11 May 2007

صباح التنجيد المجيد




لما فتحت عيني الصبح قعدت أفتكر إحنا يوم إيه , المفروض إن صباحات الجمعة تكون مصحوبة بالقرآن أو التواشيح البعيدة و شمس تفرد عضلاتها فوق البيوت و خلف النافذة
النهاردة صحيت على صوت تامر حسني :
مفيش حتى نية...تعيش مرة ليا
فكرته كالعادة توكتوك _ أبناء الميكروباصات غير الشرعيين الذين يملأون الشوراع_ و حيعدّي من تحت بيتنا و الصوت حيتضاءل شوية بشوية لحد ما يختفي , لكن الصوت فضل بنفس القوة , شوية و لقيت كاظم الساهر دخل في الموضوع و بعده لؤي
رحت البلكونة و هناك قالت لي أمي أن النهاردة يوم تنجيد بنت الجيران التي اقترب زواجها
انفعلت جدا ... الخاينة ! , إزاي تعمل كده ! و رغم إني بقالي سنين أصلا مشفتهاش بس إزاي بنت الجيران تكسر قلبي بالشكل ده و تتجوز !
و مهما كان , حتى لو مكنش فيه بنا أي علاقة..بس في النهاية هي بنت الجيران و لازم أنهار لما أعرف إنها حتتجوز
واصلت الإنهيار جوا و أنا بعمل الشاي و بغني مع "سوما " التي يصلني صوتها من الشارع:
ياسمين..ياسمين
على فين رايحين
_ كنت أعوّل كثيرا على سوما والله , صوتها جميل جدا بس قتلتني بـ" ياسمين ياسمين "بتاعتها دي و الكليب الذي تعاني فيه من مشاكل القولون قرب البحر _
ساعة تقريبا و "عامل" الدي جيه, وهو كائن عديد الأذرع يرتدي كاب يتواجد في الأفراح , يحاول إبهار الشارع بقدراته الفذة في إعادة تلحين و توزيع الأغاني مثل أن يجعل السوما تتهته لمدة نصف ساعة _كنت حطلع أشتمه والله _ أو يعيد مقطعا بذاته عدة مرات دون أي داعي ناهيك أن يشغل أغنية مثل :"ياسمين ياسمين " يوم التنجيد المجيد..
معلش يا عمرو
أحلامك تبخرت في الهواء مع غبار القطن الذي يتم عجنه تحت
النهاردة أول يوم جمعة من شهور أصحى فيه قبل الصلاة بساعة كاملة
حاسس إنه حيبقى يوم مجيد برغم التنجيد الصباحي ده و برغم خطبة الجمعة الي حسمعها كمان شوية و برغم إن يوم الجمعة عمري ما عرفت أذاكر فيه أو أعمل فيه أي حاجة...


تحديث :
دلوقتي كائن الدي جيه مشغل أيظن ُ , أيوه كده يا عم ! , ياسمين ياسمين إيه و تامر حسني دول بس ياعم الحاج ..فيه فرح في إمبابة تشغل فيه الحاجات الكتاكيتي دي...خش على سعيد الهوا و أركب الحنطور و سموا عليكوا سموا عليكوا... house دا rock!
سلام يا رجالة...أنا نازل أرقص :)



9 comments:

Abd El Rahman said...

لسه شوية ويدخل على حكيم ، التنجيد والحنة لازم فيهم حكيم ويعدي باغنيتين على ريكو

ارقص ياباشا ... مبروك ع الغلاف ومستني الديوان يا بااشا

لبنى شبلي said...

تسجيل حضور ومتابعة :))

لروحك المنسابة بالحقيقة وردة

لبنى شبلي

wael said...

حوده باشا استناني انا عايز ارقص معاك وقول لمصطفى ينزل برده كده يعبر عن نفسه الواد برده عنده كبت

Dananeer said...

ياسمين ياسمين دى
خلتى اضحك زى الهبله دلوقتى
و ضحكت العيال عليا

اهو كده اقولك حمدالله على السلامه
:D

Mina said...

ههههه

الف مبروك .. ومعلش بقي بنت الجيران نفضتلك :D

شقلوطة said...

أنا بقى أحلامى اتبخرت فى الهوا أكتر منك
علشان مفيش ابن جيران من الأساس
حاجة تقطع القلب
...
بوست لذيذ يا محمود كعادتك ..طلعتنى من مود ابن لاذينا

Bassma said...

مبروك لبنت الجيران و عقبالك .. بس هو لو ما كانش في كائن دي جي متعدد ازرع يبهر الخلق ممكن تسميه فرح ازاي ؟

بنى أدم مع وقف التنفيذ said...

هو مفيش بنات جيران تانين ولا اية

نبيــذ said...

ههههههههه