28 March 2007

عن روبي و التعديلات التوربينية _ إعادة تحميل












في البداية , هذه التدوينة هي محاولة للتهييس الحلال الذي لم يحظره الدستور بعد , ولا فكر السيد الرئيس في تعديلات بشأنه , عشان أنا اليومين دول قرفان بجد _ و دي أول مرة تحصل في حياتي _ إني فعلا أكون قرفان بجد و بشكل عام بسبب حاجة زي الإستفتاء الأخير..

طول عمري كنت بحس إن الحاجات دي بعيدة جدا , إنتخابات مجلس شعب , إستفتاء رئاسة , قانون الصحافة ..مش حيحصل حاجة و حقوم بكرة الصبح أروح الكلية و أشوف سوسن و أتخانق مع مصطفى صابر و أتريق على مصطفى مختار.. الموضوع كان بينتهي إني بكتفي برأيي الشخصي و أنسى الموضوع برمته أو كده كده مفيش تهديد لليومي و المعتاد..

إنما المرة دي فعلاأنا بمشي في الشارع مخنوق و كل ما أشوف أمين شرطة أو ظابط أو أي رتبة ولو حتى خفير نظامي , بحس إحساس أطفال الشوارع بين إيدين التوربيني على رأي مصطفى صابر , اللي قعدنا طول الليل أنا وهو بنتناقش في موضوع التوربيني و علاقته بتعديلات الدستور
و على رأي الشاعر العظيم :

يا شعب يا طيّب
صوّت و غطيني

طلع الرجا خايب
منك طلع ديني
عايش عيال شاردة
و حكومة توربيني






المهم..
بدأت علاقتي بالمذكورة _قبل ما تتحجب و تتلزم بالقوانين_ إني شفتها من سنين طويلة في إعلان عصير , تقريبا كان فرجللو , و معرفش ليه كنت بفكر على طول "هي البنت دي متخيلة مثلا إنها حتبقى حاجة مشهورة ؟ " و أحس بالبؤس علشانها عشان كلها كام سنة و حتتنسي و مش حتبقى نجمة ولا حاجة _ نفس الموضوع برضه مع ميس حمدان بتاعت "كيف الحال" , كانت بتعمل إعلانات عبيطة زمان _ , كنت أسأل السيد عمرو فيقولي : هي بتعمل كده عشان تاخد فلوس , بتشتغل يعني..
أنا فاكر الحوار ده كويس , فاكر الإعلان يا عمرو؟؟ :)


و بعدين لقيت البنت بتاعت العصير في فيلم سكوت هنصوّر ليوسف شاهين , و مش فاكر إني علقت على الموضوع بأكتر من " إيه ده...إلحق يا عمرو ...دي البت بتاعت العصير ! "


ثم تمر الأيام و تنطلق روبي في سماء الفن و تصبح نجمة مشهورة و لها كليبات خالدة و تؤسس لنظريات إجتماعية يتحدث عنها عبد الوهاب المسيري و أنا في كل ذلك أقف على الحياد ككل شباب مصر , متفرج يعني بلا تعليق , اللي بيوصل لأذني في الشارع و على القهوة بيوصل لأذني الداخلية دون مجهود..


لكن المرة دي , و بعد أن رشح لي أكتر من واحد شريطها الأخير , بل لقيت لنك لتحميله كاملا , قررت أسمع ألبومها الجديد و ذلك لإني في الحاجات دي مغامر جدا و فضولي لأقصى درجة فمابالك لو كان الأمر يتعلق بروبي , الأسطورة الشعبية على رأي عمرو , و الشريط حلو بالمناسبة , تسمعه أو ما تسمعوش فدي حريتك الشخصية اللي مش ححرمك منها بتعديلات أو غيره , لإن كما قال التوربيني :الشعب قال كلمته...
و كمان لإني بحب لوحات بيكاسو الحرمجي و أشعار كفافيس الشاذ جنسيا و موسيقى بيتهوفن الذي لم يكن يصلي في جماعة , فلا أرى حرجا من الإستمتاع بأغاني روبي التي قررت أن تقدم في ظروف غامضة أغاني تعجبني شخصيا



12 comments:

Hany el-Gaml said...

f3la...3ezzat dayman bywfy be wa3do..wa3dt fa waffet ya mahmoud..2oltily hankteb 3an ruby w katabt be kol shga3a...a7ayek be shedda w fe entzar link le ta7mel el clip elly ya reet tefadelo topic lew7do...gazak Allah kol kheer

wael said...

ههههههههههههههههههههههههههههههههه
انا قريت الموضوع من شويه بس بكتب الكمنت دلوقتي عشان لسه مخلص ضحك حالا
بجد انت التعديلات الدستوريه ضربتلك فيوزات كتير يا جدع
على العموم مش هيحللك الموضوع ده غير اغنيتين جامدين من حسنوف يعلولك دماغك مع قرش الكابتشينو بتاعنا

M. Mehrez said...

تصدق الشريط في اغنيتين جامدين اوي، هي صوتها واقع بس الكلمات والموسيقى لذيذة

انا كمان اول مرة اكون مخنوق ومحبط بالشكل ده، واللي يحبطك أكتر إنك تلاقي الناس بتبص لك على إنك مجنون ومزعل نفسك على حاجة المفروض متهمكش

نبيــذ said...

تفتكر ان روبى علاج فعال ؟

Nour said...

أنا فاكرة إعلان فرجللو ده.. كنا بنتفرج عليه أنا و إخواتي عشان نشوف البنطلون اللي واصل لزورها اللي كانت بتلبسه فيه

ert3ashat said...

ايوه كده يا محمود...روبي هي الحل...روبي هي الحل...احييك بشده على موضوعك و يا ريت تفضل تكتب في المواضيع الهادفه ديه

Omar said...

هو للغرابة الشديدة الألبوم حلو فعلاً، بشكل خللاني استغرب الحقيقة، سبحان الله، انا كنت بافكر انشر تحليل للألبوم، لقيتك جايب سيرته، بس هانشر برضه بالعند فيك، هو هتبقى انت والدستور يا عم :-p

أحمد عبد اللطيف said...

روبي .....
من شويه كان فيه تصويت على موقع عشرينات و قلت مش هاسمع الشريط

و حتى لو كانت الأغاني حلال أنا منضم لحزب شريف منير في إن روبي دي هتودينا في داهية و أنا مش ناقص

كفاية عليا الدستور

sally said...

واضح جدا أثر التعديلات عليك يامحمود
بس يازميل زي ماكانت زميلة أخري بتتريق وبتقولي انهارده القادم أجمل وأنا قولتلها أتمني
تعرف هما عاوزين يعملوا في شباب البلدي ايه يامحمود؟عاوزين النص اللي لسه عنده عقل بيفكر يهج ويسيب البلد والنص التاني يبقي زي روبي والبلد تفضي عليهم ويخلصوا عليها اكتر ماهي خلصانه
ربنا يسترها
وعلي فكره سعدت جدا لما عرفت انك كنت ناوي تكتبلي تعليق علي المدونة بتاعتي وهاسعد أكتر طبعا لو لقيته مكتوب بالفعل
وبالنسبه للتعليق اللي جه علي شعرك عندي في المدونة فأنا مارديتش لأن الرد مامنوش فايدة صدقني الناس عمرها ماهتفهم مهما حاولنا نبرر أو نشرح

مـحـمـد مـفـيـد said...

حبيبي ابو خليل

بجد والله العظيم انت عارف من ساعه حكايه الاستفتاء ال..........وانا مش طايق نفسي
بجد مش عايز اكتب ولا اقرأ ولا افكر في اي حاجه خالص
شويه كده ونغير المود
المهم الاخت الفاضله روبي
كانت في ىالبيت بيتك ( وعارف الاسم اللي عمرو بيقول عليه ايه )عملوا لها حلقه خاصه يوم الاربع او التلات مش فاكر وهات يا مدح
مش هولك بقي
شعب ايه
اديني في الهايف وانا احبك يا فننس

معلش مقصر معاك يا حاج بس انت عارف وشايف الظروف يا باشا

يا مصر اكتب إليكي رسائلي said...

بمناسبة ذكرى المولد النبوي الشريف ،
يسعدني انت انتهز الفرصة لأتقدم بخالص التهاني
وأطيب التمنيات القلبية
لكم والأسرة والأصدقاء ، وكل عام وانتم بخير

rasha said...

هو من ناحية تهييس هو تهييس..
و الله ربنا يعيننا..
القهر اللى الواحد حاسس بيه ده جاى مصلحه على فكره..
عمرى ما كنت حافكر اسمع البت دى..دلوقتى بقى حاسمع و مش عارفه ليه حاسه انه حيعجبنى..
و الانيل..مش بعيد احمله..

هو فرجللو ايوه..
و بالاماره البنطلون اللى بتتكلم عليه نور ده كان ساتان موف باين او بينك..
ههههههه..عجيبه و الله..
هههه