02 June 2007

دوالي التنين في زواج الملتزمين



هذه الأيام موضوع الخطوبة أو الإرتباط عموما هو الشغل الشاغل لغالب الزملاء و الأصدقاء بشكل جعل الحديث عن الموضوع يتخذ شكل تراكمي , فلم نعد نناقش الأفكار أو الحيثيات و إنما الأخبار و المستجدات , اللافت في الموضوع و بما أن غالب أصدقائي هم من الملتزمين دينيا رضي الله عنهم و أرضاهم فالمشكلة الدائمة تتركز في :
كيف يمكنك جس النبض و استكشاف الجوهرة المكنونة و الدرة المصونة التي تبرطع في البطين الأيسر ؟

المشكلة كالتالي : الشاب الملتزم في الغالب ليس لديه علاقات عميقة بالجنس الآخر..أو ليس لديه علاقات على الإطلاق ..ذلك يتوقف على المساحة الحرة في عقله بعيدا عن الفكر الإسلامي البدوي المعروف بالسلفي ...
وهذه الكارثة الأخيرة " الفكر السلفي " تنطوي على أكبر نكبة في الإسلام تلي دخول التتار قصر الخلافة في بغداد , فبعد أن تمت أسلمة التقاليد البدوية و تنصيبها أسسا و قواعد فقهية و دينية , تم ما يشبه الحظر الجوي و البري و البحري على كافة أنواع الأفكار أو الآراء لتطوير هذا الدين المسمى بالإسلام ..
التفصيلة الأولى طبعا تتعلق بتطبيق هذه التقاليد البدوية في مجتمع حضري , و ينشأ عن ذلك غالبا فتاوى مثل إرضاع الكبير و تحريم الاختلاط أو بمعنى أصح "الإحتراز من أي تاء مربوطة حولك في مساحة نصف قطرها 12 كيلو متر " أما التفصيلة الثانية هي الإرهاب المستمر ضد أي محاولة لإنتزاع الإسلام من " إسلام شبه الجزيرة " إلى " الإسلام و فقط "....أنا هنا طبعا أتحدث عن الفكر السلفي " الأصلي " _ الناس الشديدة مش اللي تراجعوا عن مواقفهم بشأن التلفزيون و لبس البنطلون و حكم الصور الفوتوغرافية _
قلت سابقا أن الفكر السلفي له ألف سبب في ذيوعه الفاحش , أنا هنا فقط أريد أن أضيف أن أسوأ ما خلفه الفكر السلفي بصدق هو :
جيل كامل من الملتزمين يحاول قدر الإمكان ألا يكره دينه وأن يجمله بشتى الصور كأن الإسلام عبارة عن خيمة مُرقــّـعة علينا أن نقنع العالم أنها الإمباير ستايت
فنتحدث عن سماحة الإسلام كأنها فضل مستحب أو إكتشاف جديد , أو نوع من الميك أب الذي لا نثق فيه لأن كتب الفتاوي و أمهات الكتب هي ظهرنا المكشوف الذي يمكن لأي أحد الإيغال فيه و فينا بكل بساطة...
في النهاية , الخيمة المرقعة التي تحدثت عنها ما هي إلا صورة ذهنية منقولة من الفكر السلفي , و أنا لا زلت أثق أن الإسلام في الأساس هو دين أرقى بكثير مما تراكم فوقه من المجلدات و الأسماء و الأحداث نفسها....


نعود لموضوعنا , الإخوة الأصدقاء و الزملاء دائما تواجههم المشكلة في أنهم من الأساس لا يعرفون أي شئ أن هذا الكائنات اللطيفة المفترض أن يرتبط كل واحد منهم بواحدة منها
إزاي حيكلمها طيب و فين و إمتى
الولد ملتزم و عمره ما كلم بنات ؟ و حيكلمها إزاي و هي بنت محترمة ؟ و حيقولها إيه أصلا ؟
نفقز من هذا إلى النقطة التالية :
أنا مش عايز أخش بيوت و بعدين البضاعة متعجبنيش و أمشي...
يعني في النهاية غالب ما عبر لي عنه الإخوة الراغبين في رأيي في المسألة , أنهم مبدئيا لا يرحبون بزواج الصالونات و هو ما يقابله زواج الإقتناع و المعرفة...
و بماأن موضوع الخطوبة هي فترة تعارف _ كما كنت أتحدث أنا و عمرو و صديق له اليوم _ لم يعد له وجود أصلا...دخولك إلى بيت و جلوسك مع البضاعة يتم إعتباره من البداية إنك شاري الليلة , و خروجك يعني عدة تكاليف غير هينة يعاني منها صديق عمرو حتى الآن رغم أنه قال لأهل العروس من البداية أنه في فترة تعارف و لم يكون رأيا نهائيا بعد..
فماذا إذن يفعل جيش الشباب الملتزم المأزوم المصاب بالدوالي ...
لا بيعرف يكلم بنات
و لا عايز يكلم بنات
و مش عايز يدخل بيوت و يقعد يستكشف لحد لما يلاقي البضاعة
و مش مقتنع إن فيه بنت محترمة حترضى و توافق تديله فرصة يعرفها
بس في النهاية ...
هو بيدوّر على بنت محترمة برضه تديله فرصة يعرفها كويس


حتى الآن فيه ثلاثة تجارب أعرفها عن قرب:
الثلاثة أخبروني أنني شيطان بقرنين و ذيل طويل و أن أسلوبي عيب و حرام و ميصحش و بنات الناس مش لعبة
وإن مينفعش أروح للبنت أقول لها أنا عايز أعرفك الأول و تعرفيني عشان ما أدخلش البيت و أمسك في أبوكي في الأخر و أفتح دماغ أمه لما أقوله إني مش عايز بنتك و يقولي كلمتين مش لذاذ
وأنهم يعتقدون _ بفضل من الله و "نعمة" _ أن البيوت تؤتى من أبوابها خبط لزق
و ماحدث حتى الآن أن الثلاثة قاعدين جنبي لسه بينما "نعمة " إتجوزت و جابت حمادة و أشرف
أحدهم أخبرته البنت _التي طلب منها وسيلة إتصال مباشرة بالمالك الأصلي _ و صراحة ًأنه من الأفضل ألا يتوجه للبيت مباشرة و أن يتحدثوا معا بشأن الموضوع ...
فما كان منه إلا أن أصر على أن يقابل الوالد بدلا من أن يفعل مثل العيال المايصة _اللي هو أنا_ الذي يقابل خطيبته في الكلية و يتكلموا مع بعض و ناقص بقى يقولها كلمتين حلوين ما هو ده اللي ناقص
قلة أدب و قلة رباية وقلة دين
و هكذا ظل الثلاثة طالع دينهم إلى أن شاء الله و أقتنع واحد , أما التاني _ اللي بيروح على البيت على طول _ بدأ يقولي إن إسلوبي أنا هو اللي بيجيب نتيجة بس هو حرام و عيب يعني , و إن اللي بيعمله هو , هو الصح و الحلال و ربنا قال كده و يروح بعدها خابط دماغه في الحيط لحد ما تجيب دم !
حيعمل إيه يعني ؟
يكفر ؟
يقول إن اللي بيقول الناس إن ربنا قال عليه مش بيجيب نتايج كويس ؟
أما الثالث فخدها من الأخر و قرر أن يسأل و يطقّس عن الفتيات التي لهن سمعة حسنة إلى أن جاء في يوم من الأيام _ وأنا أحد مستشارية الزملاء في هذه المواضيع لا مؤاخذة _ و سألني الأخ عن خطيبتي و إن كنت أعرفها أم لا و هل أحسبها على خلق بل و أشاورله عليها من بعيد
طبعا قلت له : اللي بتسأل عليها دي تبقى خطيبتي يا نجم , قاللي سوري يا باشا أنا آسف مفيش مشكلة , طيب شوف لي الإسم ده عندك و النبي , خطيبتك هي كمان ؟
طبعا طلعت الأخرى مخطوبة لواحد تاني و صديقي لازال يحاول و ربنا معاه

طبعا فيه ناس بتحكي عن شباب بيروح يتقدم لواحدة مجرد سمع عنها خير و يقوم يلاقيها ليلة الدخلة من الحور العين و بعدها زوجة صالحة و يخلفوا قبيلة بحالها...
بس فيه ناس برضه راحت على السمع الخير و فقدت السمع و أشياء أخرى في النهاية
وهو ما يكرس لنظرية هامة في الزواج , نظرية البطيخة !
حمرة أحيانا , قرعة أحيانا و أحيانا نص نص و إنت و شطارتك مع أبوها و هو بيشق البطيخة قدامك في فترة الخطوبة..
ده غير نظريات حديثة قال لي عليها صديق بحبه والله بجد ممكن يقرا الكلام ده و يسب لي الدين أنا عارف بس معلش يا ريس و سامحني
وأهم هذه النظريات تتكون من المكونات التالية :
1_ عدد واحد أخت صالحة تسألك عن البنت
2_ عدد 2 جرانين مخرومة تراقب بيها البنت في المكان اللي بتشوفها فيه
3_ عدد 1 إمرأة حكيمة تقيم لك البنت و تقولك رأيها فيها
4_ عدد 2 ركعة إستخارة
و شد حيلك و توكل على الله
بس الفكرة إني معنديش إخوات بنات ولا قرايب معايا في الكلية و أنا محترم مش بكلم حريم في الكلية خالص و مفيش حد أعرفه ممكن أزقه عليها عشان يقيمها و محدش عارف التقييم ده حيطلع صح ولا لأ ولو رحت البيت و دخلت و إتكلمت أبوها و قلت له : سوري يا عمي , أنا مش في المود اليومين دول , أكيد حيقولي : نعم يا روح "*** " بعد ما شوفت و قعدت و إتكلمت و رغيت و شربت و طفحت ووو بتقولي يفتح الله !

فهل مينفعش خالص , خالص خالص يعني , إني أروح للبنت و أتكلم معاها بأدب والله , و قدام الناس في الكلية يعني حتى عمال النظافة حيبقى ليه الحق إنهم يعدوا بينا وإحنا بنتكلم و مش حنقول كلام عيب و لا حرام لإن أكيد البنت اللي حختارها مش متربية في خرابة مثلا , حتسمح لي أقول لها كلام عيب في مكان عام زي الكلية
أو حتى بلاش الكلية , نروح مكان فيه ناس كتييييييييير , ممكن يحطوا عليا لو قليت أدبي أو قلت كلمة عيب مثلا ولا أقصد هنا حديقة الأورمان أو سينما أوديون لا سمح الله و لكن أقصد مكان مكشوف محترم , الناس شايفانا فيه و مش حينفع الشيطان يكون تالتنا لإن ده ممكن يترتب عليه إن أنا و هي و الشيطان حنتلف بملايات , أما إن كانت العلة هو إنعدام النخوة في الشعب المصري بقاله فترة و ممكن يبقى تالتنا الشيطان و يجيب صحابه كمان معاه وبرضه محدش حيتكلم أو يمنعنا في المكان اللي إحنا فيه ففي النهاية كل شئ في الإسلام خاضع لفكرة الإختبار الشخصي أي الضمير الشخصي و كل الأفعال يمكن تحويلها من خير محض إلى باطل محض و العكس صحيح بناء على المقصد و النية و ما نعوّل عليه في النهاية هو بناء إنسان يحكمه فكرة الأخلاق و الضمير و المراقبة الذاتية كما يدلنا على ذلك نموذج المجتمع السعودي الذي لم تجِدِ فيه مطلقا فكرة الرقابة الجمعية و الحظر المفروض بسلطة العقاب و البلو توث على ما أقول شهيد و أقم الصلاة..


و في النهاية , أنا أقترح إقتراح يا جماعة
أنا شاب مسلم متفتح ولازم أقترح
عمرو خالد يعمل مشروع عبارة عن قاعات واسعة نسميها مثلا " بطاريات الخير " أو "مناكح الخير " يتم فيها التعارف بين الجنسين على أسس إسلامية , البنت تقعد وراء حجاب , ستارة مثلا و يبقى فيه حد مسئول يدي للشاب صورة البنت _ بالحجاب طبعا _ كنوع من الرؤية الشرعية و يقعد الواد و البت يحكوا من وراء حجاب و أخوها مثلا أو أبوها قاعد جنبهم , و يبقى فيه حرية إنك تقوم من أمام هذه الستارة إلى هذه الستارة بدون إحراج , لو صوتها معجبكش مثلا أو دماغها مش زي دماغك , و ممكن الموضوع ميبقاش فيه ستاير و الواد يقرب من البنت و يسأل أبوها اللي قاعد جنبها : بكم تبيع هذه المزة؟
فيقوله و يتفقوا و الواد يحدف له صرة من الدنانير ولو الليلة خلصت في ساعتها الواد يحمّل على أي عربية ربع نقل و يتوكل على الله...
ده لا يختلف كتير عن الزواج التقليدي اللي بيحصل في البيوت بس ساعتها حيبقى مشروع كبير متاح فيه التنقل بحرية و الإختيار الواسع على أساس عقلي سليم...

أهم حاجة طبعا زي ما قلنا النية و نسأل الله الإخلاص


تحديث
المفاجأة صحيح إن فيه ناس صدقت إني أبشر بـ "مناكح الخير " و بما إن فيه ناس فعلا صدقت الموضوع فأنا أقترح فتح باب المناقشة في كيفية تأصيل الفكرة بشكل منهجي و يسعدني اعتماد اقتراحات الأخ عمرو عزت و كذلك الدكتورة سبيلز , ألا و إن كل بدعة ضلالة و كل ضلالة في النار


43 comments:

محمد فوزي آل ربيع said...

لا مؤاخذة يعني كنت عايز أستفسر عن حاجة

هوا صاحبك الأولاني ده لما طلب الإتصال بالتوكيل بتاع البت و بعدين قالتله لازم نتحدث مع بعض ف الموضوع قبل ما يكلموا المالك ، يعني ما نزلتش من عينه مثلا؟

و لا قاللها : يبدو إني أسأت الإختيار يا أختي

عموما لقد تم توضيح ما كان مفهوما خطأ في ردي على البوست السابق

عمرو عزت said...

:)
:)
:)

علي فكرة يا شيخ محمود
القيادة العامة للسلفيين في امبابة أصدرت بيانا منذ قليل أن آل عزت خطر علي الخيمة , و الدنيا شمس هذه الأيام .
و تدعونا للتمسك بوحدة الوتد حتي يأتي الشتاء.

عمرو عزت said...

نسيت أوصيك تبارك لنعمة و تبوس لي حمادة و أشرف

و نسيت أقول لك إني خايف فعلا يطبقوا مشروعك ده

و لذلك أنا أقرح مشروعا آخر : " ضربة القدر " , يتم فيه استقبال طلبات راغبي الزواج و فهرستها و تصنيفها علي أساس علمي , و تجميع الذكور و الإتاث المتناسبين في مجموعات , و ثم ياتي شيخ جليل و علي الهواء مباشرة و يصلي صلاة الاستخارة و الاستسقاء ثم يمد يده و يختار لكل ذكر أنثي من المجموعة المناسبة , و هكذا يتم الأمر علي أساس علمي و قدري و الخيرة فيما اختاره الشيخ
بدلا من احراج البنات بعرضهن امام الذكور مما قد يترتب عليه تصويرهن بالموبايل لاستشارة الأهل و الأصدقاء , و بنات الناس مش لعبة .

يوسف said...

مش عارف ليه حسيت بالسخافة والرذالة والإستظراف الامتناهي في موضوع الظريف ده..

أنا أعرف ناس كتير -منهم أنا شخصيا- ملتزمين, وخطبنا من غير ماالشيخ يصلي صلاة استسقاء.. ومن غير ما نتكلم في الجامعة ومن غير برضة مانقعد ورا الستارة مع صرة الدنانير ياخفيف..

shaimaa said...

حلوه قوي فكره الستاره دي يا محمود
والاحلي بقي فكره صره الدنانير دي
بس مفيش في مصر دنانير سميها بقي صره الارباع المخرومه
وايه بقي اخبار نعمه والولاد؟؟؟

نهى جمـال said...

محمود مش عافرة فيه حاجات معاك فيها

وحاجات مستظرفتهاش

أولا الفكرة الأخيرة بتاعت المقابلة الجماعية واللي متعجبنيش انقل على غيرها مختلفتش عن الصالونات ده حتى أكثر جرحا للبنت

وبالعكس على الأقل الصالونات البنت مش هتحس بالاهانة قدام حد " على اعتبار ان عدم قبول العريس اهانة في رأي البعض " ـ

ثانيا فيه ملتزمين بيتجوزوا جواز بدون ما يعرفوا حاجة عن اللي اتقدملها وبيبقى ناجح بعد الاعتماد على ربنا
منقدرش نعمم

وبصراحة يعني مش مستوعبه ان فيه واحد ميعرفش بنات نهائي

طب مالهوش قرايب ، جيران ، أخوات صحابه

ماهو ممكن يطلب من صاحبه طالما واثق فيه انه يرتبط باخته

ثالثا أنا أصلا بتخنق من جواز الصالونات لكن أحيانا كتير بينفع


رابعا أصلا فيه شباب يعرف بنات كتير وعلى الرغم من كده مبيعرفش برده يرتبط باللي عايز يرتبط بيها أو أحيانا مبيثقش إلا في جواز الصالونات

يعني الموضوع ملهوش دعوة بتعرف بنات ولا لأ

الموضوع بيرجع في الأول وفي الأخر للنصيب

وإنت عايز إيه

صحابك ممكن يكونوا أصلا مش مقتنعين بالصالونات على الأقل بنسبة معينة
فبالتالي مبينجحش معاهم

بس كده

تحياتي لكَ

Alaa said...

مش فاهم أحنا ليه بنعقد على نفسنا حاجات أصلا بسيطة جدا

الناس بتتجوز بقالها ألاف السنين أكيد يعني عدينا في كل الكلاكيع المحتملة و لقينالها حلول خلاص

و مش "الملتزمين" بس اللي معقربينها، هي الطبقة الوسطى المصرية عموما قررت تخترع اختراعات تعقد الجواز و السلام و ربنا يشفي الجميع

الحاجة اللي أنا مش فاهمها ليه منتعاملش على أن الطلاق خيار متاح و مهواش نهاية الكون، ما دام أحنا مجتمع مش حابب فكرة تعميق العلاقات قبل الجواز يبقى البديهي أن الطلاق في السنة الأولى أو الثانية تزيد نسبته مش لعيب في الناس و لا في ازاي اتجوزوا لكن لأنهم بيكتشفوا بعض بجد في الوقت ده.

لكن اذ كنا عقربنا الجواز قيراط في الطلاق عقربناه 24 و مش هكلمك عن خلفة العيال

أحمد said...

طيب استفسار صغير
هو ليه البضاعة مش هى اللى تختار

يعنى الولاد هم اللى يبقوا ورا الستارة والبنات هى اللى تختار


أوووووووبـــــــــس
معلهش نسيت ان الاخوات بيتعرضوا لقطع الزنبور في سن صغيرة علشان البضاعة مش تتعب الأخ الراجل
-------------------- --

في اسئلة عندى اعمق بصراحة من الاسئلة بتاعتك انا بقي مش فاهم بعد كدا تجوزوا الحمد الله.. ازاى بقي بمارسوا الجنس ؟؟

الواد محمد ربيع عامل رواية اخر رواية له اسمها ناس أسمهان عزيز السريين

فيه مشهد افتكرته وانا بقرأ تدوينتك
بنت المرشد العام للاخوان بتتجوز واحد من الاخوة
الواد بيقعد يصلى ويسبح ويحوقل وفي النهاية بينام معاها من فوق الهدوووم
وهوب هوب هوب
مش بيكمل النص دقيقة ويقوم مسمى
ونايم

حاجة كدا قمة في المسخرة فعلا

الابن الضال said...

انا متفق مع علاء جدااا
انا اصلا دايما اسأل نفسي ليه موضوع الارتباط ده الناس مصعبينه بالشكل ده على الرغم من انه قرار من المفترض انه لا يخص سوى الانسان والانسانة اللي هيتنيلوا يرتبطوا ببعض

المجتمع والأهل والناس والبزرميط ده كله ملهمش اي دخل في قرار زي ده، لكن للأسف تلاقي ليهم ألف كلمة وألف رأي في الموضوع وبيحطوا زبين عقدة في المنشار رغم انها حاجة متخصهمش اساسا

انت عارف يا محمود..
اخويا اللي أكبر مني -ولأنه ابن بار وليس ضال مثلي- كان يعرف بنات بالعبيط، بس يقولي معرفة البنات حاجة والجواز حاجة تانية خالص...الواحد مننا يفضل يلعب زي ما هو عاوز ويعرف دي ويكلم دي، لكن ساعة الجواز يدخل البيت من بابه

طبعا عشان هو اخويا الكبير فمبرضاش اقوله أحا
:D

لما انا جيت اخترت بقى بنفس طريقتك -لأن هي دي الطريقة اللي انا مقتنع بيها وهو ده الإسلام اللي انا اعرفه- سمعت كلام قد كده واتضح لي إن اناابن الضال وخارج عن الملة واللي بعمله ده حرام
:)

روح يا بني ربنا يكرمك ويارب اشوفك انت وسوسن في الكوشة قريب ان شاء الله

الابن الضال said...

بالمناسبة يا محمود
الاقتراح اللي انت قلت عليه ده انا فعلا قرأت عن حاجة زي كده بيعملوها في امريكا...الجالية المسلمة بتعمل كده بس من غير ستاير
يعني مكان عام للتعارف والاهل يكونوا موجودين...بيقولك قال ايه عشان يحافظوا على تراثهم الاسلامي وفي نفس الوقت ميبقاش جواز صالونات

يعني اهو كله بتنجان مخلل...وربنا يشفي

bluerose said...

يااااااه
الحوار دار في حياتي كتير جدا
الرأي "الملتزم" أو التقليدي حتى لو مش ملتزم دينيا دائما ما ينهي كلامه بجملة واحدة (الملتزم هنا مش لازم يكون مابيعرفش بنات , أعرف ناس لها أصحاب بنات كتير جدا لكن حاليا بيدوروا على "عروسة" بمفهوم جواز الصالونات و تكون مالهاش صحاب ولاد :)) ) بينهي الحوار عادة بجملة لطيفة : جواز الصالونات ناجح بنسبة 99% و اللي بيعرفوا بعض جوازهم بينجح بالكتير 5% من الحالات

و مش هاقول اني سألت عن الاحصائيات الدقيقة دي جت ازاي , أنا بس نفسي أفهم من اللي عايزين يتجوزوا من غير مايعرفوا الطرف التاني عشان جوازهم ينجح : يعني ايه ينجح
لأني كل ماسأل حد من اللي بيتكلموا عن جواز ناجح يعني ايه يقول لي كلام مش فاهماه , ناس تقول لك يعني مايطلقوش (يعني كل اللي ماطلقوش تبقى جوازاتهم ناجحة؟؟) و ناس تقول لك يعني مرتاحين و ناس و ناس و ناس

راجعة تاني

arabesque said...

ضحكتني والله

أكتر حاجة بتغيظني في موضوع ما يقعدوش مع بعض في مكان عام لأن ثالثهما الشيطان دي إنه دايما بيفترض ان الولد/الراجل هيعمل اللي هو عايزه وإنه خطر، وإنه بيطلب ده عشان دي فرصته ولغرض ما في نفسه ولا كأن اللي وافقت تقعد معاه دي بني آدم هي كمان ولها منطق في ده وعقل وتعرف تحكم على الأمور وتاخد قرار وتوقفه عند حده لو لزم الأمر
تعامل مع الإناث بمنطق البهائم مش أكتر

يلا لسه يا ما هنشوف
بس بجد هايل يا محمود

fanan fa2eer said...

بص يامحمود
هي الحكاية ملخبطة وكل الناس متلخبطة ومش عارفة فين الصح والغلط
البنت اللي تكلم ولد يقولولك دي بنت مش كويسة وناس تانية تقولك دي بنت متفتحة
والولد لو شاف البنت بتكلم واحد زميلها في الجامعة ممكن تنزل من نظره أو لو هو راح وأبدالها رغبته في انه عاوز يتعرف عليها مايضمنش هيكون رد فعلها ايه ماهو برده يامحمود مش أي بنت هتقبل انك تروح تقولها تعالي نتكلم شوية وبعدها أقولك هينفع ولا مش هينفع
كمان ايه اللي دخل عمرو خالد في الموضوع يعني:)
ماتسيبوا الراجل في حاله مش عارفة ايه الهجوم الكبير ع الراجل ده
زي ماقلتلك هو الموضوع ملخبط جدا جدا وزي مانت قلت ولو انها كانت تريقة
النية هي اللي بتحدد والناس المتزمتة دي بتبقي خايفة علي نفسها تقع في الغلط وده من حقها وماحدش يقدر يلومهم
نسأل الله السلاااامة

Lasto-adri *Blue* said...

انا قعدت قد كدة محتارة مابين "هو كلام الولاد حرام" .. وهو فعلا ح بقى بنت مش ولابد لو كلمت ولاد؟.. امال اللى بشوفهم وبيعملوا حاجات اكتر من كدة يبقوا ايه
كان شئ محير بالنسبة لى -ازعم- بالذات.. للتربية والخلفية وحتى المدرسة
انما فى الآخر لما لقتنى بتخنق من الناس اللى تقول لك الكلام مع البنات حرام وفتنة للقلب.. الخ الخ.. عرفت من جوايا مش متقبلة الموقف دا اصلا
يعنى ايه الكلام معاهم حرام
:S
مانخليها ورقة وقلم احسن

كل اللى عرفته وبنفذه وخلاص... مدام البنت والولد باحترامهم.. خلاص.. والاحترام مابيتجزاش.. واى بنت ايا كانت بتفهم اللى قدامها دا عامل ازاى.. وبتعرف تفرق كويس مين ممكن تثق فيه ومين من اولها قلشاه.. وكدة يعنى

حبة الحمبكة اللى الفكر الغريب دا بيعملها هى اللى مبوظا الدنيا والله.. يعنى يا اخى واحدة واقفة معاك على تجربة بتشتغلوا مع بعض... ايه اللى فيها عشان تتقمص وتروح ماتردش على اسئلتها ولا تتعامل معاها كانها حشرة متطفلة

ادى نفسك فرصة "محترمة" ومشروعة.. ماتقفلهاش على نفسك.. عشان ع الاقل تعرف تختار ازاى.. مش تطلب من صاحبك ولا معرفش مين يجيب لك عروسة
وهى جوازة اسمها والسلام.. ولا تقضية واجب
:S

انما حقيقى الشئ اللى نفسى فيه.. يكون فى المساجد.. اى حاجة درس مافى الاسبوع مختلط عشان الناس تعرف بعض
مش لازم درس.. ممكن نشاط خيرى جماعى فى نطاق المسجد
واظن الموضوع دا اصلا مطبق.. مش اختراع مثلا
عشان اللى شيفاه حاليا ان فى ازمة... بدئت تظهر ع السطح

spellz said...

مسخرة :]
يا سلام البطيخة دى هى نظريتى

بس ايه ده انا شايفة من الكومينتس ان الناس خدت اقتراحك على محمل الجد :]

و ليه يبقى فى ستارة و من وراء حجاب
احنا نعمل معرض صور اسهل
والى تعجبه الصورة يدخل على المرحلة التانية الا و هى يشوف السي فى و بعد السي فى مكالمة تليفونية
و بعد كدة مقابلة عائلية

انا مش فاهمة فيه ايه هو الجنس الآخر ده طاعون مثلآ من اقترب منه يحرق فى الدرك الأسفل من النار !!
تحس ا من كلامهم ان الاسلام محصور فى الرغبات الجنسية

سورى فى الكلمة يتلهوا و يروحوا يدورلهم على مشاكل بجد يحلوها

مش كلامهم مع البنات ولا الولاد هو الى هيحدفهم فى النار
تقصيرهم فى حق بلدهم و الحجات التانية اولى بالنهى !!

سويسى said...

ربنا يوفق كل إنسان أنه يختار صح
بعدين كل واحد ليه دماغه وطالما مغلطوش يبقى محدش يلومهم ولكن إذا كنت انت شايف ان اللى بيعملوه مش جايب نتيجه مسيرهم هيعيشوا ويغيروا أفكارهم الموضوع مش محتاج كلام كتير و مناكح الخير ولا ستاره ولا بطيخه الموضوع -من وجهة نظرى-إن دول ناس محترمين مش عاوزين يسببوا جرح لحد........

Anonymous said...

حلوة آخر جملة دى

مش عايزين يسببوا جرح لحد

3rby said...

بص انا اول مره اجي هنا
موت علي نفسي من الضحك وانا باقرا البوست والتعليقات
اجمد حاجةبتاعة الستارة وكمان تعليق سبيلز
مسخرة
انا مش هاعلق عالبوست لانه مش بيهمني اصلا
اناعندي 17 سنة وعايش في مجتمع عادي يعني فمش فارقة
بس استمر البوست جامد جدا
وربنا مع الناس السلفيين دول والله مش عارفين يتكلموا امال هايعملوا ايه في اليلة الموعودة هايستأذن ابوها برضه ويقولوا لو سمحت يا عمي ممكن ابوس بنتك
وبعد شوية يا عمي عاوز المشورة ايه هي المرحلة التالية وكيف انتقل اليها وهل من الممكن ذلك؟ام اصليصلاة استخارة والسلام عليكم ورحمة الله

محمود عزت said...

صلو على النبي يا جماعة
ياريس محمد فوزي آل ربيع , حقك عليا إنت أنا آسف إني مافهمتش ردك , بسالمشكلة كانت إني طول الوقت المدونة دي كانت هي النافذة الوحيدة المتاحة للتهييس العلني و عمري لا كتبت عن كاميليا جبران ولا إسكندريلا !!
بس حصل خير
و صديقي لإنه بيحب البنت طبعا أرجع الموضوع إلى اختلافي في طريقة الأفكار و تناول الحياة :))


عمرو عزت
ألا أبلغ القيادة العامة للسلفية إني ارتجعت و بكرة حنزل لابس الجلابية اللي تحت الركبة و مركب لحية و حكون أخ مؤدب و ربنا..وحدة الصف هي كل ما نملك هذه الأيام يا عزيزي
أما عن اقتراحك , هو جميل لكنه يفتح الباب لشبهات كثيرة مثل إحتمال قبول الشيخ المنوط بالإستسقاء و المزاوجة للرشوة مثلا عشان يقرب البعيد و ينول كل واحد اللي عايزها دونا عن بقية الفتيات ...لكن جميل يا عمرو إنك بتتفاعل معايا , طول عمري بقول إني بأثّر عليك كويس و شايفك على طول حاططني في مرتبة القدوة أو الحوزة بتاعك :))



يوسف
طيب ما تقولنا يا خفيف عن نظريتك إنت كمان , يمكن ربنا يطرح فيها البركة و تكون هي النبراس المستقيم , بس إوعى تقولي إنها كانت من نوعية البطيخة ... كده جمهور الدوالي حيزعل منك جدا



شيماء
والله هي نعمة كويسة , بس جوزها طردها من البيت عشان اكتشف إنها مش بتقرا لجوتة


نهى جمال
والله أنا كمان الفكرة الأخيرة دي مش عاجباني انا كمان !
و الصالونات دي يا نهى أصلا طريقة غبية جدا , و البنت لما بتترفض بيبقى شئ مؤسف جدا جدا جدا , أنا أعرف كذا تجربة من دول بتنتهي بإن لو العريس كان معرفة مثلا , بتتقطع كل الصلات إنهم يسمعوا إسمه تاني !
و فيه ولاد كتير يا نهى ميعرفوش بنات نهائي , خارج طبعا نطاق أخته و امه و خالته , بنت خالته أول ما تبلغ فهو مش بيكلمها خالص ...و ده كتير جدا كمان
الفكرة يا نهى إني مش بقول إنك لازم تعرف البنت !!!
لأ
أنا بقول إنك تعرف اللي حتتجوزها ! , و بشرط مهم جدا : قبل ما تتجوزها !
أنا فعلا معنديش حلول في مجتمع معقد جدا بالنسبة للمواضيع دي أنا قلت رأيي في اللي بيحصل و أصحابي الله يكون في عونهم !



علاء
إحكي يا أبو علاء إحكي
معاك حق في موضوع الطبقة الوسطى ده , الواحد بيسمع عن بلاوي في الجواز تكرهه في أم العيشة على اللي عايشينها
إحكي يا ريس


بيسو
بالراحة بس يا حاج , و مفيش مشاكل أنا حضيف اقتراحك لأجندة "مناكح الخير " و يبقى البنات اللي تختار بس المشكلة ساعتها إن الولاد كده ممكن تجيلهم أعراض غير ظريفة !
إنت شفت الرواية دي
اللي بتتقري من تحت لفوق و من الشمال لليمين !
لسه مقريتهاش والله , بس مادام فيها سيرة المرشد كرّم الله وجهه يبقى أكيد حسمع عنها قريب



الإبن الضال
الله أكبر !
ظهر الحق ....اقتراحاتي وصلت أمريكا بفضل استجابة السادة المسئولين و أولهم السيد رئيس حي إمبابة
آمين يا ريس و نشوفك إنت كمان في بيت العدل


بلو روز
عاش من شافك :))
أنا عارف إن الرأي ده منتشر جدا , يحسسك إن اللي بيتجوزا عن حب دول ناس استنفدوا الطاقة المسموحة للحب قبل الجواز و بالتالي بطارية الحب فضيت بعد الجواز
بينما اللي بيروح يتجوز صالونات بيدوله شاحن هدية
ثم إزاي أتجوز واحدة مش بحبها و أقول بعد الجواز , إفرض ما حبيتهاش بعد الجواز ! , أروح أبدلها و أدفع الفرق!!
اللي بيحصل إن الناس (بيتعوّدوا على بعض ) بعد الجواز مش أكتر , مفيش أي خيارات تانية فمضطر أعيش مع الست دي اللي بتقوم الصبح تعمل كل حاجة و بالليل معايا مفيش مشاكل يعني , و كده كده كتير من الناس عندهم الحب و الكلام ده فائض إسطوري ملوش قيمة , يعني الدنيا كلها ماشية غلط , جت عليهم




أرابيسك
ربنا يكرمك يا فندم
فعلا , لسه سامع من عمرو إن فيه ناس بتقول عن حدود الخلوة إن مينفعش البنات تقعد على الماسنجر لوحدها , لازم يبقى قاعد جنبها أبوها أو أخوها أو تجيب عروسة لراجل و تقعدها جنبيها :))
ربنا يستر !



دكتورة سالي
والله أنا مش بقول إن أي بنت تقف ترغي مع أي ولد و بعدين يقولها لا مش حينفع !!!
الفكرة حاجتين :
إن ليه أصلا يبقى حرام إن البنت ممكن تتكلم مع ولد , حتى لو مش في الجواز , كلام في مكان عام , بيسألها عن حاجة , بيتناقشوا في حاجة...سواء كان زميل في الكلية أو العمل أو أو , مش بقول إنها تستجيب لواحد ماشي في الشارع يقولها:
ا لو سمحتي أنا عايز أتناقش معاكي جدا !
و الموضوع كله في النهاية راجع للنيات
الجزء التاني إنك لو ناوي ترتبط بواحدة , قبل ما تروح البيت تعرف رأيها هي الأول , ولا تواعدوهن سرا إلا أن تقولوا قولا معروفا , ولو قالت أوك تعالي البيت , بعدها تقدر تشوفها و تكلمها مش لازم يبقى كل مرة في البيت و أخوها و أبوها و ابن الجيران قاعد معاكم عشان الخلوة المحرمة !!
ما ممكن واحد يروح للبيت من بابه و يقعد و يحكي و يهزر و بعدين يطلع بيتسلى و يمشي و مخسرش حاجة !
كل شئ ممكن أي حد يعمله



لست أدري

أنا بضم اقتراحك لأجندة فعاليات " مناكح الخير " , الأزمة بدأت تظهر على السطح و تنقط في المنور كمان
و أنا فعلا بتضايق من الإخوة اللي بيدوا للأخوات إنطباع إنهم قرفانين جدا وهما بيكلموهم كإنه بيقولها : لمي نفسك يا مرة !
و على كل حال موضوع الورقة و القلم ده هايل فعلا , انا حرشحه للهيئة السلفية في إمبابة !



دكتورة سبيلز
اقتراحك الهام تم إدراجه و الموافقة عليه في مشروع " مناكح الخير " رغم إننا بنحسد شباب عين شمس , بنسمع إن المواضيع أكثر انفتاحا عن القاهرة
على كل حال بارك الله فيكي و بإذن الله ممكن تنالي منصب مشرف عام على قاعة من قاعات المشروع الذي سيحل أزمة شباب كلية طب قصر العيني و النواحي المجاورة


السويسي
يا باشا انا مش بقول نجرح حد ولا نغزّ حد...
أنا بقول تعرف اللي حتتجوزها , و تكون في الأصل عادي مش حاسس إن البنات مصابات بالجذام , لإن ده حيخليك طول الوقت بتفكر إنك مجرد ما تكلم بنت يبقى لازم تغتسل !
والله أنا قلت اللي بيقولوه ليا أصحابي, و بيدل إنهم مش مقتنعين بأفكارهم ولا راضيين عن أفكار غيرهم , خايفين من ربنا بس مش راضيين عن اللي بيشاع إنه أمر بيه..
هي دي المشكلة و ربنا يوفقهم و يوفقك يا نجم



أنونيمس
فعلا حلوة والله , عندك حق



عربي
يا سيدي ربنا يزيدك من نعيمه !
و بلاش تتريق على الإخوة السلفيين يا أخ عربي ,أو بلاش عندي هنا في المدونة , أنا ساكن في إمبابة يا راجل ! شعبي يقول عليا إيه !

3rby said...

بمناسبة شعبك بقي هاقولك علي حاجة
في شباب كتير بيقول مش باكلم بنات ومش باعمل علشان الناس ماتقعدش تقول الحق ده مالوش فيها وبايع القضية وكده
يمكن لان البنات وحشة فعلا في بلدنا
يعني لما باشوف ناس من سوريا مثلا ممكن الاقي واحدة وحشة في وسط خمسين مزز وقمرات اما هنا بتلاقي البنت يا اما معدية ورافعا مناخيرها في السما يا اما "مجلخة" ونفسها تتجوز انشالله كل حتي وفي الحالتين بتبعد الناس عنها
بس صدقني هي مش حكاية موقف هايتغير وقناعة هاتتبدل اد ما هي ان ماجتش الانسانة اللي تغير
يعني تصور كده لو واحد سلفي وبدقن وكده ولقي كاثرين زيتا جونز
nude
قدامه.تفتكر هايقولها احتشمي يا اختي
لا طبعا
المشكلة ان العملية ناشفة علي الاخر في معظم انحاء مصر وده راجع لبوست انا كتبته قبل كده عن مناظر الناس وعلاقتها بالاكل
العز بيغير والله
يعني تفتكر ليه البنات بتبقي حلوة في المعادي والزمالك ومدينة نصر ومصر الجديدة وليه بيبقوا معفنين في شبرا والمرج؟
المشكلة في الاكل الغزا بيغير كتير والراحة النفسية بتغير اكتر في المامح وبتغير في العقول يعني السلفيين دول ماكنوش موجودين ليه بالشكل ده قبل مبارك والسادات وليه بيطلعوا من مناطق شعبية
تاكل الناس يدوك احلي شغل وساعتها الشعب هايعيش

أحمد عبد اللطيف said...

بص يا محمود

بغض النظر عن إني دلوقتي مولع و مستحلفلك ,

فأنا هاهدي نفسي خالص علشان أرد عليك

أولا : انت بتتكلم في الموضوع بشكل كوميدي غير واقعي بالمرة مع احترامي لوجهات نظرك

و سيادتك بتعرض الأمر بشكل اختزالي جدا و بدون إكمال الصورة عن زواج الملتزمين و بذلك فإنك تصورهم على إنهم مجموعة من الأغبياء و الغير منطقيين

الملتزمين الحمد لله ماعندهمش أي مشاكل في الارتباط , و أساس الإختيار عندهم يكون بالتأكيد أحسن من الارتباط عن طريق نظرية التطور الطبيعي للحاجة الساقعة ( زمايل ثم أصدقاء ثم اخوات ثم حبايب )

لإن بصراحة في نظرية التطور الطبيعي الموضوع بيبقى عاطفي أكثر من عقلي و بيتم فيه بحيث تترائى الصورة للرائى كما يشاء لا على حقيقتها وفقا لمبدأ ( القرد في عي أمه غزال )
و أنا كحبِّيب قديم أستطيح الجزم بذلك

بينما الزواج عند الملتزمين يكون الأساس فيه أن العلاقة الزوجية هي علاقة صهر أي اقتراب عائلتين لأن هناك ألقاب عديدة تنشأ عن تلك العلاقة هذه الألقاب لها مسؤوليات مثل الحما و الحماة و الخال و العم و الجد و الجدة و هكذا

و الاقتراب العائلي لابد فيه من التوافق الطبقي و الفكري

الزواج عند الملتزمين يكون الهدف و الغاية فيه هو الحصول على شريك جيد يصلح للرحلة إلى الجنة

و النماذج المفترضة للزواج عند الملتزمين كثيرة و متعددة ( و معظم التائج التي رأيتها ناجحة و الحمد لله

ثانيا

نشكر لك حرصك على الإخوة الملتزمين يا محمود و لكننا نحب أن نقول لك
أننا و الحمد لله نجيد الإختيار جدا جدا , و نجيد الزواج جدا جدا , و في الوقت ذاته نحترم مشاعر و أحاسيس البنت التي نختارها جدا جدا لذا فالأمر ليس فيه صرة دنانير و لا شلنات حتى

بل أن رأيي أن ذلك بالتأكيد أكثر حفظا لكرامة المرأة التي تمتهن في علاقات الحب و المشي سويا في الجامعة و بره الجامعة
و بذلك فإنها تكون وقتها متعة رخيصة للكابتن اللي ماشي معاها ( رخيصة طبعا بس مش أوي , يعني تمنها بيبقى تذكرتين جنينة و اتنين و بيبسي و أحيانا تذكرتين مترو أو يدفعلها في الميكروباص )
و أمام هذه التكاليف الرخيصة يستطيع المرء على الحصول على كلمتين حب و وعدين بإنها هتحبه لحد ماتموت و إنها هتستناه لحد ما خلص دراسة و يقنع السيد الوالد و ييجي البيت و طبعا يقعدوا يتناقشوا بيتهم هيبقى كام غرفة و يتخانقوا على أسامي العيال و ينبه عليها إنه لما يرجع البيت علشان يتغدى ياريت مايلاقيش قلقاس على الطبلية......و هكذا )

و في يوم من الأيام يتخانقوا خناقة هبلة و عبيطة و تتفركش العلاقة بينهم إلى الأبد

ده بالتأكيد هو الامتهان الحقيقي للمرأة

و يجعله عامر

محمود عزت said...

يعجبني فيك يا أخ عربي إنك بتقول قوانين يا حاج !
انا رأيي مختلف خالص على فكرة !
البنات مش في شبرا ولا المرج أوحش من الزمالك و المعادي !
الفرق بس هو اللايف ستايل يا حاج عربي
يعني البت بتاعت الزمالك طول النهار كريمات و كوافير و بتاع
يعني تلت تربع الفنانات المبهرات في السينما من أحياء شعبية بس لما اللايف ستايل يتغير كله بيتغير
مش الأكل فقط !
الأكل بيعمل زي أمريكا كده
سمنة مفرطة !




أحمد عبد اللطيف باشا

مين قال بس إني بقول على كل الملتزمين وحشين !
فيه ملتزمين عاديين جدا و بيكلم البنت اللي عايز يتجوزها و يشوفها و يكلمها عادي جدا
أنا مش بتكلم على علاقات مشبوهة
انا بتكلم على إتنين أسوياء قرروا إنهم يتكلموا مع بعض عشان يعرفوابعض في خلفية واضحى إنهم مش بيهزروا
ده غير طبعا إن البطيخة كتير جدا بتنجح !
بس ده لا يعطي للبطيخة إمتياز الدوام

أحمد الدرعه said...

هاقولك حاجه واحده بس :
اللي بيحب يشوف الدنيا معقدة حيشوفها معقده ومتنيلة وملهاش حل .. وحله هيبقي عند ابليس دايما حلال العقد, الاسلام سهل واوامره فيها خير للانسان لأنها من عند ربنا اللي خلقنا وأدري بأين الخير لنا وزي ما قلت الاسلام سهل -للي عايزه- وصعب جدا ووحش ومقرف للي عايز هواه وعايز يعيش بدماغه.

هو انت عمرك ما شفت حد ملتزم دخل البيوت من ابوابها زي ما انت بتقول و اتجوز واتعرف علي اللي البنت هيتجوزها وفي نفس الوقت ما خالفش اللي ربنا أمرنا اننا نلتزم بيه -واللي ربنا امرنا بيه واضح وسهل جدا للي عايز يلتزم وخايف من ربه وعارف أن في آخرة وجنة ونار والحاجات دي ليها وزن في حياته وتفكيره-.

أنا -الحمد لله- وغيري من الناس الطبيعيين -اللي بتسميهم انت معقدين- معرفتش بنات الحمد لله ومصاحبتش بنات -الحمد لله- لأني باخاف من ربي وعامل حساب له لأني ((مسلم)) يعني مسلم أمري كله لله والحمد لله اتجوزت وباحب زوجتي جدا
والحمد لله محصلش أي حاجه من الكلاكيع اللي انت بتقولها وأنا شايف أنك عامل زوووووووم كبير أوي علي بعض التصرفات الخاطئة لبعض الملتزمين ونازل سخرية واستهزاء باللي غرضه انه يرضي ربه وان اخطأ في بعض الأمور, وحتي لو كان هو أخطأ : خطأه هو ولا اللي فاتحينها ع البحري ولا في دماغه ربنا واللي أمرنا بيه..
وأظن طبعا يعجبك جدا نظام الجواز في امريكا واوروبا لما يتجوزوا بعد العيل التاني أو التالت ويعيشوا سنتين تلاته عشرة ..حسب الساهيل مع بعض ولما يتأكدوا كويس جدا انهم ينفعوا لبعض وان البطيخة مش هتطلع بيضا ساعتها بقي يبقوا يتجوزو...وعموما اطمن الناس مش همها علي الاسلام ولا عايزاه خالص وقريبا هنبقي بنفس النظام ده.
تحياتي.

محمود عزت said...

عزيزي أحمد الدرعة
أنت تدير حوارا مع نفسك

bluerose said...

كما توقعت مادام فيه ذكر للملتزمين , يبقى الحوار هايقلب للكلام عن معسكرين لا ثالث لهما , معسكر الحلوين اللي ماحدش من اللي بيتكلموا المرة دي قال مواصفاته , و دول حلوين و بالتالي جوازهم ممتاز و مثالي و مش لازم يحبوا بعض لأن المهم العقل,
و معسكر الوحشين اللي لهم صورة واحدة لا غير : طلبة جامعة و بيخرجوا كل يوم جوة الجامعة و برة الجامعة و هو بيدفع لها ثمن تذكرة السينما مقابل كلمتين حب (المعسكر دا مافيهوش حد وراه شغل خالص كلهم فاضيين) و دول طبعا وحشين و بيتخانقوا و مابيتجوزوش و لو اتجوزوا يبقى جوازهم فاشل (ماحدش قال يعني ايه فاشل)


طيب تسمع يا محمود شوية من حوارات البنات؟؟؟؟ مش لازم اللي في سنك , باتكلم عن المرحلة اللي بعدها , يعني اللي أكبر 4 أو 5 سنين كدا

اقول لك أنا يا سيدي
طبعا بعد الدروس المكثفة من النوع دا لمدة سنين تيجي بعد التخرج بفترة تلاقي البنات مستنيين النتيجة الموعودة اللي المجتمع وعد بيها البنت الحلوة اللي مابيتكلمش ولاد (لاحظ ان تركيز الدروس دي عادة مش بيكون على اقتناعها بما تفعل قد ما بيكون ترغيبها في جوازة كويسة, و في ظل ثقافة مجتمعية أصلا تعتبر الزواج انجاز "ماتسألنيش ازاي" وحيد أهم للفتاة) المهم يا سيدي تلاقي الحوارات كلام حانق من زواج معظم من كن بالأمس من النوع الذي يصنف "وحش" و عدم زواج معظم من كن يصنفن "حلو" (معظم هنا ليست بالضرورة دقيقة , لكنها نتيجة وجهة النظر التي تم تشبيعهن بها أساسا أن المعسكر التاني لن يتزوج و بالتالي يستعظمن ما يرينه خطأ أصلا و هو زواج بنات من المعسكر التاني)طيب يا جماعة ماهو كل واحد بيتجوز اللي زيه يعني المناسب للمعسكر التاني بردو من المعسكر التاني و بالتالي المعسكر الأول ماخسرش حاجة , هاتلاقي الرد ان الأساطير اليونانية قالت ان شباب المعسكر التاني بمجرد التفكير في الزواج لازم يتنقلوا للمعسكر الأول و بالتالي مايحدث حاليا من تكذيب للأسطورة على المستوى الواقعي هو دليل خلل في المجتمع
طيب ماهو اللي جاي من المعسكر التاني دا مش هايكون مريح للبنوتة من المعسكر الأول , لأ مش مهم أصلا , الزواج نفسه هو الانجاز

لو فيه حاجة مش واضحة في الرد قل لي عشان ماقرتوش قبل النشر , هو طلع كدا مرة واحدة

3rby said...

بالعكس
تعرف الفول والطعمية دول اكتر حاجة بتخن
تعرف مثلا مثال لاجسام الغلابة جسم شعبولا
عنده كرش ومالوش وسط
ابقي ركذ في جسمه هاتلاحظ فيه اكل بيغزي بس اكيد لما تاكل منه زيادة عن اللزوم تتخن
وفيه اكل مش بيغزي ولا بيتخن بس بيملا البطن وخلاص فبالتالي بتكبر لكن حتي مش بيغير في الشكل زي مابيقول ربنا"لا يسمن ولا يغني من جوع"
بيتهايئلي مش الكريمات والشامبوهات هي اللي بتغير بالنسبة الكابر
ممكن تغير في البشرة اما الملامح فبتتغير مع الراحة النفسية والاستقرار الغزائي
اما بالنسبة للمثلات فده كله عمليات وحوارات
بيتهايئلي ان الكريمات وكده ممكن تغير تغير مؤقت لكن لو ماحطتهوش في يوم هاتبقي معفنة اما الراحة النفسية والغذا بيغير في الجينز نفسها علي مدي كذا جيل او سنين طويلة
وبعدين اللي بيقوا تخان في امريكا دول بسبب الاكل اللي مالوش لا ملة ولا دين اللي هو التاك اواي ده اصلا تحس كلو طعم بعضه الشيش طاووك طعم الفاهيتا طعم الشاورما انا باتكلم عن الاكل الراقي بتاع الشعوب اللي ليها تاريخ او الناس النضيفة في امريكا
يعني اللي هاتاكل لحمة ستيك هاتتخن ليه مثلا؟

أحمد الدرعه said...

لا أنا أرد برأيي علي موضوع البوست بتاعك وطريقة تفكيرك في الموضوع
وانا هنا ﻷي حوار تريد أن تديره معي :)

Anonymous said...

أنا قررت إني أعلق بعد ما تابعت كل الردود اللي جات علي البوست. أنا مستغربة جداً من شكل الحوار اللي حاصل ده.. رد الفعل انقسم لشقين أول شق كأنه كان مخنوق و ما صدق حد عبرله عن حرية نفسه فيها, و الشق التاني انفعل جداً انفعال حجمه يليق برد مناسب علي حد سب الإسلام و ده ما حصلش!
اللي أنا فهمته شخصياً من البوست هو انتقاد أسلوب -أسلوب مش أشخاص ولا عقيدة- بعض الملتزمين في نقطة اختيار شريكة الحياة و الأسلوب ده ممكن يعكس صورة الإسلام علي إنه عسر و كبت و ليس يسر و ده في حد ذاته قد يسيئ لصورة الإسلام اللي عادةً "الملتزمين" بيكونوا وجهتها.. و هنا بس عايزة أطرح سؤال: هما مين هما الملتزمين و كيف يتم تصنيفهم؟!
و مش عارفة إزاي ممكن يكون في حد فهم إن محمود هنا بيحاول يروج للصحوبية مثلاً أو -علي سبيل الافراط في المبالغة- إنه عاجبه أسلوب أمريكا و أوروبا في الجواز.. في إيه يا جماعة؟!
كل واحد من الشقين كده يستهدي بالله و ياخد قرص مهدئ و يقرا البوست تاني , أعتقد هيلاقي الصورة غير ما اتفهمت كده و ما تحملش أي إهانة لأي حد!

ألِف said...

"فماذا إذن يفعل جيش الشباب الملتزم المأزوم المصاب بالدوالي"

دوالي! يا لئيم.
بس كدا هم عندهم سبب *ثاني* - غير الذقن - يمنعهم من دخول الكليات العسكرية.

محمود عزت said...

bluerose
وجهة نظر مهمة طبعا من داخل معسكر الاعداء ..معسكر البنات أقصد:))
و رغم كل المعسكرات اللي في الرد إلا انني من المعسكر اللي رأيه إنك يا بلو روز قلتي كلام مهم جدا يهم المعسكر اللي رأيه إن فيه معسكر كان لازم يسيب المعسكر لمسعكر تاني خالص حنشوف بإذن الله إيه رأيه في المعسكر الجاي في بلطيم :))
لا بجد كلامك جميل يا دكتورة نيرمين



عربي باشا
إنت ساكن فين صحيح ؟
و صحيح...اللي حتاكل ستيك حتتخن ليه ؟
هو يعني إيه ستيك يا عربي !


عزيزي أحمد الدرعة
أنا ما أتكلمتش على صحوبية ولا عيال قبل الجواز ولا أمريكا و مش عارف برضه إيه العلاقة بين الدخول من الباب و الخروج مع اللي ورا الباب , أنا دخلت من الباب والله بس إحنا بنتكلم عن موضوع تاني خالص يا أحمد :))


أنونيمس
الله عليك و ربنا !
إيه العقل ده
طول عمرك راجل حقاني :))


ألف
على كده بقى الجيش المصري كله واخد تأجيل ولا إيه ! :))

رانيا منصور said...

محمود !

انت حد إشكالي يابني !
دي مصيبة تفتحها في المدونة بردو ؟! :)

المهم
جيت ع الجرح ودست !!
وموضوع بيتفتح كل يوم ان ماكانش كل شوية !
ولو كان بتهريج
عشان موضوع مهم ويفرق مع كل حد
وفي النهاية عمرنا ما بنتفق على نتيجية واحده !!طبيعي!

الكارثة في الأدمغة اللي ملزوقة بصمغ السلطان حين وعايشة دلوقتي وفاكرة ان فكرة حلال وحرام بالسكاكين كافية لحماية المجتمع
اللي هو اصلااصلا ضايع !
مش فكرة حوار بين ولد وبنت اد ما هو ازاي
وليه
وتقبل الجميع له كمان ازاي
واخيرا الضمير اللي تقريبا انعدم للاسف
هفففف!
لو وصلت لحل قللي
دماغي وجعتني !

3rby said...

يا عم انا من الطبقة المطحونة علي عكس اخواتي واهلي
انا الوحيد اللي معندوش موبايل ومعفن
:))
مش باتمنظر يعني
انا في مدينة نصر يا سيدي
وبعدين اللحمة الستيك ديه علي حد علمي يعني وطريقتي في الطبخ :) زي شرايح بتتعمل بزيت قليل جدا علي صاج مع بهارات وكده مزيتها انها مش بتتاكل بعيش او كده فمافيش تخن والاكلات اللي زي ديه منتشرة برة علشان كده بيدونا احنا القمح احنا نكرش وهم يبقوا جامدين جدا
:)

سَيد العارفين said...

.... كان نفسي ما اشتركش في الجدل القائم عندك ي المدونة غير لما أستعد بأسلحتي كلها عشان " الحرب دائرة "


علي فكرة أنا معترض علي فكرة " مناكح الخير "و بقول ان الحل ما ينفعش ييجي من بره لازم تغيير من الداخل

من الآخر
" الجواري هي الحل "

:) خللي بالك علي نفسك يا حودة .

mohamed hesham said...

"
نشكر لك حرصك على الإخوة الملتزمين يا محمود و لكننا نحب أن نقول لك
أننا و الحمد لله نجيد الإختيار جدا جدا , و نجيد الزواج جدا جدا , و في الوقت ذاته نحترم مشاعر و أحاسيس البنت التي نختارها جدا جدا لذا فالأمر ليس فيه صرة دنانير و لا شلنات حتى

بل أن رأيي أن ذلك بالتأكيد أكثر حفظا لكرامة المرأة التي تمتهن في علاقات الحب و المشي سويا في الجامعة و بره الجامعة
و بذلك فإنها تكون وقتها متعة رخيصة للكابتن اللي ماشي معاها ( رخيصة طبعا بس مش أوي , يعني تمنها بيبقى تذكرتين جنينة و اتنين و بيبسي و أحيانا تذكرتين مترو أو يدفعلها في الميكروباص )
و أمام هذه التكاليف الرخيصة يستطيع المرء على الحصول على كلمتين حب و وعدين بإنها هتحبه لحد ماتموت و إنها هتستناه لحد ما خلص دراسة و يقنع السيد الوالد و ييجي البيت و طبعا يقعدوا يتناقشوا بيتهم هيبقى كام غرفة و يتخانقوا على أسامي العيال و ينبه عليها إنه لما يرجع البيت علشان يتغدى ياريت مايلاقيش قلقاس على الطبلية......و هكذا )

و في يوم من الأيام يتخانقوا خناقة هبلة و عبيطة و تتفركش العلاقة بينهم إلى الأبد

ده بالتأكيد هو الامتهان الحقيقي للمرأة "

لا أتفق مع هذا الكلام اطلاقا ... فكرامة المرأة لا تمتهن أبدا في علاقات الحب ولا تكون أبدا متعة رخيصة (للكابتن) ، والحب من حق الجميع ومش معنى ان تجربة فشلت يبقى عشان ده غلط لأ ده لأن لسة للاسف في ناس بتفكر بعقلية العصر الحجري ، فيها ايه لما ولد وبنت يحبو بعض ويتفقوا على الجواز انا مش فاهم ... مهو من حقها زي م هو من حقه ، وبعدين العلاقة العاطفية مريحة نفسيا للولد وللبنت ، ولما الاختيار بيكون على اساس عاطفى بنسبة أكتر منه على اساس عقلي بيبقى أحسن لأن اللي انت بتحبها وشايفها أحسن الناس هي اللي هتقدر تكمل معاها طول عمرك ...

الحب حاجة جميلة ومافيهاش حاجة ... أنا مش فاهم كرامة ايه اللي هتمتهن ... هو ده اللي جايبنا ورا والله ...

يعني مثلا لما بنتي تكون بتحب واحد ... المفروض مثلا اني اموتها بقى او اقفل عليها بالضبة والمفتاح ... لأ خالص ما هي ليها مشاعر زي كل الناس ، ايه المشكلة بدل ما نعقد الدنيا انن نساعدهم انهم يبنوا مستقبلهم مع بعض ... كفاية كلاكيع بقى ...

وبعدين التدين الزايد اللي بقى موجود ده انا مش فاهم هو عايز ايه ... كل حاجة ألاقيها غلط وحرام ... (وعلى فكرة قبل ما أي حد بس يقوزل عني اني ملحد وبتاع .. أنا الحمد لله حافظ 3 اجزاء من القرآن وبصلي ومتعلم) تجويد وتفسير ... بس يعني العصر اللي احنا فيه دلوقتي ما ينفعش نعيش فيه بالتفكير ده والطريقة دي ان الاختلاط مثلا حرام من بابه وان ما ينفعش أصلا اكلم واحدة زميلتي ... وان الحب ممنوع قبل الجواز ... يعني مش كتير كده ...

وبعدين رد الأستاذ / أحمد عبد اللطيف لاذع وفيه سخرية من حاجات جميلة كتير .. يعني هي لما تقوله كلمتين حب بيبقى عشان الحاجة الساقعة ، والله انتو فاهمين غلط ... فيه حب حقيقي بس احنا اللي عايزين نصعب الحياة على نفسنا عشان كل واحد يعلق فشله (في أي حاجة) على أي شماعة وخلاص
اللي فشل في علاقة عاطفية يقولك العلاقات كلها بتفشل
واللي كان بيحبها كانت بتضحك عليه وقلبته يقولك البنات كلهم ولاد ستين في سبعين .. وهكذا

البوست جامد وعلى فكرة (بكم تبيع هذه المزة) عجبتني لأن ده واله بيحصل كتير بس مش على العلن ... فعلا ... شر البلية ما يضحك ...

البوست جامد ويا ريت في تقدم علطول وعايزيين نشوفلك موضوعات أكتر وأقوى ...

والسـ ختام ــلام

المهندس /محمد اسامة said...

ازيك يا محمود. انت عارف ان في واحد صاحبي خطب واحدة وبعد ما خطبها بعد 3 ايام تحدث اليها في التليفون وطلب منها الخروج مثلا لمشاهدة فيلم فكان ردها ازاي يعني انت فاكرني ايه علي فكرة الجو مرشوش عبط وتقريبا في حالة من السيلان الفكري تجتاح الجميع ولا اعرف متي ستنتهي هذه الحالة وبعدين انت مش دكتور ياريت تكتب روشتة لايقاف هذا السيلان ربنا يباركلك واشوفك عريس

saloma said...

اتمنى ان تعليقى مايكونش متأخر، بس بجد احيانا بتحصل حالات خطوبة فعلا( و اهوه الولد دخل من الباب) و البنت ماصاحبتش ،و بيحبوا بعض بعد كده بدرجة كبيرة اوى، و هنا ممكن البنت تتنازل عن بعض القيم ( مش أوى ماتروحش بعيد يعنى)، المشكلة ان الفكر السائد ان العلاقة مابينكوا دى سر مايطلعش لحد، و لأن الحب مابيخليش الواحد يشوف سلبيات اللى قدامه فبتبدأ البنت تتغاضى عن سلبيات كتير جدا، و هنا بيكون الحب لا قدم ولا أخر و بتتساوى مع أى جوازة
القضية ان البنت لازم فعلا تدرس اللى قدامها، و أى علاقة حب فاشلة بتفيد و عمرها ماتضر أو تمتهن كرامة البنت لإن المشاعر دى مش بإيد الانسان لكن مش هايقدر يتحكم فيها غير لما يجرب و يشوف الغلط
و فعلا بوست لازم يتدرس لإن حالات الطلاق فى مصر بقت بتزيد بدرجة كبيرة جدا تستحق عليها الدراسة

Anonymous said...

على فكره مش ناقص غير أنهم يدوا لكل مواطن كتالوج للحياه على الطريقه السلفيه ملحق به مجموعه من الأدعيه . على أن يسلمه لأبنائه ثم لأحفاده .يعنى ملناش دعوه خالص بأى تطور أو مستجدات حضاريهوكل الناس تبقى شبه بعضها روبوتات يعنى. مش يبقى أحسن

المهاجر said...

يابنى تجيبها كده تجيبها كده هى بطيخة وانت و قدرك لاما هتلاقيها حمراء اللون مثلجة لاما قرعة و حياتك هتبقى متلجة برده لان زمن الشفافية انتهى فلو انت شارلوك هولمز برده هيتمثل عليك لان الخطوبة ما هى الا فيلم سينمائى مدته من 6 اشهر لسنة ابطالها معاهم السيناريو و بتكلوا منه و بعيتاخد السيناريو منهم مع الزواج و ساعتها يبدا التاليف و تبدا التلبيخ و شكرا

خايف عليك said...

اسأل الله لك الهدايه والصلاح
رب كلمة قالت لصاحبها دعني



وأما ان زدت في غيك وجهلك
فأسأل الله ان يجعلك عبرة ً لمن لا يعتبر

Sanaa basha said...

بوست عاوز يتدرس
دى احسن حاجة سمعتها هنا
انا ناوى ادرسه فعلا
تحياتى

Zainab said...

يا استاذ محمود, اعترف ان محمد الحاج هوه اللي بعتللي اللينك عشان يحاول يقنعنني ان الرجالة الشرقيين مش متناقضين - لكن البوست بتاعك امتعني, كتابتك عامة لذيذة اوي. استمتعت جدا لما قريته بس هوه معملش اللي محمد كان عايز يعمله - اللي هوه انا اصلا مش متأكدة منه حاليا. عامة كل سنة و انت طيب و اشوفك قريب ان شاء الله

زينب

Anonymous said...

thx

Anonymous said...

A片,A片,成人網站,成人影片,色情,情色網,情色,AV,AV女優,成人影城,成人,色情A片,日本AV,免費成人影片,成人影片,SEX,免費A片,A片下載,免費A片下載,做愛,情色A片,色情影片,H漫,A漫,18成人

a片,色情影片,情色電影,a片,色情,情色網,情色,av,av女優,成人影城,成人,色情a片,日本av,免費成人影片,成人影片,情色a片,sex,免費a片,a片下載,免費a片下載,成人網站,做愛,自拍

情趣用品,情趣用品,情趣,情趣,情趣用品,情趣用品,情趣,情趣,情趣用品,情趣用品,情趣,情趣,情趣用品

A片,A片,A片下載,做愛,成人電影,.18成人,日本A片,情色小說,情色電影,成人影城,自拍,情色論壇,成人論壇,情色貼圖,情色,免費A片,成人,成人網站,成人圖片,AV女優,成人光碟,色情,色情影片,免費A片下載,SEX,AV,色情網站,本土自拍,性愛,成人影片,情色文學,成人文章,成人圖片區,成人貼圖

情色,AV女優,UT聊天室,聊天室,A片,視訊聊天室


UT聊天室,視訊聊天室,辣妹視訊,視訊辣妹,情色視訊,視訊,080視訊聊天室,視訊交友90739,美女視訊,視訊美女,免費視訊聊天室,免費視訊聊天,免費視訊,視訊聊天室,視訊聊天,視訊交友網,視訊交友,情人視訊網,成人視訊,哈啦聊天室,UT聊天室,豆豆聊天室,
聊天室,聊天,色情聊天室,色情,尋夢園聊天室,聊天室尋夢園,080聊天室,080苗栗人聊天室,柔情聊天網,小高聊天室,上班族聊天室,080中部人聊天室,中部人聊天室,成人聊天室,成人