26 May 2007

إسماعيلية رايح جاي




إمبارح كنت في رحلة في الإسماعيلية تبع الكلية

أهم 4 حاجات بسطتني :

1
واحد زميلنا قام و مسك ميكروفون الأتوبيس و غنى بمزاج و بجرأة مفاجئة أغنية "مبقاش أنا "لأصالة _مع تعديلات ضرورية في النص الأصلي _ رغم إن صوته عادي جدا وهو عموما إنسان هادي مش من بتوع الزيطة يعني..
وإحنا راجعين قلت له إني عجبني أوي إنه طلع غني قاللي إنه حب يعمل كده عشان يخلي الناس تفك و تبقى على راحتها :)


2
في حمام السباحة كان فيه (منطّ) _مش متذكر إسمه بالفصحى بس ممكن يكون منصة قفز أو حاجة زي كده _ و أول ما شفته إتخضيت كان حوالي 3 أو 4 متر إرتفاع , بس إتشجعت لما لقيت بعض الإخوة العفاريت عمالين ينطوا زي اللي عمال ينتحر من الدور السابع و مش عارف , فطلعت و أول مرة كنت متردد جدا بس بعد كده بقيت كل شوية أطلع و أرمي نفسي من فوق


3
أنا كسبت سباقين سباحة تتابع مع الفريق اللي كان معايا , و طلعت التاني في سباق بين أسرع 4 كانوا في الرحلة



4
كان فيه زمايلي أول مرة أتكلم معاهم و حسيت إني منسجم معاهم جدا , تخيل إنك في كلية لمدة ست سنين و فيه ناس بتشوفهم و بتتكلم معاهم في أخر السنة السادسة , ندمت جدا إني معرفتش الناس دي من زمان



في طريق الذهاب :

الرحلة كان منظمها شباب الإخوان , و طلع المسئول عن الرحلة و قالنا إنه حيقول برنامج الرحلة اللي كان كالتالي
حنوصل الساعة 10
من 10 لـ11 صلاة ضحى 8 ركعات
من 11 لـ 1 محاضرة عن "شمولية الإسلام "
من 1 لـ 2 صلاة الجمعة و السنن و مفيش جمع و لا قصر
من 2 لـ5 حنروح نزور مقابر قريبة في فايد للإعتبار

طبعا الناس في الأتوبيس قامت تزعق و تعترض و تعض في الستاير و فيه ناس كانت مخضوضة في وجوم تام , و ناس تانية صدقت و قعدت تناقش تخفيف البرنامج و إنه مينفعش و بتاع :))
طبعا كان الأخ بيهزر و الرحلة كانت مسخرة في النهاية



في طريق العودة :

كان فيه مسابقة , وزعوا علينا أرقام و منظم المسابقة ينده على رقم و من سعيد حظي إني كنت صاحب الرقم الأول !
و طلعت لمقدمة الأتوبيس و كان الموضوع إني لازم أقول حاجة عني مفيش حد يعرفها , قلت إني بعد إمتحان الفيزيا اللي عكيت فيه في ثانوية عامة قررت إني لو مجبتش مجموع طب حدخل آداب إنجليزي بس النتيجة طلعت و لم يكن هناك مفر أو إحتمال إني أفكر في غير طب
بعدها سألوني سؤال ثقافي معرفتوش فكان لازم ألبي رغبات الجماهير اللي طلبت إني أغني :)) !
طبعا قاومت بعنف و لما كنت الوحيد اللي خاطب في العربية غيروا الطلب إني أقول أحسن حاجة أنا إخترت خطيبتي عشانها
و قلت : إن دماغها زي دماغي , فالعيال في العربية عملوا هليلة و تشجيع حار على الإجابة !
شوية و طلبوا مني أقول شعر و برضه طلعت خنيق و قلت لهم إني مش في المود و بتاع و مش مجهز حاجة و بجد أنا مش عارف ليه أنا مش بحب ألقي شعر بس بقية الشباب قاموا بالواجب و غنوا و قلدوا الدكاترة و قلدوا بعض و كانت ليلة !


هناك لعبنا كورة بشكل متوحش و نزلنا حمام السباحة و هييسنا تهييس على أعلى مستوى
أحلى رحلة طلعتها حتى الآن


13 comments:

نبيــذ said...

كان يوم جميل

أحمد said...

رحلة من غير بنات
وعاملها اخوان
انت واخوك ليكم صبر غريب
انا بعتبرك مثل اعلى في القدرة على التحمل والصبر

MiraMar said...

أنا مبسوطه جدا
لما شفت اسمك بالصدفه عند "نبيذ"
ياترى هو لا مش هوه
محمود عزت بتاع طب
اتأكدت طبعا لما لقيت يومياتك
والطب والامتحانات وسنه سادته
:)
انا اول سنه تكليف السنه ديه
رسالويه قديمه
يمكن متعرفنيش اوي بس انااعرف خطيبتك واختها
بجد هايل البلوج بتاعك
واشعارك حلوه جدا
ربنا معاك
هبه سمير

e7na said...

الحمد لله انك عرفت ناس وبلاش تندم اهم حاجه انك عرفتهم

الابن الضال said...

قول للأخ اللي اشتغلكم ببرنامج وهمي للرحلة "كتبت عليك كذبة"...ولا ايه يا أخ؟؟
:D

شقلوطة said...

يا بختك يا عم
;(
ماشاء الله ..اهو أنا نفسى من زمان فى يوم زى ده
ربنا يكرم

Ma3t said...

فعلا الرحلات دى بنفرق اوى, و بتخلى الواحد يعرف ناس معاه فى الدفعة ماكانش على لباله انهم هينسجموا مع بعض كدة

السنة اللى فاتت - سنة 3 علوم- طلعنا
رحلة بس كانت يومين , تدريب فى الغردقة و مع عينات. كانت من احلى الحاجات اللى حصلتلى فى الكلية, كاننا كلنا لسة واخدين بالنا من بعض, و اما رجعنا الكلية تانى بعديها, كانت علاقتنا كلها اتغيرت, بقينا اقرب للعيلة الكبيييرة اوى عن اننا نكون زملا بس

أحمد الشمسي said...

ربنا يبسطك كمان وكمان يا سيدي

محمود عزت said...

نبيذ
كان يوم جميل :)

أحمد
الرحلة كانت جميلة يا بيسو والله
المرة الجاية حبقى أعزمك تطلع معانا :))


ميرامار
أهلا أهلا
إزيك يا دكتورة هبة !
أشكرك
أنا مبسوط بالصدفة السعيدة دي :)
و خليكي هنا على طول :))


إحنا
انا ندمت بس على إني عرفتهم متأخر
بس على رأيك
المهم إني عرفتهم


الإبن الضال
لا ما هو هرب من الموضوع ده عن طريق عمل إستفتاء على البرنامج و طبعا مخدش ولا صوت !


شقلوطة
توكلي على الله من غير تفكير
خديها مرة واحدة و قرري إنك تاخدي يوم راحة :))


ماعت
فعلا , لما رجعنا كنا بنسلم على بعض بود ضخم جدا !
أنا مبسوط فعلا بأثر الرحلة دي

أحمد باشا الشمسي
ربنا يكرمك يا باشا
و يبسطك على طول يا دوك

fanan fa2eer said...

كمان طلعت أبو هيف يادكتور؟
يابختك ياسيدي بالرحلة دي
تعرف أنه بجد حكاية انك تقابل ناس جديدة في سنة ساته دي وتكون منسجم معاهم حاجة تغيظ؟
مش عارفة بيبقوا مستخبيين فين دول ولا يمكن احنا اللي كنا مستخبيين
وحلوة فكرة بروجرام الاعتكاف ده

YHYيــوســف الـمصـرى said...

ياسيدى مش كنت تعزمنا معاك
انا بقالى حوالى 5 سنين مطلعتش رحالات :(
تحياتى وفعلا شكله كام يوم كويس

Anonymous said...

يا اخى سبحان الله اول مرة دخلت المدونة كنت مستبضنك.
مؤخرا بقيت بحبك قوى و متابعك علىطول
بقيت حاسس ان انت واحد صاحبى.
تصدق ان انا بعد ال بوست ده فرحان لان انت فرحان.

المريد said...

بعد خمس سنوات من التخرج لسة فاكر متعة الرحلات اللي كانت مع ناس مكنتش اعرفهم كويس قبل الرحلة وحلاوة الايام دي لسة في قلبي رغم البعد والغربة.على بساطة موضوعك كلامك كان من القلب ووصل للقلب وخلاني سعيد وكأني كنت معاكم