06 November 2007

ظابط...بس إبن ناس





الضابط الساهر على الذبّ عن مؤخرات الشعب : إسلام نبيه


إمبارح في العاشرة مساء كان فيه مجموعة من التعليقات جديرة بالملاحظة بشأن الحكم الصادر ضد اسلام نبيه في قضية عماد الكبير الشهيرة


1
رسالة من أستاذ مختار تؤيد ما فعله الضابط الهمام إسلام نبيه لأنه تأكيد على هيبة الدولة..

و للأستاذ مختار : نتمنى ببالغ الصدق أن يؤكد لك الضابط إسلام نبيه بنفسه على هيبة الدولة بعد خروجه من السجن , و ذلك بإستخدام أفضل أنواع عصيان مقشة الهلال و النجمة , التي ستشعرك بهيبة الدولة وهي تنفذ إلى داخلك و تنساب إلى أعماقك, و نتمنى أيضا حينها أن تتعاون بإخلاص و متعافرش كتير..عشان دي هيبة الدولة يا تمّورة والتعذيب خير لينا كلنا


2
مكالمة تليفونية من طنط , أكيد عضوة في نادي الغابة أو هليوبوليس , تعترض على الحكم و تؤكد : لازم نحارب البلطكة....لا للبطلكية ونعم لهيبة الشرطة.
و بالطبع شئ منطقي و مفهوم أنها في اللحظة ذاتها لا تدافع عن إسلام نبيه بقدر ما تدافع عن هيبة اللوا خورشيد و اللوا حافظ الذين يتكفلان بتخليص مخالفاتها في المرور و تتصل بهما في حالة أي شجار ينشب بين إبنها المراهق و بين مراهق أخر في النادي لما يزنقوا بالبي إم على بعض



3
مكالمة من ضابط كوتكوت , يبدو أنه لم يكن مجتهدا في الكلية ليعرف الفرق بين الحكومة و الدولة حين يؤكد : الشرطة رمز للحكومة
ثم يضيف : يعني نعمل إيه مع بلطجية نخش الحجز نلاقيهم واحد قافل بقه بقفل و التاني مشرح نفسه بموس , ولا بلطجي عامل إرهاب للناس في منطقة أروح أقوله لو سمحت تعالى معايا أنا عايزك في القسم ؟
و بتالي و بناء على كلامه فإدخال العصا في مؤخرات أي أحد شئ ضروري عشان الظباط ما يتكسرش عينهم قدام البلطجية
وهنا يظهر السؤال:
هو الشرطة يا إما تدخل العصيان في مؤخرات الشعب يا إما يتكفل البلطجية بذلك تجاه أشاوس الشرطة ؟
مفيش إمكانية مطلقا لتواجد علاقة سوية بين الشعب و الشرطة

ثم يضيف : الشرطة مكروهة من الناس , محدش يحب يبقى عليه سلطة.
الشرطة يا عمو الظبّوط غير مكروهة على الإطلاق , الشرطة مرهوبة بشكل مبالغ فيه
إنزل الشارع و إنت لابس ميري و معاك إتنين عساكر عجاف و وقف أي حد و إطلب منه يقلع ملط , و أنا أؤكد لك إنه حيعمل كده بدون نقاش
دلوقتي أمناء الشرطة _ أحقر الرتب الرسمية _ بقوا ملوك الشوارع
عشان كده الناس مش بتكرهكم يا حضرة الظبّوط
الناس بتسب لكم الدين يا أوسخ فئة في مصر , إلا ما ندر , و اللي الناس بقت بتحكي عنهم كإنهم بيحكوا عن إستثناء نادر الحدوث :هو ظابط آه ...بس إبن ناس


15 comments:

مختار العزيزي said...

هههه
حلاوتك يا محمود وانت عامل دماغ نسكافيه! الأخوة المتصلين بالبرنامج واللي انت اتكلمت عنهم مشبّعين بالواقع القبيح والخيالات الأقبح أيضا عن البلطجية ورجال الشرطة لدرجة أنهم مش قادرين يفرقوا بين إنزال العقوبة القانونية علي المجرم واللي معناها عقوبة منصوص عليها مش تعذيب عبثي ، و تطليع دين أم أي مواطن مش عاجب الظابط وهو لسة متهم أو مشتبه فيه أو حتي مجرم عتيد الإجرام . أحة بجد ده الجسد مالوش أي حرمة نهائي. الناس دي عايزة تتعلم من أول جديد يعني جسد ويعني إيه نفس وبعدين نبقي ندور بقي علي تعليمهم يعني غيه شرطة ومتهم ومشتبه وسُلطة

bani-adam said...

عادي يعني
امبارح في العاشره مساءا برده
لوا بيتصل و بيتكلم عن موضوع اسلام نبيه برده
و بيعيب علي البرنامج و البرامج التليفزيونيه الاخري انها بتتحيز الي جانب ال"مواطن" علي حد قوله
و كل سنه و انت طيب

زمان الوصل said...

حلقه فعلا كانت تحرق الدم ..
و اللىّ يحرق الدم أكتر إن الردود على هذا الهراء لم تكن بالمستوى المطلوب ..

و الرد الوحيد المنطقى كان من الضحيه "عماد الكبير" حين أوضح -فى تعليق لم يتم تسليط الضوء عليه بقدر كاف- أن الظابط لم يقبض عليه أصلا فى قضية مقاومة السلطات كى يتحدّث أحد عن بلطجته محاولا أن يبرّر فعلته الشنيعه !! و السؤال الألطف كان : هل تتعامل الدوله مع البلطجيه "الحقيقيين" بنفس الطريقه؟ و سؤال من عندى : ماذا عن بلطجية الحزب الوطنى !!

الأكثر إثاره للاشمئزاز كانت نبره طبقيه ذات رائحه كريهه فى حديث المحامى اللّى اتكلّم عن تربية "إسلام" مع أبنائه فى حى واحد و مدرسه واحده !! و كان ناقص يقول مش زيّكم يا بيئه يا حوش !! بس هننتظر إيه غير كده من الذى يدافع عن "ممدوح اسماعيل" الذى تسبّب فى موت المئات .. هييجى إيه موضوع "عماد الكبير" جنب ده ..

مفترض على فكره مأمورى الضرائب يطالبوا بنفس امتيازات و حصانة ضبّاط الشرطه !! أصل همّا كمان يا عينى مكروهين و زيّهم زى الظابط اللىّ نفسيته تعبت و شعر بالدونيه -محتاجه تعليق سافل الجمله دى- بسبب كراهية الناس له ..

sandrill said...

أنا اللي مستفزني أكتر من الكلام تعبيرات وش إسلام بيه في كل الجلسات المحاكمة و بعد النطق بالحكم ,, سحنة أمه دي بس فيها خمس سنين سجن و بعد كده نشوف القضية نفسها

spellz said...

ما شوفتش انت آخر جلسة
التيشرت الأحمر بتاعه كان عامل شغل
كان هاين عليا لروح اقوله
يا حلاوتك فى البدلة الحمرة يا بيضا !!

بمناسبة العاشرة مساءآ بعد الحلقة دى الواحد قلق جدآ على منى الشاذلى
خصوصآ بعد المكالمات العجيبة الى جتلها

عين ضيقة said...

الله يحرقهم ياسيدى

الناس دى فاكرين ان الدنيا دى بتاعتهم لوحدهم

حسبنا الله ونعم الوكيل فيهم وفى اللى مخليهم فوق رقاب الناس بجذمهم


ربنا ياخده بقى هو واللى زيه

wael said...

الكائن الهباب ده شبه اسعد بتاعنا جدا
والظباط اصبحو فئه اخرى من الشعب هو اللي مش فاهمه هو ايه الحكمه من الساديه اللي هما فيها
على العموم لنا الله
وخد بالك اسلام نبيه اخد 3 سنين حبس مش سجن وهناك فرق واضح يا باشا الحبس مش بيكون في السجن يعني هيتسجن مع بشاوات عمله نفس فعلته ويبقو يظبطو بعض بقا بعصيان ولا بمقشات ولا ان شالله برجلين الكراسي

Wael said...

السلام عليكم
انا كنت معدى - بتشديد الدال - لقيت ناس من امبابة تبعنا يعنى .. الحمد لله انى عشت لغاية ماشوفت اسم امبابة ملعلع عالنت
اما بخصوص الظابط والله الواحد ماعراف يعمل ايه
كنت زمان فاكر ان العيب عيب الشعب اللى ساكت
لكن الواضح ان العيب فى رجل الامن نفسه والتعاليم اللى تلقاها طوال دراسته حتى يصبح رجلا للظبط والربط
من قيمة كام يوم كنت جاى من الجيزة راكب عربية كيتكات ..وبعد ماوصلنا وخلاص نازلين لقيتلك ظابط من اياهم ركب جمب السواق وقفل الباب وبيقوله : اطلع بينا عالمكان الفلانى
كده بكل بجاحه , والسواق ياعينى هايعمل ايه مايقدرش يقوله لأ
حاجه تقرف والله

M. Mehrez said...

ايييييييه الحقد الطبكي اللي باين في كلامك ده يا استاذ محمود
مالهم أعضاء ناتي الغابة وهيليوبليس؟؟
بتشتتريأ عليهم ليه حدرتك؟؟

مش هم دول اللي مشغلينكم يا رعاع يا بلطكية؟؟

اخس عليكم شعب عاوز يتربى

أحمد الشمسي said...

نسيت تقول ان الضابط النونو كان متضايق لأن الناس بترد عليه لما يسألهم في الشارع "بعنجهية"... ودي غالبا معناها انهم بيبقوا عاملين راسهم براسه، شوف قلة الأدب؟
حضرته فاكر ان الناس لازم لما البيه الضابط "ممثل الحكومة" يكلمهم لازم يطاطوا وهم بيكلموه وحبذا لو خفضوا اصواتهم وغضوا ابصارهم!
ليه بتفكرنا بس بالحاجات اللي عايزين ننساها؟
المهم، اخبار المذاكرة والامتحانات ايه؟ :)

Gaza said...

كلهم أولاد ناس يا سيدي
حتى الحرامي لما يطلع يسرق من بين جيرانه بيكون هو ابن ناس، والجار كمان ابن ناس

بيضل حاجة مهمّة انو احيانا بيكونوا الناس مش ناس، لهيك ما تعتب على حدا يا سيدي.. وخلي المركب سارح في الميّة!

وكس اختها من بلد

e7na said...

بجد فئه امناء الشرطه أحقر مما تتخيل


ماشيين فى الكليه عندنا ولو واحده حلوه يوقفها ويستظرف عليها وهم اللى بيختاروا اتحاد الطلبه ويغتتوا على اى واحد داخل من البوابه

والله انا كرهت الكليه بسببهم
الناس فعلا بقت بتخاف منهم فى مره واحد بينده عليا يشوف الكارنيه بعد ما دخلت الكليه بكام متر وبيقول لى بس تعالى
فقلت له انا طالب جانعى ايه بس دى
قال ناقص اقولك لو سمحت هات الكارنيه

الجنوبى said...

من أيام عبدالحارث مدنى المحامى اللى مات من التعذيب فى التسعينات و المحامين اعتصموا و جريدة الشعب تكتب ..

فين دلوقتى الظباط اللى عذبوا عبدالحارث لحد ما مات ؟
تلاقيهم لواءات كبار ومناصب عليا
و فين جريدة الشعب ؟؟
وفين عبد الحارث ؟
الله يرحمه
ملفات التعذيب فى عصر مبارك لو فتحت المفروض تطير رقاب ظباط وزارة الداخلية عن كرة أبيهم
يا عينى عليكى يا مصر

هشام الصباحى-المشى بمحاذاة رجل يشبهنى said...

والله انت ملكش حل ربنا يستره عليك

Anonymous said...

A片,A片,成人網站,成人影片,色情,情色網,情色,AV,AV女優,成人影城,成人,色情A片,日本AV,免費成人影片,成人影片,SEX,免費A片,A片下載,免費A片下載,做愛,情色A片,色情影片,H漫,A漫,18成人

a片,色情影片,情色電影,a片,色情,情色網,情色,av,av女優,成人影城,成人,色情a片,日本av,免費成人影片,成人影片,情色a片,sex,免費a片,a片下載,免費a片下載,成人網站,做愛,自拍

情趣用品,情趣用品,情趣,情趣,情趣用品,情趣用品,情趣,情趣,情趣用品,情趣用品,情趣,情趣,情趣用品

A片,A片,A片下載,做愛,成人電影,.18成人,日本A片,情色小說,情色電影,成人影城,自拍,情色論壇,成人論壇,情色貼圖,情色,免費A片,成人,成人網站,成人圖片,AV女優,成人光碟,色情,色情影片,免費A片下載,SEX,AV,色情網站,本土自拍,性愛,成人影片,情色文學,成人文章,成人圖片區,成人貼圖

情色,AV女優,UT聊天室,聊天室,A片,視訊聊天室

一夜情聊天室,一夜情,情色聊天室,情色,美女交友,交友,AIO交友愛情館,AIO,成人交友,愛情公寓,做愛影片,做愛,性愛,微風成人區,微風成人,嘟嘟成人網,成人影片,成人,成人貼圖,18成人,成人圖片區,成人圖片,成人影城,成人小說,成人文章,成人網站,成人論壇,情色貼圖,色情貼圖,色情A片,A片,色情小說,情色小說,情色文學,寄情築園小遊戲, 情色A片,色情影片,AV女優,AV,A漫,免費A片,A片下載