22 July 2007

طب من بُـقك






الأيام اللي فاتت حسيت فعلا معنى إن التعليم المصري هو أحد أسباب إرتفاع نسبة أمراض القلب و السكر و الضغط و الشرايين و الأمراض النفسية و العصبية...
إبن عمتي المتفوق اللي جايب 95% لقيت نفسي بأقوله لازم تشد حيلك زيادة كمان في تالتة عشان تضمن دخول المحروقة كلية هندسة مقبرة الطلبة و عاصمة الدبلرة
يعني اللي فاضله 5 % على الوصول إلى الكمال العلمي التعليمي في مصر مش ضامن بشكل كامل تحقيق أهدافه يا عالم يا بنت الـ#$@#% ؟!


أما بنت عمتي اللي جابت 91 % علمي علوم , فالبيت عندها مناحة ..و كلية طب السنة دي متوقع ليها 98 % أو ممكن 99 % , أنا عايز أفهم
طالب وصل لدرجة إنه فقد 9 % فقط من مجموع درجاته
تحصيله يتعدى الـ 90 % و دي نسبة عالية جدا
ميعرفش يوصل للي هو عايزه ؟
أنا فاهم كويس جدا إن الأرقام دي كلها لا تعبر عن شيء و الموضوع كله سباق غير علمي بالمرة , لا فيه علم ولا فهم ولا تنمية لأي شيء
الثانوية العامة عبارة عن لعبة لطيفة جدا
بشوية صبر زي الجمل اللي كل يوم لازم يمشي شوية في الصحرا , كل يوم تقعد تذاكر شوية
لا تفهم ولا تنيل ولا حتى تحفظ
في أخر السنة من كتر الحرث حتلاقي نفسك حافظ و بتسمع و إنت ماشي في الشارع
و بعدين تدخل طب
و تجيب البالطو بقى و تعدي كل يوم الصبح من قدام مدرسةالأورمان شيراتون الثانوية بنات ثم على كوبري الجامعة الثانوي المختلط ثم إلى بوابة المجد
و هي عبارة عن كلية حيتم فيها التالي :
_تدفع دم قلبك في الدروس
_تتمرمط من الدكاترة و العيانيين و موظفين الكلية و الممرضات و الحكيمات و عمال النظافة يا طالب الطب يا أقل من تكلفة الكرسي اللي إنت قاعد عليه
_حيكسروا عينك
_ تبقى طبيب إمتياز و إبتداءا من رئيس الوحدة إلى زوار المرضى يبقى ليهم الحق في إزدرائك مهنيا و الممرضات يتحرشوا بيك و تقولك تعالى أعلّمك إزاي تعمل رسم قلب و بتاع , بيحكوا والله عن واحدة إسمها سعدية تخصص رسم قلب , شكلها عاملة دراسات في الموضوع..
_تتعين في الكلية لو متفوق و تبقى نائب في كلية الطب و هو ما يعني 5 سنين _حسب النظام الجديد _ من العبودية عند الأساتذة و الأساتذة المساعدين قد تصل إلى حد العمل كسائق أو سكرتير عند معاليهم المقدسة
(راجع قصة المرمطون لعلاء الأسواني _ مجموعة نيران صديقة )
_أو تتخرج عشان تقبض 200 جنيه و إنت قاعد بملابسك الداخلية بتتشمس على كرسي خشب كليوباترا قدام وحدة صحية في سوهاج في التكليف


أعرف واحد من زمايلنا في الكلية قال إنه أيام سنة سادسة لما كان يمسك الجرنان و يقراه يلاقي نفسه بيفكر تلقائيا :ححفظ كل ده إزاي ؟
أنا بحمد ربنا إن لسه جوايا بقية باقية من حلم إني أكون دكتور محترم
لولا كده والله كنت سبت الكلية من زمان
كلية الطب غير جذابة بالمرة ولا فيها أي شيء يقنعك بيها إلا مجرد رغبتك المحضة فيها
تخيل كل يوم الصبح تروح تقعد قدام دكتور أقرع و بنضارة بيقولك في وسط الشرح إنك لا شيء , و حتتخرج لا شئ و حتفضل لا شيء و أول الإحساس بالشيئية عندك هو بعد الحصول على الدكتوراة أو المعادلة الأجنبية..

أفتكرة مرة في سنة خامسة واحد زميلي إشتبك مع دكتورجراحة في نقاش حاد على الغياب
اليوم التالي زميلنا قرر إنه يكون محترم و يروح يعتذر للدكتور عن إسلوبه الحاد
تقريبا الزميل الفاضل إفتكر إن الدكتور جاله مثلا نتيجة النقاش ده إكتئاب أو أرق حاد بيمنعه عن مواصلة وظائفه الحيوية في الكلية و العيادة و المستشفى و الفراش
و فعلا دوّر عليه أو لقاه في الوحدة فـ راح له بنبل و إنكار ذات عالي
الدكتور قال له بهدوء تام :
إنت بتعتذر على إيه ؟
يابني إنت بالنسبة لي ساعة إلا ربع في في جدول الشهر
إنت متوقع إني فاكرك إنت شخصيا عشان أفتكر اللي عملته من أسبوع !


اليومين اللي فاتوا كنت بفكر كتير لو كنت مجبتش مجموع طب كنت حعمل إيه..
كنت حدخل إعلام أو آداب إنجليزي اللي كانت حلم حقيقي عندي مش لاقيله مكان في ظل إني لازم أكون دكتور و العيلة كلها كانت مستنية أول دكتور في الجيل الثاني اللي المطلوب منه يرتقي إجتماعيا في سلم الطبقة الوسطى
طبعا أنا كمان كلية طب كانت عندي عبارة عن مكان وهمي أو مقدس بسمع عنه من و أنا في تالتة إبتدائي و " والله شكلك دكتور يا حوكة ".. " جرّاح و ربنا...الشوطة دي بتاعت جرّاح "..
و بقالي سنتين في ثانوية طافح الكوتة عشان أدخله
مكنش ينفع أقول لأ لإني ببساطة عبارة عن فرد من قطيع الغنم المهذب اللي مش متاح له أي خيارات في حياته من ساعة ما إتولد غير إنه مثلا يلبس تي شيرت لون معين أو يحب بنت الجيران
اللي لو أبوها مش بيحب أبويا يبقى مينفعش عشان إنت بتناسب عيلة يابني و أهل البنت أهم منها و لو مثلا البت كويسة و اهلها وحشين فده مش ذنبها ولا ذنبنا نتحمل إحنا قرف أهلها ينعل أبو أهلك على أهلها إنت واجع دماغنا ليه بروح أمك
في النهاية
أحب أقول لأولادي و حبايبي طلبة الثانوية العامة :
أي حد لسه قدامه الفرصة إنه يختار
إذا كان أصلا جايب مجموع هندسة أو طب
قدم يابني على منحة الجامعة الأمريكية أو شوف كلية إنت بتحبها فعلا و إدرس فيها
أو ماتدرسش حاجة و ريحها يابني ما تقلقهاش إذا كانت أصلا فاضية !
تحشيها ليه معلومات و تكفر أهلك و كليتك معاك !
في الأخر برضه الدنيا بتتساوى
طلبة البكالوريسات و الليسانسات بقوا قاعدين على الكاشير خلاص
يعني لو بدأت مشوارك في محل البغل من بعد الثانوية حييجي اليوم اللي يكون فيه تحت إيدك في المحل سيكشن محاسبة كامل من كلية تجارة
و تتجوز و تجيب عربية وتسافر و تخلف عيال تدخلهم كلية طب
ولا يهمك


* الصورة : للفنان جويا بعنوان " إمتحان شفوي نسا و ولادة _قصر العيني "

23 comments:

Lasto-adri *Blue* said...

المحروقة كلية هندسة مقبرة الطلبة و عاصمة الدبلرة


هى ممكن تكون عاصمة للدبلرة بس معلش مش مقبرة الطلبة..
الكلية صعبة جدا.. دا صحيح... ومش بيكدب اللى يقول لك من اصعب كلياتك يا مصر... بس عارف لو الزمن رجع بيا تانى كنت دخلتها برضو... لان اللى بتتعلمه هناك طريقة تفكير مش موجودة فى اى مكان آخر

فلو حد قرأ الكلام اللى فوق.. ياريتك تقرأ تعليقى بالمرة ولا تتردد انك تدخل هندسة لو نفسك فيها.. بس لو معجبتكش الدراسة .. فكر ازاى بطريقة التفكير اللى ح تتعلمها.. تحل مشكلتك وتتطور من نفسك بشكل تانى



خيرها فى غيرها يا عم محمود بقى
:PPP

محمود عزت said...

ما هي المشكلة يا بلو في طريقة التفكير اللي بيتعلمها !
هوا أنا مقلتلكيش ؟!!
:))

walaaz said...

أوووف
الله يسامحك يا محمود قلبت المواجع اللى هايجة لوحدها أصلا
أمل زمايلك على الخط الآخر اللى بعد طفح نفس الكوتة و البهدلة تلاقى اللى يقولك أفتحلك كشك أدوية

اليومين دول تحديدا أنا بشتم نفسى أنى مقدمتش على المنحة دى فى زمنها .. ولا مدخلتش سياسة و أقتصاد ولا أعلام اللى كان نفسى فيهم
ولا أصلا مدورتش على أى فرصة دراسة فى أى حتة برة المحروسة عشان أحس انى بنى آدم
منه لله الزن اللى دخل صيدلة فى دماغ الواحد .. والحمدلله انها مقدرش يقنع الواحد بطب عشان أنا كفاية عليا أوى خمس سنين .. سنة كمان كان ممكن أنتحر

وآه فعلا زى ما أيمان قالت
هندسة أحسن والله ونظام الدراسة والتفكير أفضل بمراحل من كليات علمى علوم اللى أصلا كلها كليات حفظ وبس

سَيد العارفين said...

عارف يا حودة المشكلة كلها ان حتي لو أهلك أو القطيع اللي الواحد منه مش مركز تبقي دكتور " تحديدا " ف إيه ممكن تتوقعه من طالب عنده 17 سنة عمره ما اختار حاجة غير انه يفكر يبقي " دكتور أد الدنيا "

يا ريت الزمن يرجع تاني و الواحد كان خدها من قاصرها و فتحت قهوة قد الدنيا و ا تفرغت لمشروعي التقدمي في " حصر و تخزين و تحليل دلالات اختيار اسماء المحلات و الشوارع و الأسماء في مصر المحروسة " أو " ادليل غير الرسمي للمقاهي الشعبية الهجين في مصر "

مش أحسن من اللي احنا فيه



شد حيلك يا بطل في الامتحانات

ابراهيم

عطشان said...

فكرتنى بأيام زمان لما الواحد كان فى الثانوى كان بيروح المدرسه علشان يكفر المدرسين او يزوغ مع صحابه و يروحوا اى حته و كله فى الوقت ده ماشى على الدروس الخصوصيه و كله بتكرفله لغايه ايام الأمتحانات انا مثلا كنت ادبى و مش عارف اى حاجه فى الفلسفه و ذاكرت قبل الأمتحان على طول بكام ساعه حوالى 6 ساعات و جبت فيها 43 من 50 ... البوست ده عمل مقارنه بينى و بين اختى اللى فى 6 طب و بتدعى ربنا انها تخلص السنه دى و الأمتياز اللى حتتمرمط فيه :d

spellz said...

برافو!!
البوست هايل
دى كلية معفنة اساسآ
والله انا يوم المجموع اعدت ادعى انى انقص
انا بكره الكلية دى
و اعدت اقول لأهلى عايزة منحة فى ال auc
كان زمانى حاجة تانية
بدل مأنا مدفونة بالحياة فى ام الكلية دى
انا قربت اكره حياتى
زهقت قرفت بجد يعنى
مش عايزة اذاكر ولا عايزة اطلع دكتورة و حسة انى فقدت اى موهبة من اى نوع
حاسة انى لو اتخرجت منها ء هبقا مجرد شى مالوش لازمة
ولا هاعرف اشتغل فيها ولا فى أى مجال تانى
دخولك الكلية دى معناه انك بتحكم بالاعدام علىل مخك او اى عضو بيفكر عندك

آسفة على جرعة الاكتآب الرهيبة اصلى مش عارفة ذاكر باطنة :]

horas said...

ياعم محمود انت كده بتقلب مواجع قطاع عريض من القطاع المهمش من طلبة الطب النجباء ..أصل في ناس فاكرة ان طال طب دا يعنى دكتور بس مستنى تصريح مزاولة المهنة ..متعرفش ان غي ناس ضايعه وناس بايظة وناس الزمن داس عليها..ولما انت بتسمى هندسه مقبرة الطلبة أمال القصر العينى تسمهيها ايه؟؟ولا انت عشان لسه جواك أمل تبقي دكتور محترم بتنفسن عالبشمهندسين ..؟؟عالعموم يا محمود باشا بوست جميل قال كتير من اللى جوايا وحسسنى ان انا مش لوحدى وانا فعلا بعمل زيك وبقود حملة بين طلبة الثانوية العامة للبعد عن طب وعن القصر تاعينى بالذات

أحمد عبد الهادى said...

و يا سلام لو بعد كل ده تدخل الجيش كمان

شوف يا ابني الدنيا دي عبارة عن سلسلة خوازيق ورا بعض ، منها اللي بيتفرض عليك زي الجيش أو اللي بتختاره زي الكلية و الشغل و الجواز

شد حيلك يا حوده

:)

شقلوطة said...

بعد الضحك و القهقهة الغير طبيعية بعد البوست ده
حمدت ربنا أوى على إنى دخلت آداب..لأ و إعلام كمان ..يعنى على رأى اللى قال
روقت ال جى و كبرت ال دى
....
بس كنت عايشة مأساة المحروقة هندسة مع أخواتى ..و فى الاخر ..واحد فيهم خايف يتشغل علشان ناسى حاجات فى مادة الخرسانة
بس اهو ربنا سترها عليه و اشتغل ..
...
أنا بقول لكل شاب و فتاة :
على الثانوية على أبوها يا عيال
بلا هم و غم ..

fanan fa2eer said...

والله يا محمود الكلية دي علمتني حاجة مهمة جدا

لو حد من عيالي في يوم من الأيام وقالي عاوز أدخل الكلية دي
يضرب بالجزمة وأفهمه غلطه
وبعدين لو حب يدخلها بعدين يبقي ذمبه علي جمبه
:)))

وأنا هاتفق مع والد العيال ان شاء الله اننا نسرحهم في الشوارع
ولا اننا ندخلهم الكلية دي

كل الدكاترة بتحاول تؤكدلنا
اننا حشرات ان لم نكن طفيليات ومالناش أي لزمة في الحياة لا دلوقتي ولا بعدين
نسيوا أنهم في يوم من ا؟لأيام كانوا زيينا
تفتكر لما نكبر وربنا كتبلنا أننا نكون حاجة هنعامل الناس كدة؟
أصلهم بيقولوا كل الدكاترة لما ربنا بيكرمهم بيتنططوا علي الناس

بلا هم يابني خدنا ايه م المذاكرة ووجع القلب
كله يتجه الي المهن اليدوية ونقاطع التعليم ايه رأيك؟
وهو اللي في البلد دي نظام تعليم ده؟
اسكت يا شيخ الواحد هيطق

yasmine Bashaar said...

ده بيوضح ليه الدكاترة بقوا بيستغلونا ... وايه المشكلة لما يشخص المرض غلط ... وايه المشكلة لما يسيبك لحد لما تفرفر... هى دائرة مغلقة الدكاترة فى الكلية بيقهروا الطلبة والطلبة يقهروا المرضة

على فكرة انا عن ما برتحش للدكاترة فى مصر وبروحليهم فى الشديد القوى بس ... من كتر اللى بسمعه عليهم ... وان الواحد يدخل بمرض يطلع بتنين

انا عاملة بلوج جديد ادخلوا وقولولى رايكم

نهى جمـال said...

فكرتني بأم مجموعي أيام الثانويةالوحششششششش من راي التنسيق طبعا والتعليم المتميز جداااا
لاول مرة اكتشف ان ما تحت الـ 97% فاشل فاشل فاشل

لأ وخدتها من قصيرها ودخلت تجارة الصين الشعبية بـ 91% ههههه جنان أزلي

يابني طب مين ده كله بطيخ في البلد ديه
وعلى فكرة الجملة ديه بتتقال في كل كلية
-----
تخيل كل يوم الصبح تروح تقعد قدام دكتور أقرع و بنضارة بيقولك في وسط الشرح إنك لا شيء , و حتتخرج لا شئ و حتفضل لا شيء و أول الإحساس بالشيئية عندك هو بعد الحصول على الدكتوراة أو المعادلة الأجنبية
-----
زي ما يكون دخولنا الجامعة كان سلفية منهم

غير إن احنا بقى كنا كلية تعامل مع نفسك الملغي هيجي في الامتحانات واتفلق والدنيا زحمة ومش من حقك تعترض وافهم مش مشكلتنا ايه يعني يبقى فيه خمس ألاف طالب في مدرج لا يسع أكتر من الفين

ديه رفاهيات طلبة مدلعين

لا واللي كان يقهر دكتور يقولك انتوا سبب بوظان نظام الكلية هههههه


عادي بقى عيش يعني

أنت في بلد التعليم الغير معلم

بس أجمد ما في الموضوع الصورة

محمد الهنداوى said...

طيب يابو عزت دى مشاعيرك وانت لسه تلموذ فى البكالوريوس
تقول ايه على اللى فى التكليف بقاله سنه ونص
اكيد هتقول حاجه مش ولابد
اسكت يا عم الحاج بلا نيله خلينا ساكتين
انا فاكر مره واحد قال للدكتور فى راوند الجراحه انت سيادتك ليه بتجيب امتحان الراوند صعب؟ انت قاصد تضايقنا؟
قاله فيما معناه يعنى يابنى انت مين اللى هفكر اضايقه دانت صرصار
هذا والله اعلم
والسلام عليكم ورحمة الله

kafrawy said...

ياعم اهى كلها ايام و بتفوت

ماتزعلش نفسك يادكتور

_امال لو جيت طب بيطرى هاتعمل اية

wael said...

يااااااااااااااه حمدلله على سلامتك يا جدع فينك من زمان
مالها الكليه يا محمود اعترض على مجانية التعليم مهو لولا عبد الناصر ماكنتوش شفته التعليم
ال مجانيه ال ياعم سيبها لله وسيب الواد يدخل اللي عايز يدخله

summar said...

عندك شوية حق
هو نظامنا غلط فى حاجة واحدة..انه مابيدربش اى طالب على اى حاجة
حتى فى هندسة اللى مفروض فيها تدريب صيفي..صدقنى محاضرات نظرى..ويوم مايتشمللو اوى يطلبو مننا لوحات
تعتبر برده مافيهاش اى حاجة..
والنظام برده غلط فى حاجة
انه بيدخل اى حد فى اى حتة لمجرد انه جاب المجموع
يعنى لازم هندسة مايدخلهاش الا حد عدى من اختبار لازم يعملوه قبل الكلية
عندنا فى اعدادى مادة اسمها وصفية..والرسم الهندسي .
دول بيعتمدو على التخيل..لازم تتخيل الشكل اللى بترسمه واللى ممكن فى يوم لما تبقى مهندس كبير تعمل ديزاين لواحد زيه..
للأسف الطلبة علشان اصلا معندهاش قدرة على التخيل وقليلين اللى بتلاقيهم فعلا متخلين الحاجة
دلوقتى تلاقيهم عاملين خطوات محفوظة للرسم..الاول كذا وبعدين كذا
حتى الامتحان نفسه مايتحلش الا لو مشيت بطريقة الخطوات اللى اى حمار برة ممكن يحفظها ويمشيها
لو مشيت بالتخيل وقعدت تمخمخ فى الرسمة هتشيل المادة
..
مفروض يعملو اختبارت قبول فى الكليات اللى زى كده
وعلى الاقل يعملو فى هندسة دور تانى فى سنين النقل..علشان حكاية الدبلرة دى..والله يابنى بنشيل المواد على حاجات عبيطة وتدخل تانى سنة بتبقى مذاكر وفاهم بس ناقصك حتة مثلا..تخيل لما تعيد السنة على الحتة دى..تكون نسيت باقى المهنج اصلا
..
المفروض بقى اللى يدخل اى حتة حتى لو دخل السجن..ياخدها من اولها جد.علشان مايدبلرش..وعلشان يلاقي وقت لهواياته ومايدفنهاش زي مانا عملت...وعلشان مايكتئبش زى مانا عملت برده
انا عملت كل حاجة فى هندسة دى والله
..بوست جميل

bliatsho said...

على ذكر المسخرة دي احب اشارك الجميع بقصة ظريفة حصلت في مشروع تخرجي من كلية الهندسة .. كنت مسئول عن رسم لوح الاوتوكاد للمكنة/المشروع و الدكتور من اول لحظة استلمني و قعد يطلع القطط الفاطسة في اللوح و على حاجات غريبة جدا و هايفة جدا .. في النهاية قالي اني مبعرفش ارسم و طلب مني اروح عند معيد في الكلية حيعملنا الرسومات بالمبلغ اللي حتفق عليه معاه ، و اكد ان المعيد ده حاجة عظيمة جدا و ده رسوماته فظيعة و رائعة و ملهاش اي حل .. رحت عند المعيد و اتفقنا على مبلغ ضخم - 2500 ، الفين و خمسمئة جنيه مصري بالتمام و الكمال ! - مقابل انه يطلعلنا اللوح ..
تفتكر ايه اللي يحصل بقى ؟ تطلع لوح المعيد اللي استلمناها قبل المناقشة بيومين بالظبط اي كلام .. و لوحي افضل منها بشهادة كل البني آدمين اللي شافو الاتنين .. و دخلنا المناقشة ، و الدكتور اللي بعتنا للمعيد هو اللي هزقنا على ذات الرسومات اللي كان عمال يحلفلنا انها احلي من رسومات بيكاسو ، و كان هاين عليا انط و اقفش في زمارة رقبته او اشنقه من الجرافتة اللي كان ﻻبسها !
و كل مناقشة و انتو طيبين ..

...

بالنسبة بقى لموضوع هندسة بتعلم التفكير فدي نكتة حقيقية .. تفكير مين يا جدعان .. انا فاكر ان العيال ايام امتحان الكنترول كانو بيسمعو معادلات و يرسمو نظم تحكم محفوظة صم .. لكن مكانش فيه بني آدم محترم فيهم يقدر يقولي معنى اللي هو بيكتبه ده ايه ! هو حافظ شقلة معادلات و رسومات و كان الله بالسر عليم !

انتو شكلكو بتتعلمو في كوكب تاني باين !

Anonymous said...

أعرف أن تعليقى هذا سيوصف بالمثالية , ومن بده فى النار ليست مثل الي يده فى المية ومثل هذا من الأمثلة الشعبية الدارجة و المتبادلة بين الشعب المصرى. نعم أنا مصرى مقيم فى أمريكا , ولكن متى سنرى الشباب و الشابات المصرية يبدأوا فى الاعتداد بالنفس ويدرسوا ما يحبون وليس ما يحبه الأهل و الأصدقاء و المعارف؟ ان أحد مشاكل مصر هو أننا قصيرى النظر وننظر الى الأمد القصير , و نرضى الميول التجكمية المتمكنة من الكبار و الميول الائعتمادية من الشباب و الشابات على الأهل . كل جيل عليه أن يخلق آماله ولا تعيشوا آمال الآباء و الأمهات. مصر تسير فى تدهور مستمر بسبب هذه الدائرة المفرغة من الخواء, الآن على أن أخبركم بأننى والد لشابين فى أعماركم , و صدقونى عندما أخبركم بأن كل منهم درس ما يريد و ذهب الى الجامعة التى يريدها , و انا و الوالدة نساعد و ربما ببصح فى مناقشات نعرف جيدا أن معظمها لن يلتفت لها , ولكننا نؤمن بأن عليهم أن يرتبوا المرقد الذى سيناموا عليه ولن نعيش حياتهم . أنا أعرف مدى الضغط من ألأهل وأسعد جيدا عندما أرى أحد أقاربى يتحدوا الواقع و يقدموا على دراسة ما يحبوه - و سعداء أن يعيشوا حياتهم ينشدوا المذيد منه , هل ما حولكم يستحق الحفاظ عليه و اعادة انتاجه؟ وكيف سيتمكن الجيل الجديد من مجابهة المشاكل التى تراكمت من الأجيال السابقة و كيف ستجدوا الأفكار و العتداد بالنفس لاءجاد حلولا لها. أرجو لكم التوفيق وبلوغ أمانيكم.

nael said...

ههههههههههههههه
والله دكتور جامد اللي رفض اعتذار الطالب بتاعه دا
بيتعامل بمنطقية رهيبة
انا اسف يا محمود اني حبيته لو انت كنت عاوزنا نكرهه

:)

عموما تدوينة دمها خفيف جدا

تحياتي

mohamed hesham said...

قلبت عليا المواجع والله ...
أنا برضه جبت مجموع ودخلت اللي تنحرق هندسة بترول وتعدين ... بس تعرف !! الواحد بيصبر نفسه وبيقول يمكن لما يتخرج ربنا يعوضه عن البهدلة دي بشغلانة كويسة بدل ما هو مضيع كل الوقت ده من عمره كان زماني ظبطت في شغل زي بقية اصحابي في تجارة واداب ... وبرضه الناس اللي في كليات تانية بيحسدو الواحد علي اللي هو فيه ... يظهر ان مافيش حد راضي بحاله ... أو كل واحد بيبص للحاجة من بره بس ...

بس بصراحة بوست أكتر من رائع يا دكتور ...

والسـ ختام ــلام

محمود ماجد said...

جيت على الجرح يا حاج محمود ، ووجعت قلبي اكتر ما هو موجوع

Anonymous said...

ابو طب علي ابو هندسه علي ابو صيدله علي ابو اعلام علي ابو اداب

Anonymous said...

情趣用品,情趣,情色,成人,A片,自拍,情趣用品,情趣,色情,成人影片,色情影片,免費A片,情趣用品,情趣,成人網站,A片下載,日本AV,做愛,情趣用品,情趣,美女交友,A片,辣妹視訊,情色視訊,情趣用品,情趣,色情聊天室,聊天室,AV,成人電影,A片,情趣用品,情趣用品,情趣,情趣

情色,A片,AIO,AV,日本AV,色情A片,AV女優,A漫,免費A片,A片下載,情色A片,哈啦聊天室,UT聊天室,聊天室,豆豆聊天室,色情聊天室,尋夢園聊天室,080視訊聊天室,080聊天室,080苗栗人聊天室,免費視訊聊天,上班族聊天室,080中部人聊天室,視訊聊天室,視訊聊天,成人聊天室,一夜情聊天室,辣妹視訊,情色視訊,成人,成人影片,成人光碟,成人影城,自拍

情趣用品,A片,AIO,AV,AV女優,A漫,免費A片,日本AV,寄情築園小遊戲,情色貼圖,色情小說,情色文學,色情,色情遊戲,一葉情貼圖片區,色情網站,色情影片,微風成人, 嘟嘟成人網,成人,成人貼圖,18成人,成人影城,成人圖片,成人影片,UT聊天室,聊天室,豆豆聊天室,尋夢園聊天室,080聊天室,080苗栗人聊天室,080視訊聊天室,視訊聊天室

情趣用品,A片,aio,av,av女優,a漫,免費a片,aio交友愛情館,a片免費看,a片下載,本土自拍,自拍,愛情公寓,情色,情色貼圖,色情小說,情色文學,色情,寄情築園小遊戲,色情遊戲,嘟嘟情人色網,一葉情貼圖片區,色情影片,情色網,色情網站,微風成人,嘟嘟成人網,成人,18成人,成人影城,成人圖片,成人貼圖,成人圖片區,成人小說,成人電影

情趣用品,情趣用品,情趣,情趣,情趣用品,情趣用品,情趣,情趣,情趣用品,情趣用品,情趣,情趣,情趣用品,情趣用品,情趣用品,情趣用品,情趣用品.情趣,情趣,情趣,情趣,視訊聊天室

麻將,台灣彩卷,六合彩開獎號碼,運動彩卷,六合彩,遊戲,線上遊戲,cs online,搓麻將,矽谷麻將,明星三缺一, 橘子町,麻將大悶鍋,台客麻將,公博,game,,中華職棒,麗的線上小遊戲,國士無雙麻將,麻將館,賭博遊戲,威力彩,威力彩開獎號碼,龍龍運動網,史萊姆,史萊姆好玩遊戲,史萊姆第一個家,史萊姆好玩遊戲區,樂透彩開獎號碼,遊戲天堂,天堂,好玩遊戲,遊戲基地,無料遊戲王,好玩遊戲區,麻將遊戲,好玩遊戲區,小遊戲,電玩快打

麻將,台灣彩卷,六合彩開獎號碼,運動彩卷,六合彩,線上遊戲,矽谷麻將,明星3缺一,橘子町,麻將大悶鍋,台客麻將,公博,game,,中華職棒,麗的線上小遊戲,國士無雙麻將,麻將館,賭博遊戲,威力彩,威力彩開獎號碼,龍龍運動網,史萊姆,史萊姆好玩遊戲,史萊姆第一個家,史萊姆好玩遊戲區,樂透彩開獎號碼,遊戲天堂,好玩遊戲,遊戲基地,無料遊戲王,好玩遊戲區,麻將遊戲,好玩遊戲區,小遊戲,遊戲區,電玩快打,cs online

情趣用品,情趣,A片,AIO,AV,AV女優,A漫,免費A片,情色,情色貼圖,色情小說,情色文學,色情,寄情竹園小遊戲,色情遊戲,AIO交友愛情館,色情影片,情趣內衣,情趣睡衣,性感睡衣,情趣商品,微風成人,嘟嘟成人網,成人,18成人,成人影城,成人圖片,成人貼圖,成人圖片區,UT聊天室,聊天室,豆豆聊天室 ,哈啦聊天室,尋夢園聊天室,聊天室尋夢園,080苗栗人聊天室,080聊天室,視訊交友網,視訊