16 February 2007

أنا فزعانة تقوم , عن جد تنساني






يا جيل فيروز
يا متعوّد على صوتها
يدوّر فيك ,
شجن مفصول عن العالم

يا جيل ما حد غنّى له
تحب , تروح على فيروز
تخاف ,

تجري على فيروز
و تحزن
فيها تتحامى

ولو حتى ما تسمعهاش
إذا سألوك
تقول :
فيروز




يا جيل
مالهوش آيات ظاهرة
و جيت الدنيا فِـ مـُـظاهرة
بتهتف
و
انت سامعها
و تضحك
و الهتاف بيبوظ
يشدّه الناس قصاد الناس
يغنوا و يصرخوا عنك
وصوتك
في الهوا منبوذ
تروّح
تفتح الشباك
تجرّب صوتك الرايح
تغنيلك _ معاك _ فيروز

يقرّب وشها الهادي
وفيه

تتخيل العَدْرا
أغانيها
,
صلاة حاضرة
ولو جايز حرام
بـِـتــْجوز
يا جيل خايف
تموت فيروز..
فتعرف
يـُـتم مش هيّن
دا لما كنت مش عارف
تقول
تسمعها , فتبيّن
لنفسك
قد إيه محظوظ
تكون حافظ غنا فيروز
حمام
واقف على روحك
شجر فردوسي

فيك مغروز




يا جيل أغانيه
شبه روحه
قوارب من خشب , عالبرّ
و بتفكرّ تقول حاجة
و تسكت
فـ الكلام تجترّ
و متضايق من الوحدة
و من صوتك
يكون مهزوز
يا جيل عايز غنا فيروز
يكون شارع
طويل , ممدود,
بيتموّج و يتكرر
جنينة , تروح لها بدري
و تخرج منها متأخر
بشر
تعرفها في المترو
فـْ مَدينة
إسمها فيروز



يا جيل فيروز
يا جيل كفرة ,

يا جيل دراويش
ياجيل خايف
تروح فيروز
فميغنيش..
و لا حيعوز


ياجيل فيروز


_____________________________________________

تقاطع مع " أمّة فيروز " لـ "لقمان الديركي "

16 comments:

Nour said...

يا جيل خايف
تموت فيروز..
فتعرف
يـُـتم مش هيّن

آآآه يا قرين.. جيت ع الجرح والله

bluestone said...

يا جيل أغانيه
شبه روحه
قوارب من خشب , عالبرّ
و بتفكرّ تقول حاجة
و تسكت
فـ الكلام تجترّ
و متضايق من الوحدة
و من صوتك
يكون مهزوز
--

الله عليك
جاية على الجرح بجد
مبدعة
من غير كلام كتير

bani-adam said...

جميل
فيروز لو قرت الكلام ده بنفسها اكيد حتبقي مبسوطه
شكرا عالكلام الجميل ده

Manal said...

يا محمود مش ممكن كده.. طيب أقولك ايه بس؟

حلوة اوي اوي اوي اوي

----
يا جيل فيروز
يا جيل كفرة ,
يا جيل دراويش
ياجيل خايف
تروح فيروز
فميغنيش..
و لا حيعوز
----

بجد بشكرك عليها جدا جدا

مصطفى عزت said...

براحة يا بنى علينا شوية ..... حلوة موت يا بنى

Mohamed Mehrez said...

تحفة يا محمود ما شاء الله

هدى said...

حلوة بجد يامحمود

كنت من ايام بفكر هي فيروز بتعمل فينا ايه بالظبط

وما عرفتش اوصل لجملة تعبر عن الحالة ولا عرفت اجيب اسباب ليها

حلوة فعلا

بشكرك

مروة ابوضيف said...

ا جيل خايف
تموت فيروز..
فتعرف
يـُـتم مش هيّن


تاني مرة او يمكن تالت احاول اعلق فمش هاقول غير كلمة واحدة الللللللللللله

Dananeer said...

انا بقالى قرن عايزه اعلق
عليها و مش لاقيه كلام

بجد يا محمود حلوه اوى اوى
فيها شجن شبها تمام

تعرف ساعات بسأل نفسى ياترى فى يوم ممكن نسمع فيروز هنا و نحضر حفله ليها
ولا مش حنطول غير الفقد و اليتم

Ma3t said...

ازاى حلوة كدة!؟
انا باعش مع صوت فروز قصص و حواديت
و كل حالة بابقى فها, بالاقى فيروز تغنيها

انا منشكحة دلوقتى
:)

أمل said...

فيروز ما بتموت

:)

توتة توتة said...

جميلة أوي
انا قريت
cairo شغل
مواضيع التدوينة بتاعتك شدتني

Anonymous said...

فيروووووووووز حياتى ولا بيكفيها كلام ياريت يتعلم الناس تسمع صوتها الملائكى اكيد بيكونواارق واجمل .. ايناس........

adam said...

راااااااااائع
بججد

مجرد حلم صغنتوت said...

هزتني اوي :)
رائعة

light said...

رائعة جدا جدا