11 August 2007

أعمل إيه ويّاك يا حمادة ؟



مش عارف أقول إيه , والله يا إخواني أنا بجد مش عارف ألاقي كلام أوصف بيه شعوري , إحنا فعلا جيل القضاء على الإسلام و تقويضه بشكل نهائي من على وجه البسيطة
إمبارح فتحت التليفزيون بشكل عشوائي , و كإنها كانت إشارة إلهية إني يكون ليا لقاء في اللحظة دي بالذات مع قناة الحكمة و الشيخ أبو إسلام و برنامجه الفتح : ثقافة الحوار
حسيت قد إيه الشيخ أبو إسلام حد حقيقي جميل , و كان موضوع الحلقة هو :
إزاي المسيحين عرفوا شكل سيدنا المسيح و رسموه ؟
الشيخ أبو إسلام فند حججهم الظاهرة و الباطنة بشكل مبهر , قال إيه بيقولوا إن المسيح تعثر و هو يحمل صليبه فمسح وجهه بقطعة من القماش إنطبع عليها شكل وجهه و منه عرف العالم ملامح يسوع المخلص
أنا مش عارف شيخ الإسلام أبو إسلام جاب الكلام ده منين
بس هو قعد يقند الموضوع بشكل خلاني مش قادر أقوم من قدام التليفزيون , وإزاي إن المسيحين كذابين و إن قطعة القماش أكيد مش حيبان فيها لون عينيه و لا لون شعره ولا تسريحته
ثم جاء الدليل الدامغ _ أه وربنا _ إن المسيح بيترسم في كل مكان بشكل مختلف عن الأخر , زنجي في أفريقيا , إسكندنافي في أوروبا و قوقازي في حوض البحر المتوسط
و ده يدل إنهم كانوا بيستغفلونا كل القرون اللي فاتت دي, لبسونا السلطانية و فهمونا إن المسيح شكله كده , و عشان كده أبو إسلام طلع على التليفزون و عرض الصور دي كلها عشان يفضح هذا الإفك العظيم
طبعا أنا حسيب حكاية صورة المسيح دي دون تعليق عشان مؤخرا حسيت إني بقيت قبيح زيادة عن اللزوم
ثم إزاي المسيحين يرسموا إلاهم ؟ هه؟ مش الإسلام قال إن رسم الآلهة حرام ؟ إزاي يرسموا الإله بتاعهم ؟ مش مسلمين دول ولا إيه ؟


الأهم في الموضوع , إن البرنامج اللي إسمه ثقافة الحوار , فعلا بيقدم عينة مهمة جدا من ثقافة الحوار الموجودة و الشائعة بين جيل الصحوة , جيل مقارنة الأديان بارك الله خطاهم
إبتداءا من مركز "نداء أنقظوهم" لمقارنة الأديان إلى شيخ الإسلام أبو إسلام
ألاوهي إنك لازم تقعد تهز دماغك و تبص للناس في الإستويو و تضحك و تكتم ضحكك بعد لما تقول مثلا : و قال إيه العدرا بتظهر في شبرا !
ثم تعرض فيديو لا علاقة له أصلا باللي بترغي فيه للبابا شنودة وهو بيقول إن لازم يكون فيه رقابة على ترجمات الكتاب المقدس اللي بتباع في الأسواق و تقول :
أهو , إعترف أهو إن كتابهم محرف , مجبتش حاجة من عندي أمي أنا , و شهد شاهد من أهلها و تسجد إنت و المصور و المخرج و عامل الإستوديو سجدة جماعية أمام الكاميرا حمدلله على ذلك الكشف الحصري أمام الجمهور

البرنامج من أوله لأخره عبارة عن تسفيه و سخرية بشكل كاريكاتيري من العقيدة المسيحية و من وجهة نظر رجل الغرزة المسلم لما يجيله مزاج يقارن بين الأديان في قعدة مفترجة
مش قادر أجيب مثال أوضح من حكاية صورة المسيح أعلاه يا جدعان ؟
والله قعدت أضحك بشكل هستيري أنا و عمرو و مصطفى مش مصدقين إنه ممكن فعلا حد يتكلم بالشكل ده بكل الجدية دي عن إن أحد دلائل فساد المسيحية هي إن كل بلد بترسم المسيح شكل !
و ختاما و قبل نهاية الحلقة ألقى الشيخ أبو إسلام مفاجآة من العيار الثقيل إذ ذكر أنه ورد في الكتاب المقدس أن الجنود الذين باشروا الصلب تنازعوا فيما بينهم سروال المسيح فأخذ كل منهم قطعة
و مش ححكيلكم بقى , خمس دقايق تريقة على حكاية سروال المسيح و التي أنهاها الشيخ بارك الله فيه بالحديث عنه كالتالي : under wear المسيح
أما العظة من الموضوع , العبرة يعني يمكن حد ربنا يهديه من إخوانا المسيحين و يعتبر بعد البقين دول
إن الأولى بالنصارى إنهم كانوا يحتفظوا ببقايا سروال المسيح و يقدسوه إلى الآن بدل أي شئ تاني
وهو مالم يحدث
و بالتالي فالصلب محصلش أصلا
و عشان كده الإسلام هو الحق
عشان مفيهوش كهانة *
و السلام عليكم و رحمة الله


* نقلا عن شيخ الأمة شعبولا بن عبد الرحيم
مرفق بالتدوينة نموذج لاهم إنجازات مركز " ينعن ديك أبوكوا " لمقارنة الأديان


28 comments:

Anonymous said...

ربنا يستر كل واحد بيربيلك دقنوا يبتدي يفتي

لا تسالنى من انا said...

ازيك يا محمود معلش المقالة ده اخرها مش حلوة بس الموضوع حلوة اوى بجد و يوضح انه دلوقتى ممكن اى حد يطلع و يتكلم فى اى حاجة و هو مش يعرف عنها اى حاجة و ما اكتر الناس ده و كمان ياعم فين نسخة الديوان و عليها توقيعك او قول العنوان بتاع الدار و انا هروح اجيب النسخة علشان انا لازم اقراها

RUTH said...

god!
you are hilarious!
hamoot men elde7k mosh 2adra!!
sa7e7 shar elbalya ma yod7ek!

ruth said...

بفتح السايت بتاع نداء اللى انتا حاطت الينك بتاعه لقيت حاجه صدمتنى
"المحاضرة اللتى اثارت دجة....
دجة؟!!!
هاقول ايه؟لولا ان ريقى ناشف،ولا بلاش..

سقراط said...

لول :)))))))

توضيحات عالماشي (بصفتنا ممثلين للجالية المسيحية المتطرفة نسبيا في مصر :)))):
القصة هي إن الجنود تقارعوا على "الرداء" وعنه كانت الرواية الشهيرة "الرداء"، لا أعرف من أي غسالة جاب حكاية الأندروير دي! مافيش حتى شبهة خلط في الترجمة!(لا أعرف حتى إن كان الرومان قد عرفوا الملابس الداخلية التي عرفها الانسان الحديث أم لا... أظنه احتياج لم يظهر وقتها)

قصة المنديل المطبوع عليه صورة المسيح هي قصة متداولة لدى بعض المسيحيين عن سيدة اسمها "فيرونيكا" يقال إنها مسحت وجه المسيح بمنديلها حين تعثر وهو يحمل الصليب فطبع الدم خطوط الملامح البارزة على المنديل. القصة متداولة لدى الإيطاليين بالتحديد. أما من أي أتى أبو إسلام بفكرة إن المسيحيين يعتقدون إن الصورة المرسومة للمسيح هي صورته فعلا هي لفزورة حقيقية. يعني مثلا الكفار إل شعرهم أشعث وحواجبهم منكوشة في الفيلم هما الكفار فعلا!!! وسميرة أحمد هي الشيماء!!! لم أسمع في حياتي مسيحي، من سلك الكهنوت أو العلمانيين يدعي إن هذا هو شكل المسيح الحقيقي! اخترع حقيقة وانتقدها

لم أر أجمل من صورة المسيح ومريم "الأفارقة" في كنيسة في السودان.

وإنت إزيك كدة؟

Nostalgia said...

أصبت بحالة هيستيرية من الضحك فعلاً وأنا أقرأ..
يا فرحة أمه بيه .. هيرجع البيت ويشوف نفسه في الحلقة الي اتصورت وأدوله شريط هدية طبعاً , ياكل الزبادي .. يطمن كدا أنه قضى على المسيحية وونشر الإسلام ويدخل ينام .
"قيء فكري " جملة لن أمل من ترديدها .. ما يحدث الآن هو قيء فكري ..

bluestone said...

انا بقالي اسبوع ماضحكتش زي النهاردة .. :))) الله يكرمك ..
انا كنت هقول تقريبا اللي قالته سقراطة ..
بس بما انها قالته .. خلاص ..
انا بس حبيت اقول البوست يهلك من الضحك :)))
وطبعا المحاضرة التي اثارت دجة .. دجة فزيعة فزيعة يعني !!!!!

بجد الكلام من ابو اسلام مش هيكون مستغرب
بس انت مش معايا انه من العبث الكوني ان يكون برنامج فيه في عنوانه

ثقافة
+
حوار

ويقدمه ابو اسلام ... ؟؟؟؟؟؟

نهارك سعيد

SaSo said...

ايه ده بقا يعنى
ده بقا؟
يعنى الراجل بعد ماجاب من قلبه كل ده -عشان يعجب- معجبش لامسيحين ولا مسلمين بردو ويجى واحد زيك يبهدله ع النت كده

"افئنبؤكم بالاخسرين اعمالا,الذين ضل سعيهم فى الحياه الدنيا وهم يحسبون انهم يحسنون صنعا"
صدق الله العظيم

ربنا يتوب علينا بقا عشان انا تعبنا خلاص من الناس اللى معاها التوكيل "الحصرى" للاسلام

المهندس /محمد اسامة said...

اولا ازيك يا محمود والف مبروك علي الديوان عمرو عاملك سياح عالي
ثانيا البوست بتاع حماده جامد اوي

wael said...

محمود باشا الله يكرمك يا باشا انا دخلت على مدونتك وانا فعلا مكتئب بس بجد انا مت على نفسي من الضحك من تعليقاتك و من الموضوع بشكل عام
هو يا حوده بيه احنا نفتقد لثقافه الحوار مع الغير او بمعنى اصح احنا نفتقد للثقفافه بشكل عام

أنونيمس said...

بص ياعم محمود
أولا ألف مبروك على شغل كايرو
قريت منه مقاطع ولقيته جميل جدا
.
.
أما عن حماده فهي بالأصح رزالة
هو يعني لما نيجي نناقش حد مينفعش نكلمه باحترام عشان هو كمان يتقبل أن يناقش أفكارنا باحترام
للأسف مستوى الحوار فكريا ولفظيا انحدر وأصبح شوية تريقة واستفزاز واستهبال
.
.
انت عارفني بس مش واخد بالك
معلش كله من سنة سته الله يجحمها
ويعديهالكم على خير
سلام يا معلم
وسلملي عا الواد مصطفى
:)

مركز نداء لمقارنه بين الاديان said...

جزاك الله خير اخى
وبارك الله لك
وعموما انشاء الله الفترة القادة بنعمل جورة لعداد الشاب فى مجالمقارنه بين الاديان لدفاع الخقيقى عن الاسلام
اخمك
احمد الجيزاوى
0109825523

مركز نداء لمقارنه بين الاديان said...

لو عندك مشكله ارجه الاتصال بى من غير متشتم او تسب و وعموما انا بحب وادعوة كمان لكل شخص
بيكرهنى قبل ميحبنى
اخوك احمد الجيزاوى
0109825523

poet said...

يا محمود خلي عندك دم


يعني ياراجل رئيس مركز نداء لمقارنة بين الاديان الاستاذ احمد الجيزاوي بيحط لك تليفونه السخسي وانت يا اخي بتهرج وبتحلق ع الناشف

معلش يا حودة

انا عارف انو صاحب الجيزة ما يعرفش عربي كويس لدرجة انو كاتب اسم المركز غلط يعني مركز نداء لمقارنة بين الاديان مش عارف افتكسها ازاي عربيا مع انها عورة لغوية وايمانا من العبد لله بستر عورات ومؤخرات اللغة خاصة لدى الاستاذة من صنف وارد الجيزة فعديها

ومعلش تاني لما تدخل مركز التنوير الاسلامي اياه - ابقى اسأل عليه قرنه - وتشوف بعينك كتب فراس سواح وماركسيين كتير مسروقة وبغباء غلافها مكتوب عليه مركز التنوير ابقى فكر مليا و اصرخ جليا بالفرق بين امبابة والجيزة ونواصي حوش التنوير


اما اخر معلش - وليس بين الأفاضل اخر - انو تصور يا حبة عين محجوب انو ازاي الجيزاوي وصل للتدوينة ودا لا ينقص من قدر المدونة اساسا لكن تعالى نشوف ونتدبر - ودي من التدبر مش من حاجة تانية - ونقول الاستاذ شهبندر الاديان من النرجسية بمكان انو ليل نهار بيدور على نفسه على الانترنت ياترى يا هل ترى كم آمن على يدي من المسيحيين او النصارى ؟ ياترى مين كتب عني ومين عرض فني ومين قال هات يا ابو حميد

وهوب فجأة وبكبسة زر على رأي اخوانا الصليبيين في لبنان وجد بعيره الضال محمود عزت يكتب عن النداء اللي ماحدش عارف هوا لمين اساسا بس ابو عزت بيكتب وشوية كمان وغيره ينقل ويبقى ايه المانع لما يدخل ويطاطي راسه شوية عشان يا ولداه ينتشل كوكبة الركام هنا من الضلالة والظلام الفكري

يااااه يا اخي والله العظيم حقه

يعني بدري اوي اوي اوي اننا نفكر في طرق لعلاج التراكيب النفسية المتركزة حول الذات

بالمناسبة التراكيب دي هي بالظبط اللي عند الفيتشيين والمثليين و المازوخ

يا اخي ارحم نفسك يا محمود

ارحم نفسك وتوت

ارجع يا ولد

ارجع قبل البلد كلها ما تتنور وانت لوحدك تقعد في الضلمة ويطلع لك الجيزاوي

والله الموفق

Anonymous said...

اه
يا امة ضحكت من جهلها الأمم
يا عم جيزاوى
مين عينك ممثل عن الأسلام والمسلمين؟؟
يأخى على الأقل لازم تفهم أنك بتتحمل مسؤولية اظهار المسلمين بمظهر الجهلة المتخلفين...
يعنى محاضرة عملت دجه وعديناها
ليك عين تيجى تتفشخ هنا كمان و تحط اسم المركز غلط؟؟
ذنب الأسلام والمسلمين فى رقبتك!
انت والشله بتاعتك
حسبى الله ونعم الوكيل..

go3d said...

3ala fekra eltdwenat el akhera bta3tak mas7`ra
ana 3aref abo eslam ahmed 3abdallah men zaman howa mkaras kol 7ayato eno ydl3 el 2otat el fvatsana fe elden elmsee7y belzat bas malosh ta2seer we ma7desh bysm3 3ano waho nmozeg akher lly fvakreen enohm es7ab 2dea we bynam bleel we howa 2rer el 3ayn mo3takhed eno by3mal khdma galeela lleslam

MaMaDo said...

انا في غاية الانبساط النفسي, اخيرا استطعت قراءة مدونتك كاملة في سباق ماراثوني حميم استغرق حوالي اربع ساعات يتخللها بعض التبول الارادي
فقط لاكتشف انك من القلائل الذين يفكرون و يعيشون معي علي نفس الموجة الفكرية
حتي لم قريت اسم الميل بتاعك كيشوت ضحكت من قلبي. ممكن نبقي صحاب.
ملحوظة: ارجوك ماتفتكرش اني واحد من بتوع قصة الغائبات
او ذكرأقل ذكورة

بنوتة said...

مش عارف تعمل ايه متعملش ده رأي

Aladdin said...

منتظر إليه من بلد يعيش على أرضه شعب غارق حتى أذنيه في "الجهل"؟! دي ثقافة "الخوار" بالخاء وليس بالحاء!! كل واحد عايز يبين إن انتماءاته هي "الأفضل" وأنه من بين "المختارين" والباقي دول "آخرين" على أحسن تقدير!!

خلي بالك هناك تعصب وتعصب مضاد عشان بس محدش يفتكر أنه من ناحية واحدة بس. ودا مش بس في البلد دا بس في بلاد تانية كتير.. الفكرة اللي فعلاً مضايقاني هي غياب أي رقيب من أي نوع على هذه الإصدارات!!! شرايط التحريض والعته الديني المنتشرة بين سائقي الميكروباصات أليس من جهة رقابية تعمل على محاصرتها عشان احنا مش ناقصين!!

كشاف said...

بالرغم من إن الموضوع كان سخرية لطيفة بدل ما نتنكد، فأنا مذهول إن شخص مش بيعرف يكتب عربي صدَر نفسه في أوسع عصر معرفي في تاريخ الانسان للدفاع عن الإسلام!!

دورة لإعداد الشباب للدفاع الحقيقي عن الإسلام... هممم

أنا دخلت يا محمود المدونة المذكورة فضولا ودهشت دهشة غير محمودة مما رأيت.

اسمحلي "أفضفض" على مدونتك شوية- في الدرا

1- أن يكتب المرء بعربية رديئة هو عدم احترام لمن يقرأون خاصة لو كان يدعي إنه يضطلع بعلم كبير، قديم، معقد جدا اسمه مقارنة الأديان.

2- تخيل معي يا محمود يا زميلي إن مسيحيا في نوبة جنون مطبق يستحق عنها شهادة معاملة أطفال قرر في إحدى محاضراته للدفاع عن المسيحية ومقارنة الأديان أن يصور نفسه فيديو بينما يفتح نسخة من القرآن ويعرضه على الحاضرين ويهزه بيمينه بينما يمسكه باصبعين. من يا ترى سيحميه من طالبي الثواب؟

3- بدأت بالأمور البسيطة وأود الآن أن أذكر بضعة أمور أفزعتني حين دخلت تلك المدونة - بدافع الفضول غير المحمود. كنا ونحن صغارا في ابتدائي نتصفح كتب الدين الخاصة بزملائنا المسلمين وكانوا يتصفحون كتبنا. وكأطفال كنا ندخل في مقارنات مناسبة لسن ابتدئي، وكلها - للبراءة - كانت خالية من الكراهية أو انتقاص من الآخر. كنا نستغرب وجود صور أناس يستحمون في كتب الدين في صفحات الوضوء (فلم نكن نعرف ما الوضوء) وكنا نقول لزملائنا: عندكوا ناس بيستحموا ليه في كتاب الدين؟ كانوا يستغربون الأغاني التي يسمعونها منا في حصة الدين فيسخرون بطفولية إننا بنغني في حصة الدين. أما المفزع فهو أن يضطلع أحدهم بعلم اسمه "مقارنة الأديان" باقيا على مستوى أطفال ابتدائي في مقارنتهم لكتب الدين بتاعتهم!!!! شخص يضع تساؤلات تدل على إنه لم يقرأ أي شيء في المسيحية سوى ما كتبه المسلمون ممن يساوونه علما ويسمي نفسه "مقارن أديان"!!! لأ وصاحب مركز متخصص في هذا الأمر!!! جاءنا النصر المبين!! ظهر الحق وزهق الباطل!!! كيف تقارن أي شيء وأنت لم تتعب نفسك في دراسة فلسفته أصلا!!

4- يسأل المركز في سؤال (لكل صديق مسيحي) وقد قرأت الأسئلة، وقد راعني "عبطها" - أيوة كدة بالعامية - وهبلها وما تحمله من دلالة على إن الشخص لم يحرك اصبعا ليقرأ "الموضوع" الذي سيضطلع به وهو المسيحية. أسئلة هبلة من نوع: جبتوا منين كلمة التثليث مع إنها مش في الإنجيل "بتاعكم". يا سلاااااااااااام، وكل بقى الألفاظ الشارحة لفكر الإسلام موجودة في القرآن ... مش كدة؟

والمزيد من الهلاوس والضلالات:

- المفسرون للقرآن لم يختلفوا في الأشياء الأساسية!!!

- يعتقد - بتاع مقارنة الأديان - إل المفروض إنه يعرف عن المسيحية داالوقت أكتر من رجل الشارع بكثير - إن المسيحيين يظنون إن "الإله" "الله" قد مات على الصليب ... أي إن اللاهوت مات!!!!

- يعتقد - بتاع مقارنة الأديان - إن المسيحيين يسجدون أمام الصلبان عبادة لها!!!!

- يعتقد - بتاع مقارنة الأديان - إنه طالما الأناجيل ليست موحاة بالنص فهي تفسير شخصي مزاجي لكل كاتب لها!!!

- يعتقد - بتاع مقارنة الأديان - إن الأناجيل مملوكة لأصحابها لإن بداية الإنجيل تحمل اسم الكاتب - إنجيل يوحنا مثلا. يعني أنا يا محمود مثلا لا حرج علي لو اعتقدت إن مصحف عثمان كتبه عثمان وبالتالي فهو كاتبه!!!

- يعتقد - بتاع مقارنة الأديان - إن أسئلة من نوع "هل هذا إله" تحت مشاهد من فيلم "حياة المسيح" هي حجة علمية قوية تناسب الوظيفة الثقيلة التي أخذها على عاتقه وهي "مقارنة الأديان!!!!

وهي أسئلة كما ترى ... قشرية، لا تمتد إلى فلسفة موضوع ما ناهيك أن يكون ذلك الموضوع دينا تتداخل فيه عناصر معقدة

أسئلة أجبناها نحن في إعدادي - بعد ما كبرنا شوية - على زملائنا الذين تساءلوها بنفس البراءة الباقية والمناسبة فكريا لسن 13 سنة!!! أي - لو كان قابل مراهق مسيحي وسأله الأسئلة دي كان هيرد عليها - في إطار فلسفة المسيحية طبعا إل هو مش مضطر يعترف بها - مفهما إياه كيف تفسر الأمور في سياق أساسيات الإيمان المسيحي!!!

5- أما ما أفزعني فعلا فهو إن ما هو منشور على المدونة - حتى الفيديو - هو نفس الشرائط التي يوزعها مركز أبو إسلام بالضبط. نفس صور الأتوبيس الذي هجم على الدير هجمة رجل واحد - هما صحيح راحوا الدير ليه؟ حد قالهم إن الرهبان دول حجج في مقارنة الأديان؟ وهو ما أقلقني. هل هذا المركز نواة لاستنساخ مراكز متشابهة جدا تؤدي نفس المهمة كما أسميتها - ينعن ديك أبوك لمقارنة الأديان - للالتفاف حول التضييق أو توسيع نطاق التمويل؟ فما الهدف من أن أنشئ مركز ثاني يعمل بنفس المواد بل ونفس الدعاية الفيلمية. ماذا يعني ذلك؟

لقد شعرت بالإهانة للاستخفاف بعقلي وعقول الآخرين. ناهيك عن الكراهية المقطرة والتي اعتدنا عليها. فتصور مثلا لو قررت أنا - في نوبة جنون تانية - إني أسجل محاضرة تحدث "دجة" في الجوامع بعنوان: قرآن مديحة. عادي ... تساوي المواطنين في الحقوق والواجبات. هو مش مكتوب عليه مصحف "عثمان"؟ يبقى عثمان هو إل كتبه ... عايزة مفهومية دي ولا تفسير؟ وأنا عن نفسي هأستهبل وأعمل نفسي جاهل بتاريخ كتابة القرآن وجمعه لأوازي الجهلاء قامة.

آنا آسف إني أسهبت في مدونتك، بس النطاعة إنه داخل يكتب عندك الكلام ده بعربيته الرديئة ...و هو سؤال جانبي... هو معاه الابتدائية؟ يعني ضحية من ضحايا التعليم ولا واخد الجهل بأصول الكتابة - المقروءة وليس الخالية من الأخطاء - موقف ولا إيه؟

وبعدين أنا سألتهم في الكنيسة قالوا لي إنهم ما سمعوش أي دجة ... يا ترى الدجة دي كانت في حتة تانية؟

المسألة دي ما لهاش علاقة بكون الموضوع محل البحث دينا... فالرجل نحمد الله لم يرقى لمستوى البحث أصلا. لو واحد جاهل عمل مركز عشان يقارن بين نيتشة وديدريه برده هأسأل نفس الأسئلة

كشاف

ابو تريكه said...

علفكره عجبني او جدا خالص فكرة الجدول انك بتفكرني بالمدارس في النحو اعرب امي تجري
الفعل والفاعل

muse said...

حتة الألوهية الموجودة جوه كل واحد هى اللى بتخليه عايز يعتقد انه هو الوحيد اللى صح و الباقى كفرة انجاس ولاد كلب حتى لو كانوا على نفس ديانته فقط من يحجم تلك(الحتة ) فى هذه النقطة و يستخدم ما فوق رقبته هو من يستحق أن يطلق عليه لقب الانسان
اسلوب اكتر من رائع(لو عرفت ايه اللى اكتر من رائع ده قوللى)
لدرجة ان اهلى دخلوا عليا الاوضة يطمنوا على حالتى العقلية و انا بقرا البوست من كتر الضحك..
تناول رائع..

Anonymous said...

مش عارف جايلي إحساس عجيب إنك غبي وعاطل. أو إنك مسلم بالبطاقة يعني صايع وتافه وآخرك بتصلي الجمعة

طبعاً هتلاقي كتير زيك هيدخلوا دلوقت ويقلولك إلحق ده ساب الموضوع الأساسي .. لكن أنا ببص أبعد من كده
على تفاهتك لما تسخر من أحد رجال دينك أو حتى من يسمون أنفسهم هكذا كأي حمار غبي لا يدرك أنه يهين جزء من دينه .. تحب تعرف إزاي
المسيحين يختلفون كثيراً مع آبائهم لكن لن تجد واحد من العامة الرعاع مثلك يسب أو يسخر من رمز ديني أبداً مهما بلغ الاختلاف

طبعاً لاحظ إنك مجرد صايع في مدونة وإن كل اللي حواليك أو اللي بيشجعوك يا إما كفار مسيحين بقول القرآن لن يرضوا عنك حتى تتبع ملتهم أو مجرد صيع برضه زيك آخرهم يضحكوا ويسبرسوا وآخر الليل مع مومس ولا يضربوا عشرة

يعني من الآخر أنتم تمثلون لنا الحياة البهيمية التي تخلوا من الفكر الحقيقي أو الفكر الملتزم

Anonymous said...

مش عارف جايلي إحساس عجيب إنك غبي وعاطل. أو إنك مسلم بالبطاقة يعني صايع وتافه وآخرك بتصلي الجمعة

طبعاً هتلاقي كتير زيك هيدخلوا دلوقت ويقلولك إلحق ده ساب الموضوع الأساسي .. لكن أنا ببص أبعد من كده
على تفاهتك لما تسخر من أحد رجال دينك أو حتى من يسمون أنفسهم هكذا كأي حمار غبي لا يدرك أنه يهين جزء من دينه .. تحب تعرف إزاي
المسيحين يختلفون كثيراً مع آبائهم لكن لن تجد واحد من العامة الرعاع مثلك يسب أو يسخر من رمز ديني أبداً مهما بلغ الاختلاف

طبعاً لاحظ إنك مجرد صايع في مدونة وإن كل اللي حواليك أو اللي بيشجعوك يا إما كفار مسيحين بقول القرآن لن يرضوا عنك حتى تتبع ملتهم أو مجرد صيع برضه زيك آخرهم يضحكوا ويسبرسوا وآخر الليل مع مومس ولا يضربوا عشرة

يعني من الآخر أنتم تمثلون لنا الحياة البهيمية التي تخلوا من الفكر الحقيقي أو الفكر الملتزم

عمرو عزت said...

طيب يا أستاذ يا مهم
أقدر أعرف من " أنتم " بما أنك قلت لـ "هم " : أنتم تمثلون لنا الحياة البهيمية .. الخ الخ

ثم هل هناك عند المسلمين ما يسمي " رجال دين " و اذا كنت تقصد علماء دين , فالأستاذ أبو إسلام كما يعرف نفسه : كاتب صحفي

و لو كان اعتبر نفسه لسبب ما , أو اعتبرته انت عالم دين , من قال أن انتقاد علماء الدين اذا هرتلوا غلط
الهرتلة هي اللي غلط

ثم ان اي انسان او عالم دين او كاتب صحفي ليس رمزا دينيا , و حتي الرموز التي يعتبرها الناس رموزا دينية ليست فوق النقد.

طبعا انت متصور ان فيه خناقة بين المسلمين و المسيحيين , فيبقي اي واحد مسلم غبي فعلا وسط الخناقة لما ييجي علي واحد مسلم تاني ( عالم - كاتب صحفي - مهرتل صحفي ) لكن لو شلت من مخك الخناقة دي و حطيت مكانها منطق يقدر يميز الكلام المعقول عن الهرتلة , هاتعرف تضحك من قلبك علي اللي مكتوب و انت مرتاح الضمير , ده اذا ما كنتش هاتزعل و تفكر ترد علي قلة الأدب بتاعة الكاتب الصحفي الرمز .

محمود عزت said...

خير يا جماعة !
أقوم من النوم ألاقي ردين من الحاج أنونيمس و عمرو عزت كمان !
والله يا أخ أنونيمس شوف
مبدئيا أنا عايز أقولك كلمتين صغيرين كده
إنت لو جاي عشان تقول رأيك على عيني و على راسي و ربنا و أفرشلك الأرض ورق كلينكس
بس أسلوبك ده بيقول إنك محروق أوي مش عارف ليه ؟
أنا يابني أذيتك قبل كده أو علمت عليك في يوم من الأيام عشان تبقى مشحون كده ؟
طيب يا سيدي إفرض أنا قليل الأدب , تقوم إنت يا مسلم يا اللي مش بالبطاقة تيجي تفرش الملاية كده , مش عيب برضه يا راجل
و فرضا لو أنا زي ما بتقول
أنا برضه يا ريس من حقي أقول رأيي و أنا لا غلطت في أبوإسلام بشكل شخصي ولا في أحمد الجيزاوي مثلا يعني ولا فيك !
ولا إيه يا ريس ؟
ثم لو إنت بتعتبر أبو إسلام أحد رموز الإسلام , فانا أنصحك إنك تقرا أكتر عن الإسلام يا حمادة, حقيقي والله عشان تعرف الفرق بين الرموز و أي خطيب جمعة في الزاوية اللي تحت بيتكم
أنا رأيي أن أبو أسلام بيسيئ للإسلام أكتر من زكريا بطرس
والنوايا بتاعت ربنا بس أنا بتكلم عن المنهج اللي أي حد معاه دبلوم ولا ليسانس أو شوية شهادات يفتح بيهم مركز مقارنة أديان و يهرتل بكلام يضحّك الناس علينا
يلا توكل على الله متضيعش وقتك في مدونة شوية صيع يا راجل
روح إلحق حلقة الرمز يمكن ربنا يهديك

مـحـمـد مـفـيـد said...

الله يخرب عقلك يا عمرو انت ومحمود
والله انا مت من الضحك علي الاخ الجامد اللي معلق ده
طيب سؤال صغير هو ليه معلق بأنونميس طيب ما يكتب أسمه
سنه عنوانه اي حاجه بدل ما هو خلي الموضوع سفيه بالتعليق الزباله ده وخرج من نطاق النقاش وقلبها خناقه وفرقع بمب وقلب التربيزه
معلش يا حوده
واحد عناب علي حسابي هنا لمحمود
:)))

Anonymous said...

A片,A片,成人網站,成人影片,色情,情色網,情色,AV,AV女優,成人影城,成人,色情A片,日本AV,免費成人影片,成人影片,SEX,免費A片,A片下載,免費A片下載,做愛,情色A片,色情影片,H漫,A漫,18成人

a片,色情影片,情色電影,a片,色情,情色網,情色,av,av女優,成人影城,成人,色情a片,日本av,免費成人影片,成人影片,情色a片,sex,免費a片,a片下載,免費a片下載,成人網站,做愛,自拍

情趣用品,情趣用品,情趣,情趣,情趣用品,情趣用品,情趣,情趣,情趣用品,情趣用品,情趣,情趣,情趣用品

A片,A片,A片下載,做愛,成人電影,.18成人,日本A片,情色小說,情色電影,成人影城,自拍,情色論壇,成人論壇,情色貼圖,情色,免費A片,成人,成人網站,成人圖片,AV女優,成人光碟,色情,色情影片,免費A片下載,SEX,AV,色情網站,本土自拍,性愛,成人影片,情色文學,成人文章,成人圖片區,成人貼圖

情色,AV女優,UT聊天室,聊天室,A片,視訊聊天室

一夜情聊天室,一夜情,情色聊天室,情色,美女交友,交友,AIO交友愛情館,AIO,成人交友,愛情公寓,做愛影片,做愛,性愛,微風成人區,微風成人,嘟嘟成人網,成人影片,成人,成人貼圖,18成人,成人圖片區,成人圖片,成人影城,成人小說,成人文章,成人網站,成人論壇,情色貼圖,色情貼圖,色情A片,A片,色情小說,情色小說,情色文學,寄情築園小遊戲, 情色A片,色情影片,AV女優,AV,A漫,免費A片,A片下載