19 February 2007

....إسمي : محمود عزت





زمان كنت فاكر إني المخلوق الوحيد على الكوكب اللي إسمه محمود عزت , لحد إعدادي تقريبا مسمعتش إن فيه حد إسمه محمود عزت غيري ..

أفتكر مرة كنت ماشي في نادي الترسانة و لقيت حد بينده : يا محمود يا عزت ! , فطبعا أنا إلتفت أشوف مين بينده عليا ! , لقيته بينده على حد غيري , واد قدي و بيلعب كورة مع أصحابه قريب مني ,فكرت أروح أصافحه و أهنيه إن في إتنين بس في الكون إسمهم محمود عزت و إتقابلوا أخيرا !


برضه في ندوة من ندوات الروائي "محمد جبريل" فوق سطح نقابة الصحفيين, و كنت أول مرة أروح , كان المفروض إن الناس الجديدة بتعرف نفسها ,سألني إسمك إيه ؟ قلت : محمود عزت , لقيته إبتسم و قاللي : إسم فني...إسم موسيقي :))
فحسيت بالزهو لفترة لم تطل لإن الندوة حدث فيها ما لايحمد عقباه نتيجة إني قلت قصيدة بتقول من الأخر يعني : أيها الشعراء..إطلعوا من نافوخ أبونا الله لا يسيئكم !

أما أظرف شئ حصل نتيجة إسمي , فهي إن صديق طلب مني مقالة " يبكي و يضحك لا حزنا و لا فرحا " للنشر في مجلة أدبية على النت , و بالفعل , بس نشروا جنبها صورة د. محمود عزت أحد أكبر كوادر الإخوان المسلمين !
الموضوع تم تداركه بعدها بالصورة العجيبة اللي حطوها دي , بس قعدت أفكر في الميكانيزم اللي كان بيفكر فيها المحرر!
قال أحط صورة للجدع , و عمل سيرش و راح حاطط أول صورة طلعت ؟

أما بقى المذهل بجد إني لقيت مرة واحد صاحبي بيقوللي إيه التعليق اللي إنت كاتبه على موقع العربية ده ؟ , قلت أنا مش بعلق على أخبار العربية خالص!
فراح مديني لنك لواحد كاتب تعليق بإسم محمود عزت و تحت التوقيع : " اللي مجنن الحريم " أو حاجة زي كده !
و بعد تحريات بسيطة عرفت إن فيه حد رابع _ غيري و غير بتاع النادي و غير د.محمود عزت _ له نفس البصمة الحرفية ألا وهو شخص ظريف جدا يعلق في منتديات كثير و أمكان أكثر و يصر على أنه "برنس الحريم " و "ساحر النساء "و ما إلى ذلك..

عملت له add على الماسنجر أشوف ملته إيه
إتكلمت معاه و عرفته بنفسي و بتاع و بعد فترة لقيت رسايل أوف لاين بتوصلني منه
كلها واضح منها إنه بيرسلها لكل الـcontacs اللي عنده على الماسنجر
ساعات كلمات أغاني أو مقاطع من شعر و كلها برضه مذيلة برقم موبايل

فكرت أغتاله لعدة أسباب :
أهمها إن ناس كتير لما بيشوفوا الإسم بيفتكروه أنا و ببقى ملزم أحكي الحكاية و أفسر الموضوع لما حد يقوللي : محمود يا عزت ...إيه اللي إنت كاتبه ده مش عارف فين !

و رغم إني بعد كده خلال بحث على جوجل لقيت إن للأسف الكون مليان ناس إسمها محمود عزت , أحدهم أحد شهداء إنتفاضة القدس الأولى, إلا أنني منزعج بشدة من الأخ محمود عزت اللي مجنن الحريم ده !

حد يعرف حد تاني إسمه محمود عزت ؟



14 comments:

نورهان مفيد said...

انا عن نفسي معرفش غير محمود عزت واحد بس او الدكتور محمود عزت بن عمتي
وبعدين يادكتور يخلق من الشبه اربعين مش مهم الاسم المهم الشخصية
شدحيلك عشان يطلع بعد كام سنة ولد اسمه محمود عزت يعمل بحث عن النت علي اسمه ويلاقيك ع النت اشهر دكتور في تخصصك ربنا يوفقك يادكتور

bani-adam said...

يا باشا مش كل محمود عزت يبقي محمود عزت.
و بالنسبه لمجنن الحريم ده,ممكن نغتالهولك و نريحك منه,بس متضايقش انت نفسك.
يلا كل سنه و انت طيب.

رانيا منصور said...

محمود بن عزت!
عرفت اسمك كده!!
ومعرفش حد تاني بيكتب بالشكل ده!

تعرف..
عمري ما فكرت في كام رانيا منصور مثلا!
تبقى مصيبة!!
(سمايلي مبتسم وبس يا محمود) ودي ف حد ذاتها اليامين دول معجزة!!

Anonymous said...

i did search for my name on the net and the result is NO RESULT MATCHING :) it's the first time to do search and i find this and feel happy as i'm one in the world and i think this good for the sake of the world not me :)

أحمد عبد الهادى said...

إحم إحم

http://www.shbabmisr.com/?xpage=view&EgyxpID=8762

:)

أحمد عبد الهادى said...

مجموعة أناشيد للمنشد خالد عبد القادر

http://www.inshad.net/bojasoom/Liqa2/liqaa2.html

:)

M.Al-Qaisi said...

ضحكتني والله يا حوده

أصل أنا عكسك تماما.. عمر ما حد نده وقال يا محمد ورديت
لاني عارف ان نص مصر اسمهم محمد

عشان كده في ثانوي اخترعت لنفسي اسم اتعرفت بيه في المدرسة وبعد كده في الكلية.. وهو محمد المصري.. وناس بقت تندهلي دايما "مصري" "مصري"

أو "مصيي" في بعض الأحيان


تحياتي يا محطم قولب العذارا ;)

أبو البنات said...

أولاً من ناحية أن الأسم موسيقي نوعاً ما فهذا ما أشهد به حقاً كأنه وصف لموصوف كأن تقول الورد جميل مثلاً ، وثانياً أنا لا أعرف أي محمود عزت آخر ولا هذا الذي هو مجنن الحريم ، وتقبل تحياتي على طرافة المقالة . (ياسر)

مـحـمـد مـفـيـد said...

جامده اوي اللي مجنن الحريم دي
:))))
انا اعرف واحد اسمه محمود عزت هو قريبي من قريب قوي
بس مجنن الواد عبد الله ومطلع عينه بالارنب و الجوانتي والفيل اللي عمرو خدوا
:))))))

شوق الياسمين said...

هههههههههههههه

حلوة دى

شوق الياسمين said...

على فكرة انا بقرالك من زمان
وفرحت أوى لما عرفت عن ديوانك

الف مبروك يا محمود

Amr Fahmy said...

مسلية وبرنس الحريم ده رهيب اوي
وحركة د.محمود عزت شديدة طبعا

استمتعت

big big girl...in a big big world said...

تصدق بالله ضحكتنى موت
الواحد كان راجع من الكورس مش شايف قداممه
عارف انا كمان كنت فاكره ان مفيش عيلة خاطر غرنا هنا
و مفيش اكيد مى تانيه او احمد تانى و كده
و كنت بقول الكلام ده للناس بكل ثقه
و اذ فجأة
الاقيلك الدنيا اتملت خواطريه من كل حته
محلات شايله الاسم ده
و ناس حيه
و حجات غريبه
بس على العموم مصلحه لان انا بحبه كتير

وعد من اختك يا فاندم اول لما الاقى محمود عزت تانى هبلغك علطول
و لو عرفت اجيب رقم بطاقته مش هتاخر

ذاكر كوييييييييييس

سلام
:)))

sendrlla said...

ههههههههههههههههه على فكره لازم الانسان يدرك ان فى من اسمه كتير اوى

انا كنت مفكره نفسى زيك كده ومحدش اسمه زى اسمى فعلا لانى الوحيد فى المدرسه اللى كلن اسمها ر خاصة انى كل ما اقول لحد اسمى يقولى ايه اكرره لحد ما دخلت الاعدادى ولقيت بنت واحده على نفس الاسم المهم ان الاسم كان بيعجب ناس كتير وكل محد يشفنى يسمى بنته بنت خالته المولوده كده يعنى على اسمى

بعد كده دخلت الثانوى وفضلنا بنتين بس بالاسم دا دخلت هى كليه وانا كليه تانيه وكنا صحاب زمان فضلت انا الوحيد اللى فى القسم بتاعى كله اسمه ر ولحد دلوقتى مش قابلت حد تانى بالاسم دا حد يعرف حد اسمها ر