29 July 2007

شفت القمر , نطيت لفوق في الهوا








طبعا ككائن غير قادر على التكيف مع الحرارة , و هو ما يقنعني إني ربما يكون لي أصول من سيبريا , فدلوقتي أنا بقضي أسوأ أيام خلقها ربنا
بصحى الصبح و بعد ساعة تقريبا بكون بلهث و عمال أشرب مية و أحاول أفوق بأي شكل
و في ظل طبعا إني كل يوم لازم أنزل لدروس و كلية , ففي الشارع بكون مش طايق أي شئ ولا عارف أركز ولا أعمل أي حاجة...
الناس بتكون طبيعية حواليا , يعني أكيد الحر مأثر عليهم بس مش لدرجة الإحساس إنك مش قادر تتكلم !
المهم...
الحمد لله يا رجالة أنا خدت مركز تالت في مسابقة الهيئة العامة لقصور الثقافة عن ديوان أحلى فيلم شفته في حياتي , وهو في الحقيقة فيلم هادف , بلاش أفكار قذرة
و أفتكر إن أرنست همنجواي قال إنه كان بيشعر بنوع من الإشمئزاز لما يسمع عن الناس اللي صريحين و صادقين لأبعد حد لإنهم على حد تعبيره بيفتقروا إلى أرقى ما في الإنسان : التخيل و المحاكاة , و بالمناسبة دي أقدر أقول إن أحلى فيلم شفته في حياتي هو فيلم الشيماء
أنا لما عرفت إني أخدت مركز تالت إتضايقت شوية لإن كان عندي أمل ضخم في المركز الأول , كنت حاسس إن لو ما أخدتش الأول فده مالوش أي معنى
و ده بيؤكد الفكرة اللي بتقول إننا عايشين بتصور ذهني قوي إن الكاميرا تدور في خلفية المشهد ورانا 24 ساعة..
وإن كل واحد لازم يكون البطل المطلق , زي براد بيت في أخيليس , مينفعش يكون مثلا محارب عادي جدا جنب أخيليس بمترين حيحارب و ياكل علقة موت و يروح متعلق على درعه و الجيش راجع منتصر..
طبعا الأنسة سوسن أقنعتني بعد نقاش طويل _ وأنا عادة ببقى مقرف جدا لما بكون مش مبسوط _ إن التالت حلو و جميل و الحمد لله يا نجم إنت كنت لاقي أصلا
أما الأخ عمرو صاحب مدونة مدبولي الشهيرة فقال بدوره إن يعني إيه ترتيب و مراكز في الشعر و إن تعريف الجمال و التميز لا يتعلق بترتيب أو أماكن بس المسابقة في النهاية لازم تحط معايير للتفضيل بين اللي مقدمين اعمال مميزة عشان ترتبهم بموضوعية مع إعتبار طبعا إن فيه أعمال بيتوفر فيها إقناع أكثر من غيرها بالمراكز الأولى زي تكامل الديوان و فكرته الجديدة أو أسلوبه المبهر ..
على كل حال
أنا مبسوط , و كنت منتظر ترضية مناسبة لأحلى فيلم شفته في حياتي لإنه هو كان الديوان اللي إتقدمت بيه أول مرة للنشر قبل أن يظهر فجأة شغل كايرو على الساحة و يتم تأجيل أحلى فيلم إلى ماشاء الله
وعموما أنا رأيي إن الإشتراك في المسابقات الأدبية شئ لطيف , بغض النظر عن المكافأة المادية , الحكاية في الموضوع إنك لما بتكسب بتحس بنوع من التقدير أو التشجيع الكافي ولما بتخسر برضه بتفكر بأسلوب مـُـرضي جدا إن المسابقات دي مش معيار حقيقي و أكيد هما ليهم شوية معايير روتينية مش متوفرة في ديواني و انا مقدم تفعيلة و الموضة دلوقتي نثر إلخ إلخ.. وده حق شرعي لكل أديب و أديبة..
إنما فعلا المركز التالت ده كان حاجة مفرحة جدا , في وسط الباطنة و الجراحة و الحر و الإحباط المتكرر كل يوم إنك تحاول عبثا تعمل يوم مثالي, بقيت لما أفتكره إحس إن فيه شئ مبشر في الحكاية
الديوان ده كان أول حاجة أكتبها في العامية , أول تجميعة قصايد
ألف مبروك يا عزت بيه
عقبال الأوسكار بعون الله
قول يارب


21 comments:

tagreba said...

مبروك عليك نسمة هوا ف الحر :-)

hesterua said...

مبروك يا عم محمود يا شاعر
تستاهل
وبكره هتطرى اكتر واكتر

horas said...

بالنسبة للحر متقلقش كلنا معك ونساندك وهتشوف المساندة دى صح لما الحر يغور في ستين داهية عشان نعرف نفوق من الدوخه الابدية دى ونعرف نتكلم اما بالنسبه للمسابقه الف الف الف مبروك يا معلم وان شاء الله المسابقه الجاية مركز اول

مصطفى عزت said...

مبروك يا حوكه

عمرو عزت said...

نسيت تقول انك أخذت مع الجايزة ألف و نص عدا و نقدا
و دي حاجة لازم تتسجل انك في يوم من الايام اخدت من الحكومة حاجة
علشان ما تقولش في يوم من الايام : ايه ادتنا مصر ؟
هاقولك ادتك ألف و نص يا مفتري

Anonymous said...

ألف مبروك يا محمود على الجايزة
إنت تستاهل أكتر من كده بكتيييييييييير

وعقبال صدور الديوان

محمد أبو زيد

wael said...

مبروك يا محمود باشا
هتعزمني على ايه؟

سارة بنت الدشناوي said...

مبروك يا محمود ألف مبروك و عقبال نوبل في الآدب ان شاء الله ، انت عارف الديوان ده بالذات من اجمل الحاجات اللي بحب اقراهالك و ان شاء الله تحقق اكتر و اكتر و الي تقدم مستمر ان شاء الله

Geronimo said...

:)

عمرو داخل يسيح لك

وينق عليك

ويخلى الناس كلها تحسدك

الف ونص يا مفترى ومتجيبش سيرتهم ف البوست


انا بهدى النفوس يا نجم

أحمد الشمسي said...

ألف مبروك يا محمود بيه، الظهار ان الجوايز دايما تيجي في الأوقات الصح!
السنة اللي فاتت أنا أخذت برضه المركز الثالث في القصة في نفس المسابقة في وقت أنا كنت فيه بفكر أنتحر! عقبال الأوسكار

fanan fa2eer said...

مبروك ألف مبروك يا محمود

وان شاء الله في تقدم دايما

وعمرو وسوسن عندهم حق طبعا المركز التالت مش وحش والكاميرا مش ورانا 24 ساعة
وفعلا هما بيبقي ليهم معايير مختلفة في تقييم الأعمال الأدبية

مبروك يامحمود

طارق إمام said...

ألف مبروك الجايزة يا محمود . البرونز مش وحش
(:
و ألفين مبروك ( شغل كايرو ) أنا سمعت عنه من أكتر من حد و مستنيه .. انشاء الله يكون ديوان ( ما فيش في القلب غايره ) يا فنان
((:

mohamed kamal hassan said...

ألف مبروك يا شاعر

كنت متوقع فوزك والله

وبجد فرحت

ألف ألف مبروك يا باشا

شقلوطة said...

مبروك عليك يا فندم
عقبال كل مرة ..
;)

m shalaby said...

alf mabrouk ya doctor we 3o2bal nobel isA.

Ert3ashat said...

مبروك يا محمود و عقبال شغل كايرو ان شاء الله :)

إبـراهيم ... معـايــا said...

ألف مبرووووووووووووووك يا حودة ...
.
.
و مبروك شغل كايرو يا واد ، سمعت إنه نزل خلااااص !!! ، ياللا رجعهم عند سوسن لحسن هشام يزعل منك ( هشام مين)،،،، وبهذه المناســـبـة السعيدة أحب أقول لك برضووون إن عادل نزل ديوانه ( تعود أن تموت) ، مع يحيى هاشم ( اكتب) ، و كريم الصيـاد ( أكيد تعرفه) ، نزل ديوانه برضه ( الأمــــر ) وهو ـ في نظري ـ أتحف ديوان فصحى لشـاب ف جيلنـا ... حتى الآن !!
رغيت كثير أنا معلش !!

.
.
أصل المصائب ( لا ) تأتي تباعًا .... إنتا عارف
و قاريني


تحياتي ، وعاوزين نشوفك ونهنيييييييك يا ندل

إبـراهيم ... معـايــا said...

آه ، بالنسبة لكريم حفل توقيع ديوانه ف جامعة القاهـرة مساء الأحد 5/8

ابقى تعالى ...
..
.
الحفل
مش عن الآخرين !!!
.
.
سلملي على هيما

spellz said...

mabrooook
ma3leshi matez3alsh
aham 7aga enak ktabt 7aga enta Radi 3anha msh mohem tele3t l kaam

3yza ab2a a2rah we ashoof b2a:D


"kan nefsy atla3 l awwal" fakartny shwaya be Teb
we ezay kol shwaya l dakatra by2ololnaa ew3o tekoonoo fakreen nafsoko fe sanaweyya 3amma w hatetla3 ya doctor awwel wa7ed fl dof3a:D
bs 3mooman meen may7ebbesh yb2a l awwal 5soosan lw kan ysta7e2;-D

مصطفى محمد said...

لعشاق الكتابة فقط..انتظركم في مدونتي

لا تسالنى من انا said...

الف مبروك يا محمود على الجائزة و على الديوان و عقبال الاسكار بس مش مهم الجوائز بدل ما انت حساس انك صح و الف مبروك تانىو عقبال باقى الدواوين