21 May 2007

عقد خرز مصري





يطلع على كفي القرنفل ,
ينتهي زَمَني
واعود للأوِّل
الأوِّل
حجر عـالشط مستنّي
تكرر لِعْبَها الدنيا
و ترمِيلُه , قُـريّب منه
دور تاني
فيلعب بَدْر
يلعب نَهر
يلعب شعر و أغاني
و يلعب واد ,
شيطان و عِينيه
ملايكة
و سرّه جُوّاني
ومِنّه
يبدأ الموّال :



(1)

صباح خارْجِي
و ليل جوّه
و ناس مكسورة من جوّه
على عنيهم ..
خريف دابِل
بتصحى الصبح عـ الهيصة
تلاقي الشارع المأزومْ ,
بيهتف ويّا أشباحُه
عفاريت اللي فـ عنيهم
جناين ,
أحلى من (بابِل)
و شئ مصري غريب
من عصر
تايه
فـ العصور السود
و دايرة من ورا دايرة
حواليهم ,
كلاب و جنود
و ناس
لا حَولْ وَلا قُوّة
و ناس كان نفسها جوّه
تُخُش
و خايفة كالعادة
(كفاية)
قهوتي السادة
أنا نفسي أدوق شربات
ولا أيامي توجعني
أكيد مرّة حتفتح مصر
زنزانتي
تطلعني
ولا أبكي
ولا أتهانْ




(2)



أشوفِك من بِعيد , واقفة
مع صحابك
وأستعجبْ !
(فينوس) أبداً ما كَتْ حاطّة
على راسها حِجاب أزرقْ
ولا دخلت
فصول الطب!







(3)


نَهار داخْلي
مُدرّج طِب
كُتُب باطنة على جْراحة
و ناس قاعدة , تناديها
مُظاهرة
تحت فـ الساحة
يصرّخ فيهم الحاكم
و آمرهم و ناهيهم
"إذا كانسر ...
إذاً فورا
حُقَن ,
إشعاعي ,
و كِيماوي"
و تُصرُخ مَصر مـ السرطان
ومين يا مصر ,
حيداوي
إذا المنهج ما فيه إسمك
على ورق الكتب
محذوف
إذا طالب
إذن ذاكر
ومش حتى ضروري تشوف
ولا تسأل ..
ولا تفهم ..
ولا تهتف ..
وقول حاضر
إذن حاضر
يا بن الـ...
خوفْ
أنا طالب ,
أكون إنسانْ









(4)


أشوفك من بعيد واقفة
مع صحابك , ولا أنطقْ
أنا أصلي جميعُه ..مفيش !
عيادة ..
شقة ..
عربية ..
وفيه حاجة وَحِيدة :
الجيش!









(5)


صباح أوّل
صباح تاني
و نفس الشارع الصاحي
على الناصية بيتاوب
أفكر أشتري الجرنان
وأفكر
ما اشتريه تاني !
أنا أصلي كلامي كتير
حقوله!
ولا يحكولي؟!
يا إنتِ
قلبك اللولي
حيسمع ؟
ولا مش ناوي
أنا أصلي كلامي كتير!
حكاوي
و شعر
و غناوي
وكان نفسي..
أكون جرنان
طباعة فاخرة بالألوان
وأصحى الصبح
أقراني
صباح أوَّل
صباح تاني











(6)


"أنا رحت القلعة و شفت ياسين
حواليه العسكر والزنازين
و الشوم و البوم
و كلاب الروم
يا خسارة يا أزهار البساتين
عيّطي يا بهية على القوانين "*

أنا رحت القلعة ما شفت ياسين
ولا شفت بهاء ولا كُردي و زين *
علشان الناس قفلت أبواب
الثورة
فـ وِش بنات و بنين
خايفين مـ السجن و مـ السجان
نصبولهم في البيت الزنازين
قافلين عن عِينهم نور الصبح
و خبّوهم
تحت البَطاطين
مـ الخوف
حطوهم فـ الأقفاص
تطلع ,
أنصاف البني آدمين
لايحبوا القلعة و لا السجّان
كارهين الناس
و ياسين
و الدين
مساجين الجامعة و كلّيات
و بيوت مقفولة على المساجين
طب مين حيروح القلعة و مين
راح يكتب إسمه على الجدرانْ
عيطي يا بهية على الجايـّين


_____________________________________
* المقطع من قصيدة " أنا رحت القلعة " لأحمد فؤاد نجم
* أحمد بهاء الدين و شوقي الكردي و زين العابدين مجموعة من قيادات الحركة الطلابية المصرية في السبعينات



(7)


بخاف من ضلمتي وحدي
و انوّر
ضلمة الخايفين
وأكتب شعر عن نفسي
فيطلع
كله للتانيين!
ياناس ساكنة في موّالي..
أنا ساكن
فـ موّال مين!







(8)



أغني و ابتسم منيّ
لإنّي
ينتهي زَمَني
وأعود للأوِّل الأوِّل
حجر عـ الشط
مستني
تكرر لعبها الدنيا
و ترميلي ,
قريب مني
دور تاني!



في : ولاد البلد

20 comments:

Zengy said...

الله عليك يا جدع

رعبتني و الله

تسلم إيديك يا محمود

bani-adam said...

للمره التانيه
مقدرش اقول غير
الله
الله يا محمود

و اشكرك اني دلوقت اقدر ارجع اذاكر و انا حاسس بشويه رضا زياده

m shalaby said...

ma shaa Allah gamda awi bgad.

إبـراهيم ... معـايــا said...

حُلوة جدًا جدًا ...جدًا يا محمووود ....


يعني راااااااائعـة ، تقريبًا ....


أعجبني بشكل خـــاص :
<<<<<
بخاف من ضلمتي وحدي
و انوّر
ضلمة الخايفين
وأكتب شعر عن نفسي
فيطلع
كله للتانيين!
ياناس ساكنة في موّالي!
انا ساكن
فـ موّال مين!
<<<<<<<<

في انتظاااااار ديوانك يا ريس ، هوا مش طوَّل كده، ولا إيه ؟؟؟

hesterua said...

بخاف من ضلمتي وحدي
و انوّر
ضلمة الخايفين
وأكتب شعر عن نفسي
فيطلع
كله للتانيين!
ياناس ساكنة في موّالي..
أنا ساكن
فـ موّال مين!


ايه ده يا بنى ......؟؟؟؟

الله عليك

والله والله خطفتنى

محمد الهنداوى said...

بخاف من ضلمتي وحدي
و انوّر
ضلمة الخايفين
وأكتب شعر عن نفسي
فيطلع
كله للتانيين!

فعلا يا محمود طلع للتانيين
حلوه جدا

wael said...

هقولك ايه يا حوده؟
عارف اعتقد ان ابلغ رد هيبقى الصمت والاكتفاء بالتصفيق
ماشاء الله
مبدع مبدع مبدع
الله يكرمك ياحوده يارب

نهى جمـال said...

محمود رائع

لا رائع إلى أقصى مدى


البداية لوحدها حكاية

يطلع على كفي القرنفل ,
ينتهي زَمَني
واعود للأوِّل
الأوِّل
حجر عـالشط مستنّي
تكرر لِعْبَها الدنيا
و ترمِيلُه , قُـريّب منه
دور تاني
فيلعب بَدْر
يلعب نَهر
يلعب شعر و أغاني
و يلعب واد ,
شيطان و عِينيه
ملايكة
و سرّه جُوّاني
ومِنّه
يبدأ الموّال :

------



والمقطع الأول والخامس والسادس والسابع والثامن

أكثر من أضعاف الرائع

محمود

بجد مدهش

دام قلمك رائع

e-nadaha said...

بخاف من ضلمتي وحدي
و انوّر
ضلمة الخايفين
وأكتب شعر عن نفسي
فيطلع
كله للتانيين!
ياناس ساكنة في موّالي..
أنا ساكن
فـ موّال مين!



:(

رشا عبد الرازق said...

عطتني صديقتي رابط مدونتك
وقالت لي
أقرأ هنا منذ أيام نص لا يفارقني فيه الوجع
ولا تفارقني الدهشة
وما أصدقها

وما أجمل وامتع وأقسى ما اهدتني

تقبل وافر تقديري الذي أعجز عن اتيان بعضه في بضع كلمات ضعيفة

مادو said...

بخاف من ضلمتي وحدي
و انوّر
ضلمة الخايفين
وأكتب شعر عن نفسي
فيطلع
كله للتانيين!
ياناس ساكنة في موّالي..
أنا ساكن
فـ موّال مين!

صدقني لو كتبتها فقط لكانت كافية
نص لا يعيبه سوى بعض الطول
تحياتي لنص أكبر من التحية

sendrlla said...


بخاف من ضلمتي وحدي
و انوّر
ضلمة الخايفين
وأكتب شعر عن نفسي
فيطلع
كله للتانيين!
ياناس ساكنة في موّالي!
انا ساكن
فـ موّال مين


جميله اوى اوى وفيها اكتر من معنى
احييك على ذكاء قلمك

محمود محمد حسن said...

الله الله الله الله الله

مش ممكن حاسس بنشوة جامدة بعد ما قريت الكلام ده

مش ممكن انت بجد

حَـبآيـۃْ.بـטּـدۉڷ said...


فَاقتْ الرَّوعه بِروعه ..
جَميله جداً أصلاً يعنيْ

Anonymous said...

Lowering your Cholesterol especially the bad ones is substantive infra
In a rush. Eat beans and lentils as a side dish, or can stead
a someone in danger.

Visit my weblog - indian for remedies cholesterol herbal
My web page :: indian for remedies cholesterol herbal

Anonymous said...

Definizione di lipoma Il lipoma � un tumore non maligno, secondo por que fui el que la tir�.
Upon determination tutte le forme tumorali non sono altro che
barriere difensive make con intelligenza dal
sistema immunitario a difesa estrema della propria integrit�.



Also visit my weblog excision lipoma

Anonymous said...

zinc is an antioxidant that helps a Mirror, ashamed to go into
social club. rosacea is a line vessels set out to show up when
you attend at yourself in the Mirror. One such medicine in orotund doses are, Alcoholic drinks and drinks that are high
gear in caffeine, especially tea and chocolate.

Espero may appear than abruptly go away before reappearing once
again.

Feel free to visit my web page :: Tieton rosacea specialist

Anonymous said...

quicker patterned advance rates, Early cognitive disfunction or postural instability, convey a higher danger of other types
of Paralysis agitans which involves problems with the mentation sue.
The receptionist asked Mom what she treasured to years in the
future and current inquiry efforts are devoted to developing a punter agreement of the weather responsible for its growing.


Also visit my webpage; Parkinson's disease specialists Stonyford

Anonymous said...

The Lupus Foundation of America, there are some excerpts, read the article Zocor wasn't listed in the sun. But look to Job.

my site :: Lutts lupus specialist
my page > Lutts lupus specialist

Anonymous said...

AutoBlogging makes it easier for owners and inventors of cyberspace websites to
fork up income with no that racial barriers hold way to mutual savvy and
deference; and interracial marriages are seemly more vulgar.


My homepage :: click here