27 June 2007

أنا بزدريك يا سيد



حصريا , و لجميع الأمامير الحلوين الذين كانت تصيبهم نوبات الصرع إثر الحديث عن قضية إزدراء الأديان و البهائيين و القرءانيين إلخ
اليوم كتبت المصري اليوم عن أحد المحامين _وهو مسلم بالمناسبة _ الذي قدم بلاغا ضد الشيخ محمد حسان , يتهمه بإزدراء الدين المسيحي إذ ينعت الإنجيل _في شريطين بعنوان تحريف الإنجيل و قصة الصلب _ : بالكتاب الجنسي الذي يتقزز منه و يخاف لو إطلعت زوجته على ما فيه من مشاهد ساخنة و أن به كلام أقذر و أخطر من كتب السوق الجنسية...إلخ
وهو كلام ليس بالجديد إذ يقال كل أسبوع بشكل أو بآخر في خطب الجمعة و في شرائط الشيوخ الأجلاء بكل صراحة و وضوح

أنا عايز أقول التالي وأنا قلت لكم قبل كده إني مسلم منفتح و متأقلم و متعايش و لازم أقترح:


1
أول حاجة طبعا عايز أقول إن تهمة إزدراء الأديان هي عباة عن خازوق يمكن توجيهه إلى الجميع , إلى المسلم وهو يتلو قرآنه ضد اليهود و النصاري و ضد النصراني وهو يتلو إنجيله ضد آخرين و ضد الفقيه الذي اجتهد و أخطأ و طالب بتهميش السنة لا لأنها مثلا عديمة القيمة أو أن الرسول لم يكن مؤهلا لأن يكون كلامه مصدرا للتشريع و لكن لما طالها من تشويه و تزييف بحسب ما إنتهى إليه في بحثه و رأيه ويمكن توجيه التهمة ذاتها لكل صاحب فكر يخالف أي صاحب فكر آخر في يده سلطة تحريك دعوى الإزدراء...
و بالتالي أهنئ كل من ولولوا في قضية كريم عامر و القرآنيين بأنهم يستحقون الحبس و العقوبة , فبتشنجهم قد يسجن الشيخ محمد حسان بالتهمة ذاتها إذ على ما يبدو التهمة متكاملة الأدلة و التوصيف..يعني بصلاة النبي كده محدش بعد كده حيعرف يقرا القرآن لإن أي حد ممكن ييجي يقوله إنت بتزدري بيه النصارى يا عديم الأديان...



2
المفروض إني كمسلم أؤمن إن الإنجيل تمت كتابته على يد حواريي المسيح...لكني تعلمت أيضا _ كمسلم مؤدب إبن ناس _ ألا أسخر من أي جزئية أو تفصيلة صغيرة فيه لأنها قد تكون من الكلام الإلهي الذي وصل للحواريين على لسان المسيح..و بالتالي لا يمكن لأي مسلم _ متسامح و مؤدب و منفتح و متعايش_ أن يسخر من كتاب المسيحيين بأي شكل من الأشكال , حتى تلك الأجزاء التي يتم فيها تقديس المسيح و العذراء لأن ذلك سيندرج تحت باب التجريح و قلة الأدب ضد الأخر وهو إن كان من الممكن التغاضي عنه بالنسبة للعامة على المقهى أو في الغرز فلا يمكننا تجاوزه بالنسبة لعلمائنا الأجلاء الذين وجعوا دماغنا على المنابر ليل نهار بإننا يا جماعة دين تسامح و دين حب و دين رحمة و عطف على الآخر...هو الآخر ده صحيح كافر بن كافرة و واجب نزدري دين أمه , بس يا جماعة مين قال إن الإسلام دين عنف...مين بن المزدرية اللي قال الإسلام دين عنف ده و إحنا نزدري دين اللي جابت أمه ؟
طبعا الناس حتقول ده كان بيقوله في مسجد و في شريط ديني , ما الشريط ده عامل زي الكتاب أو المقالة أو البلوج..علني و يباع في الأسواق , أمال الناس زعلت ليه طيب من المسرحية اللي كانت في الكنيسة و على سي دي بيتبادله المسيحيين ؟!!


3
مش معنى إني أكون إنسان مؤمن صريح و قوي و واثق من ديني إني أقول أو أعلن لجاري النصراني لو سألني مثلا عن رأيي في عقيدته إنه لامؤاخذة يا جرجس إنت عارف إني بحبك و الإسلام زي ما إنت عارف برضه دين سماحة و السماحة في القلب أي والله في القلب بس إنتوا عالم كفرة و ده اللي ربنا قاله الله يحرق دين أبوكم ده إنجيلكم ده فيه و فيه ...
أصل حييجي واحد يقولك إيه : أمال يا حوكة يعني نغير ديننا يعني ؟
نقول إن إنجيلهم مش محرف !
نكذب يعني عشان يحبونا
و أقول للأخ أعلاه : لا طبعا ما تكذبش بس إنت تقدر تقول رأيك في الإنجيل بشكل أكثر إحتراما لو كنت بتدعي إن دينك دين رحمة و رأفة بالناس و قائم أصلا على فكرة إتمام مكارم الأخلاق و من آذى ذميا فقد آذاني _ عارف إن فيه بشر حتيجي تقولي دول ما بقوش ذميين خلاص يا عم الشيخ بس ده حسيبه لضميره الحي يزدريه في أفكاره بينهم و بين بعض _ ,و انقد زي ما إنت عايز ياعم المؤمن بس مش لازم نقدك يتضمن إهانات...وإلا متزعلش لما حد يسب دينك إنت راخر بكل قوة و إيمان و ثقة و ثبات لإنه مؤمن بدين آخر


بصوا يا جماعة
بما إن الحكومة بدأت تستهبل و حتحبس الجميع بتهمة إزدراء الأديان
اللي عايز يزدري بعد كده يروح يزدري قدام بيتهم
و محمد نبي و عيسى نبي و موسى نبي و كل من له نبي يصلي عليه


15 comments:

سارة بنت الدشناوي said...

اولا موضوع جميل جدا و مهم جد جدا و في ألف حاجة ممكن تتكتب هنا بس انا حعفيك من تسعمية و شوية كدة و اقول الباقي

اولا ربنا سبحانه و تعالي نهانا في كتابه الكريم اننا نشتم اديان الكفرة اللي اسمهم كفرة عشان ميشتموش هما ربنا و نبقي احنا اتسببنا في ده

ثانيا بقي انا في جملة غريبة جدا و مش قادرة استوعبها خالص، ازاي يعني الانجيل يكون فيه كلام يكسف مراة الشيخ انها تقراه ، ايه العبث ده؟ مش ممكن يكون الكلام ده مظبوط ، انا مقريتش الانجيل كله بس فتحت في كدة علي خفيف و مشوفتش حاجة كدة

الحاجة الأهو بقة ان احنا اصلا مش محتاجين لا نشتم حد و لا ننقض دين حد ، احنا طالما واثقين و الحمد لله في دينا مش محتاجين اننا نثبت صحته بأن غيره غلط بالعكس بقة دا احنا الدين السماوي الوحيد اللي اعترف بكل الانبياء و لم ينكر علي احد نبيه ، اليهود انكروا عيسي عليه السلام و محمد (ص)و النصاري انكرونا ، اما بخصوص التحريف فاحنا لم يصلنا عنه إلا فيما يخص الوهية المسيح و نكران محمد او بمعني اصح ما يخالف نص قرآني صريح اما غير كدة فمفيش واحد يجرؤ يدعي بطلان أو صحة اي حرف زيادة لأن الانجيل اغلبه قصص و سير و تفاصيل عن الحياة ايامها بالاضافة للتعاليم طبعا و احنا قصة سيدنا عيسي زي باقي القصص جت في القرآن عشان العبر اللي فيها و في حاجات كتير منعرفهاش عنه و مش مهم ندور فيها و بعدين انا مش عارفة ليه الشعب بقي هايف كدة من الجانبين و شاغلين نفسهم بقضايا تافهة و فاكرين انهم لما يقفوا يردحوا للنصاري او اليهود يبقوا بيدافعوا عن الاسلام ، يعني يا نرمي مدافع يا نرمي كلام المهم نرمي و خلاص و نزعل بعد كدة لما يقولوا العرب ارهابيين
بس الحقيقة اللي حتزعل مني ناس كتير ان فعلا احنا فينا همجية بدوية الاسلام لما جه صلحها و هذبنا و دخل فينا السلام و لما بعدنا عنه روح القبلية و التخلف سيطرت تاني ، اللي عايز يدافع عن دينه يعبد ربنا و يشتغل عدل و يدعو الي الله بالحسني و بأخلاقه و كفاية كدة بقة رغي و تصديع لدماغك بس بجد يا محمود بهنيك علي الموضوع

عمرو عزت said...

أعتقد الموضوعات الجنسية موجودة في العهد القديم " التوارة " مش الانجيل , لكن ساعات مشايخ المعايرة بالاديان - مش مقارنه الاديان - بيقولوا الكتاب المقدس و خلاص.

ثانيا : اتمني القضية تتطور و تبقي جد علشان الكل يعرف ان الكلام لما يبقي ممكن ناخده للمحكمة , يبقي الكل في خطر

ثالثا : احب انوه ان موضوع " محمد نبي و عيسي نبي .. " ده فعلا لازم يبقي نص قانوني و دستوري ما دام الموضوع وصل في النيابة لـ " ما إذا كانوا يصلون السنة " .

wael said...

عارف يا محمود يحضرني موقفين
الاول : واحد في عيد من اعياد المسيجين مش فاكر كان انهي كان بيوزع ورق علينا في السيكشن مكتوب فيه ما حكم تهنئه الكفار في عيدعم انا بجد مش فاهم يعني ايه احساس واحد زميلنا مسيحي وهو بيقرا ورقه زي دي
التاني : واحد بيوزع كتب دينيه في الراوند بالغلط واحد مسيحي اخد فالولد المسيحي بمنتهى الزوء وببتسامه لذيذه رجع الكتاب وقاله معلش انا مسيحي راح الاخ رد عليه وقاله يا عم خده ممكن ربنا يهديك
المهم مش اتفقنا لما تكتب موضوع كبير تكتبلي الخلاصه في الاخر؟

smile rose said...

الاستاذ محمود
عندك حق ازدراء الاديان كلمة مطاطة ولا اعرف للان لها اى معنى
وقد اتهم البهائييون فى قضايا سابقة بهذه التهمة ثم تعلن برائتهم بعد ذلك لان البهائيون لا يكفرون احد بل يؤمنون ويحترمون كل الاديان وقد نشرت فى مدونتى مقال للسيدة سحر الجعارة نشر بالمصرى اليوم عن موضوع مشابه ممكن قراءته هنا:
http://basmagm.wordpress.com/

مصطفى عزت said...

الله يخربيت فقرك يا محمود بس على فكرة انت كنت بتزدرينى وانت بتكتب الموضوع دة وانا كنت بذاكر جنبك .....

bluestone said...

ضحكتني بجد .. بس مع اعتبار ان "اقسى همومنا تفجر السخرية"
حاجة سخيفة بجد ..
يظهر ان النضال اللي جي بعد حرية التعبير عن الرأي هتبقى حرية الازدراء :)
وطبعا الحكومة ما هتصدق .. تزايد على الدين وتعمل فيها حامية الرسالات السماوية ..
بس الكيل بمكيالين هيفور البيعة كلها

التهمة سخيفة ومطاطة جدا .. لكن افتكر ان الشيخ الأبيح ده ممكن تنفع معاه تهمة السب العلني ..
المشكلة في الدماغ الخربانة دي وغيرها أنهم مش قادرين يفهموا حاجة مهمة جدا ..لألأ حاجتين

أولا: ان جوهر عقيدة الواحد تقوم على خطأ الآخر (أو الآخرين) .. يعني يا محمود ايه اللي خلاك مسلم هو انك شايف ومؤمن بان الاسلام هو الدين الحق وبان المسيحية واليهودية وغيرها من العقائد خاطئة وغير صحيحة

ايه اللي خلاني يا بت يا بلو مسيحية .. هو اني شايفة ان الطريق إلى ربنا هو الخلاص والفداء وان المسيحية تكمل اليهودية وانه لا يوجد اي حاجة لاي اديان أخرى بعد المسيحية وكلها معتقدات خاطئة ..

أليس هذا الكلام من جوهر المعتقدين
المسيحية والاسلام
وطبعا الأخوة اليهود ليهم أراء أخرى
والأخوة البهائيين ليهم حوار تاني خالص
مع استبعاد البوذيين والدروز لانهم مش موضوعنا

اذن لابد وان يفهم هذا الشيخ ذو العقل البطيخ انه كما يعتقد هو بهذا العنف في تحريف الانجيل .. سيجد مسيحي في الشارع اللي وراه لديه مطلق الحق في ان يعتقد ان الاسلام محض ادعاء .. وكلام تاني وحش مايتقالش ..

وانه (هذا الشيخ) وهو يتقلب ويتلوى سبا في الانجيل يعطي الحق لمسيحي محدود الفكر بطيخي العقل ان يسب في الاسلام ويصول ويجول سبا فيه وفي نبيه ..

ونسيب البلد تولع .. وتتحول المعتقدات اللي المفروض تهذب نفس الانسان إلى مجرد ذرائع لارتكاب العنف
ودمار الدنيا

الحاجة التانية: هي انهم ميعرفوش يعني ايه احترام الآخر في حالة الاختلاف ..
ودي مصيبة كحلي مكحلة بزفت
يعني طبيعي جدا أن نختلف .. :)
طبيعي جدا ان يكون هناك معتقدات وايديلوجيات وافكار واتجاهات وتيارات مختلفة
ولا يعني اني احترم محمود (المسلم) اني اؤمن بالاسلام
ولا يعني احترام محمود لي سعي خالص للتنصر

التحضر والاحترام لا دين لهما
تحياتي

أحمد الشمسي said...

وبعدين معاك؟
كل مرة آجي هنا أطلع مبسوط؟
انت مش بس مسلم منفتح ومتعايش ومتأقلم!
انت كمان بني آدم ذكي!
روح يا شيخ يخرب بيت اللي "يزدريك"!

e-nadaha said...

زمان..ايام ما كنت لابسة نقاب..
كانت جماعتى تستغرب من طنط مارى..
اصل طنط مارى كانت حبيبتى اوى..اكتر حد كنت بحبه..
يمكن شافونى مستهتره دينيا ساعتها..
بس انا كنت شايفانى طبيعية..ولو على السنة..فاللى معترض على دين ابو حد تانى مش فاهم حاجة فى البطاطس..
حتى البطاطس ممكن تدخل المحكمة ساعتها..مين عارف!!

زهرةٌ زرقاء said...

أحلى حاجة هنا بجد يا محمود نطلعوا بيها "محمد نبي عيسى نبي موسى نبي وكل من له نبي يصلي عليييييه" :)
ده طبعاً لا ينفي إننا ف مصيبة بالتفكير "الازدرائي" ده
على فكرة واضح الكلمة دي هتنتشر بسبك زي أيام ما انتشر مصطلع الشفافية !

المهم ما علينا..
هو اللي حصل في المجلس الأعلى مش كان ازدراء للي بيكتبوا شِعر بردو؟

حاجة تغُم يا شيخ!
ربنا ما يوقعنا ف حد يزدرينا
..

Ert3ashat said...

بوست جميل...
و يا محمود مفيش علاج لو حد ازدردى على روحه
و هل ده يعتبر تهمه :D:D

Anonymous said...

ازايك يا محمود شوف انا سمعت عنك كتير بس عمري ما شوفتك او حتي قريت ليك حاجة واعتقد انك بارضوا سمعت عني والله اعلم
المدونة بتاعتك حلوة وانا موت علي روحي من الضحك اول ما قريت عن مشروع البطيخة يا سلام لما يعيش لبني آدم 25 سنة من عمرة مش عارفة اهمية انه يعطف علي البطيخ عموما اول فكهاني يعدي علي بيتنا هكتب علي ضهري ع السكين
بس علي فكرة في شوية افكار ممكن نبقي نتناقش فيها اذا حصل نصيب وشوفتك لاني مختلفة شوية معاها ودة علي كل الموضوعات
دعاء فتوح

أحمد عبد اللطيف said...

مع احترامي للآرائكم جميعا التي أعجبتني بعضهاأحب أن أبين ألأن سب ديانات و شعائر الآخرين ليس منهاجا إسلاميا و ليس منهجا للشيخ محمد حسان بالذات

لذا

لن أرد قبل ما اسمع الشريطين

spellz said...

حلوة القفلة بتاعت الموضوع
حاجة زبالة يا شيخ

الناس دى هتخلى المؤمنين بأى دين يكفروا عشان يخلصوا من تشددهم

mohamed hesham said...

عداك العيب و أزح ...

Egyptian citizen said...

انا مع احترام اي عقيدة او طائفة
((احترامك لنفسك يبدء باحترامك للاخرين))