراحة من الساعة 4 لحد الساعة 11 بالليل
كنت حاسس إن أول الساعة أول ما حتدق 12 و أنا لوحدي في الشارع بالليل حمدد في نص الشارع على الأسفلت وأحط إيديا ورا دماغي و رجل على رجل و أفكر في أي حاجة غير إني طالب في كلية طب
بقالي 4 شهور بذاكر وأمتحن يا كفرة
هو صحيح المفروض أكون مبتهج بشكل عنيف عشان الباطنة خلصت
بس فاضل جراحة و أنا للأسف بحب الباطنة أكتر من الجراحة
مع العلم إني إنفجر مني في الباطنة لوحدها حوالي خمس ست سبع عيانين
بس الحمد لله إن الباطنة خلصت
إنفجر مني في لجنة الشورت لوحدها حالتين
واحد شلل رباعي و واحد شلل نصفي
بتاع الشلل النصفي قعدت أقوله يا حاج مش مهم
يقولي يا دكتور إتني رجليا جامد ميهمكش
يا حاج عادي مش مشكلة حقول للدكتور إني فردتها و تنيتها مرة قبل ما هو ما ييجي
مسك إيدي و حطها على رجله الصلبةو هو باصص في عنيا مباشرة , و لما لقاني متردد , قاللي بصوت أقرب ما يكون للأمر : إتنيها يا دكتور , إتنيها جامد...عادي...إنت دافع فلوس
مسكت رجليه و بدأت أتنيها بعنف و تماسك و هوب
طراااااااااااااااااااااخ
سمعت من أخر العنبر نايب الوحدة بينادي : عيان سرير 5 إنفجر , هاتوا واحد تاني بسرعة قبل ما الدكاترة ما ييجوا
طبعا كنت متضايق جدا
كيس مناديل كامل و زمايلي اللي حواليا كلهم إتبهدلوا , خاصة و إن واحد زميلي في نفس العنبر كان لسه مفرقع حالة من خمس دقايق
كمان حالة جديدة يعني فحص من الأول و جديد و تاريخ حالة من أول و جديد و فلوس تاني
النايب جه و معاه العيان , قاللي معلش بس خلي بالك مع العيان ده عشان لو إنفجر مش حنعرف نجيب لك غيره , زمايلك عمالين يفرقعوا في العيانين من الصبح
كانت حالة صدر ..
بدأت أفحص و كل شوية أسمع من بره العنبر :
طراااااخ
طراااااخ
طراااااخ
باي باي باطنة
باي باي ياعم الحاج



18 comments:

bajagafaga said...

لا بقى مش معقول كدا! حرام عليك جبتلي كوابيس.. عالم رائع ابن ستين في سبعين

محمود عزت said...

إيه يا اخ باجاجافاجا ؟
إنت مش بتتفرج خالص على سبايس توون :))

Abdou Basha said...

دكتور محمود، أنت قدمت مشهدا يجعلني أحرص على الوفاة في منزلي دون التفكير في الذهاب للمستشفى مهما كان المرض
:D
انا عايز اسأل يعني إيه المرض انفجر؟

محمد said...

ههههه
حمد الله عالسلامة يا دكتور
هانت، فات الكتير وما باقي إلا القليل.
بس انت، خف إيدك عالعيانين شوية، لما تيجي تلاقيه هينفجر، فكه واتنيه، وبعدين ركبه تاني.

layal said...

لا يمكنني استيعاب ما ذكرته
واعيد سؤال عبدو
يعني كيف ينفجر المريض؟؟

محمود عزت said...

عبده باشا
العيان إنفجر يعني العيان إنفجر
طراااااااااااااخ كده
بس متخافش
روح للدكتور بس متخليهوش يتني رجليك :))


محمد
إدعيلي !
ربنا يهون الإتناشر يوم اللي فاضلين قبل ما أفرقع أنا


ليال
أكيد محدش فيكم بيتفرج على سبايس تون
انا متأكد :))

M. Mehrez said...

انت يا بني انت
ما تبطل ام الاشتغالات دي
ما تفهمنا ايه الحوار بالظبط
احسن وديني اجي لك امبابة افجرها لك كلها عشان تستريح
:D

wael said...

صدق يا محمود الدكتور لغى الحصه اللي فاتت في الدرس عشان فرقعنا 7 عيانين فتعصب اوي وقال لو حد فرقع كمان عيان هلغى الحصه وقبل ما يقفل بقه راح طاااااااااااخ وواحد مفرق عيان فتعصب اوي ولغى الدرس

محمد سيد حسن said...

رجاء خاص

شيل الصورة يامحمود لو سمحت

walaaz said...

سبيس توون؟

الله يحرق الروشتات عللى بيكتبوها عللى بيفرقعوا العيانيين

قول أمين يا محمود

:@

محمود عزت said...

محرز باشا
اللي أعرفه إنك بتشوف سبيس تون يا محرز ؟
محدش بيفرقع عندكوا في مدينة نصر ولا إيه اليومين دول ؟!


وائل
معلش يا وائل
كل ما تفرقع أكتر تجيب أكتر
و دور على الكوبون
بيبقوا مخبيونه في عيان كرونيك كارديو غالبا
تفرقع العيان و تطلع الكوبون تديه للدكتور يديك السريع
:))


محمد سيد حسن
وجب يا كبير
آسف

ولاء
الله يحفظك

tamer afify said...

كل سنة وانت طيب يا شاعر يا جميل
حبيت بس اسلم عليك وأهنئك بالسنة الجديدة

محمود عزت said...

الشاعر الجميل تامر عفيفي

وإنت طيب يا جميل
إدعيلي في الإمتحانات اللي أنا فيها دي
و ألف مبروك على ديوانك :))
بإذن الله يعمل أحلى شغل

غادة الكاميليا said...

محمود ....بتفرقع في الناس وعايز الناس تدعيلك طب والله انا كنت هعيط
مش م الفرقعه من انى مش فاهمة يعنى تفرقع عيان ، محمود انا هرفع عليكم قضية ده اسلام نبيه كان لطييييييف
انا بعد كده لو قابلت امين شرطة في الشارع هدفعله اللى ف جيبي
انا كنت دايما بسأل نفسي ليه الوسواس القهري ده من الدكاترة طلع عندى خلفية الفرقعه دى
يالهوى
على راي عبده باشا اموت في بيتى اكرملى
سنه حلوة بقى

أحمد الشمسي said...

اللي انت بتعمله ده مؤامرة لتشويه سمعة أطباء مصر المحروسة، وجبهة الدفاع عن سمعة مصر اليويمن دول شغالة على جميع الأصعدة، فاوعى تفتكر انك هتفلت من العقاب :) كل سنة وانت طيب، وكل امتحان وانت بتفرقع عيانين

Nouran said...

لا سؤال بقى هو ازاي العيان بينفجر؟
يعني بطنه بتطلع بره!!!!
وبقالك 4 شهور بتمتحن
ده انا بقالي اسبوع وخلاص هموت نفسي
ربنا معاك يا دكتور:)
بس قولي بجد ازاي بينفجر :)

amazing_angel said...

to this degree medicine in egypt reached,to this degree patients become toys suffering of pain just because of few money,really i can't imagine,,

rita said...

~「朵語‧,最一件事,就。好,你西