24 December 2007

عالم رائع سعيد




في الدرس النهاردة , الدكتور وهو بيفحص العيان , كان بيفرد رجليه المشلولة شديدة المقاومة نتيجة إرتفاع التوتر فيها لدرجة أشبه بفرد أنبوبة صلب , الدكتور كان بيجزّ على سنانه و بيقول : لازم تشد رجل العيان جامد ....جامد , لازم تفردها قدام الدكتور في الإمتحان بأي شكل..
العيان بدأ يتوتر و الدكتور بيشد و يجز على سنانه وأنا بشب على طراطيف صوابعي و أرفع رقبتي عشان أشوف العيان من ورا الزحمة اللي حوالين السرير
الدكتور عـِـرِق جامد و العيان بدأ يتني ضهره و يبص للناحية التانية و 100 عين مفتوحة على أخرها بتبص على الرجل الصلبة , عمال أشبّ عشان أشوف , الدكتور بيجزّ على سنانه و بيشد لتحت بقوة و ثبات , العيان بيتني ضهره و يمسك في السرير و حد عند السرير بيتحرك و دماغه بتخبي عني المشهد , أشب أكتر و ... طرااااااااااخ
العيان إنفجر...
وقفنا كلنا متحركناش سنتيمتر واحد...الدكتور إتبهدل و إتغرق دم
بدأ ينفض دراعه و إيديه و يبص على الطلبة اللي إتلطخت وشوشهم و هدومهم بشكل عشوائي
كان فيه بقعة دم على وشي و ورايا على الحيطة و شوية دم و فتافيت طايرة من جلابية العيان المقلمة بتلف في الهوا بين الناس و السقف
الدكتور قال وهو بيمد إيده بمنديل لحد قدامه : معلش...أهم شئ تمسك رجل العيان صح...لازم تفرد رجلين العيان قدام الدكتور ..لو في اللجنة العيان إنفجر نادي على النايب و إطلب عيان تاني...
دقايق و مسحنا وشوشنا و هدومنا بمناديل فلورا
جه سمسار العيانين و شال رجل العيان من على السرير و جاب عيان تاني
الدكتور : إزيك يا عم احمد
_ الحمد لله يا بيه
=عندك إيه يا عم
_paraplegia
= طيب نام على السرير يا حاج أحمد
وزي ما قلتلكوا....لازم تفرد رجل العيان قدام الدكتور بأي شكل
إديني رجلك يا عم أحمد



19 comments:

bajagafaga said...

أنا بُقّي بلم ومش عارف أقفله لغاية دلوقت.. بقالي خمس دقايق فكي هينكسر من كتر الذهول.

إنت بتتكلم بجد؟ دا حصل فعلاً؟ يا لهوي! فعلاً عالم رائع سعيد جداً!

With Myself said...

:S

محمد سيد حسن said...

الكابوس ده جالي كتير قبل كده

الله يلعن ابو دي كلية على أبو دي مهنة

Haisam(jarelkamar) said...

يا نهار اسود و منيل !! محمود انت اكيد بتهزر !!! ياريت تبعتلي ولو سرا و تقول ان ده من و حي خيالك

sandrill said...

I didn,t visit Alkasr before .. but i have entered eldemerdash so i can imagine what are you talking about .. but please i couldn,t understand .. what is the meaning of ( el3ayyan enfagar ) ? Is that means that his leg was taken off ?

You said that the broker took out the leg of the patient .. what about the patient himself ?

sandrill said...

Ok .. I think you managed to write ( Shal el ragel el3ayyan ) but you wrote ( shal regl el3ayyan ) and this drove me to think that the leg was taken off .. that means you were talking about the blood veins of the patient by saying ( el3ayyan enfagar ) .. still painful , fearful and unhuman .. the worse is i can do nothing .. I hope it is just an imagination like what " Jarelkamar " has said

fanan fa2eer said...

ده بجد ولا ايه يامحمود؟؟؟؟

الراجل بجد رجليه طارت ولا ايه اللي حصل

لا أنا بجد مش قادرة أستوعب المشهد ده

الله المهنة دي جميلة قوي ياجدع
بنفجر الناس بدل مانعالجهم

لا فعلا عالم سعيد وجميل

الله يخربيت دي شغلانة

مصطفى السيد سمير said...

مشهد مؤثر ولو اني مش متخيله
بس كمان مش مستبعده

Anonymous said...

لازم ترد يا محمود
لازم
ديك أم الفن علي صدماته المقصودة وحكاية حتمية المفاجأة والكلام الفارغ ده
لازم ترد يا محمود ده جد ولا طراطيش خرة أفكار
يلعن ديك مرضكم

M. Mehrez said...

احا انت بتتكلم جد؟؟؟
اكيد لأ طبعا
ما هو لو جد اكيد كان هيبقى فيكم طالب عنده دم هينطق ويطلع ديك أم الدكتور

انت كاتب انه بث مباشر...انت بتهرج وربنا

طلال فيصل said...

باشا ومحلق والله يا حوكة..
تفتكر لما ابقى بمتحن سادسة حيبقى فى خيالى حيل زيك كدة..
دمت جميلا كما أنت

camellia said...

يخرب عقلك انا للحظات صدقت
ولا لأ ..ما يخربوش عشان تعرف تطلع حاجات من دي كتير

وربنا يعين كل قاطني وزائري طلبة القصر العيني

WS said...

:)

go3d said...

وطرااااااااااااااااااااخ
هههههههههههههههههههههههههههههههههههههههههههههههههههههههههههههههههههههه
واضح ان الكلية ربتلك الخفيف
يلا مش مشكلة

mohamed kamal hassan said...

إنت ليه مبتكتبش رواية أو قصة
سردك رائع

e-nadaha said...

عملت قلبان واختفيت ؟؟
ماشى يا محمود..الله يسامحك ع الخضه :)

walaaz said...

لا يا شيخ ؟
ونتعلم من الدرس دا انك لازم يكون معاك مناديل ايزى باك فى الراوند عشان الأنفجارات

نشفت دمى يا محمود الله يخرب بيت اليهود
أنا ناقصة !

عطشان said...

مش حاسس إنها وسعت منك اوى
إنت فاكر طب القرن الستاشر!

Dalal said...

You really scared me !