30 January 2007

إنت يا عم , كفاية بقى و تعالى أقعد في أوضتك !




كل يوم بصحى الصبح , أفتح الكمبيوتر , أروح أحط الشاي و أتوضى و أصلي , أرجع أقعد على الجهاز و أروح ماسك وصلة النت التانية أمررها ورايا عشان عمرو لما ييجي يحطها في اللاب توب و نقعد على النت أنا وهو في أوضته اللي فيها الكمبيوتر...
إمبارح بعد ما عملت كل ده إفتكرت إن عمرو في بيته هناك على بُعد شارعين..
رجعت الوصلة جنبي و سكت..


كل يوم بجيب الفطار أو الغدا و أقعد آكل و انا بقرا حاجة على النت أو بتفرج على حاجة , و لما إيدي تتشغل في الكتابة أو أي حاجة , أحطها على سرير عمرو جنبي , بعدين لما أنتبه أروح شايل الصينية و أقعد أنضف مكانها على السرير عشان لما عمرو ييجي ما يتخانقش معايا , أفتكر إن عمرو في بيته خلاص..
أسيب الصينية و أكمل اللي بعمله


صحيح بقالي يومين مقيم في حجرة عمرو الملهمة , إلا إني لما رحت عنده هو و رضوى حسيت كإنهم بيلعبوا عريس و عروسة , كام يوم و كل واحد حيرجع تاني يقعد في أوضته ! :)
كنت سعيد جدا و ربعت على الكنبة و قعدنا نحكي عن الفرح , رجعنا كلنا _ أنا و عمرو و رضوى و مصطفى _ لبيتنا عشان نقعد مع ماما و بابا , قعدنا نضحك و نشوف البوستات اللي إتكتبت عنهم و الصور و الفيديو , و رضوى _الطفلة المبهجة _ قعدت في وسطينا تقرا التدوينات كلها ..
كنت حاسس إني بعيش وقت إستثنائي


الفرح نفسه كان حاجة إستثنائية بالنسبة لعيلتنا, عيلتنا المحافظة بشكل مبالغ فيه !
فولتير بيقول : كل من يسعى للتحرر من السلطة الأبوية فهو بطل , أعتقد عمرو بطل من الطراز الأول ..
دايما و بكل سهولة بيتحرر من أي حاجة تتعلق بالمواضيع الخنيقة اللي في الحياة اللي ملهاش أي لازمة , عمرو أسطورتي المفضلة , و شخص أعتقد إنه مميز فعلا , إبتداءا من طريقته في التفكير إلى كونه شخص بيقدر يغير الناس و الظروف اللي حواليه جذريا..
مش بقول كده عشان أخويا , أنا عارف إن لو كنت عرفت عمرو بأي شكل تاني كنت حقول عنه كده برضه ..
ساعات مببقاش مصدق تحولاته في الحياة , المربكة جدا للي حواليه , كتير من عيلتنا الكريمة لسه فاكرينه عمرو السلفي اللي كان بيدخل بيت العيلة تنكمش البنانيت و ما يطلعلهاش حس ! , فنتريق أنا و مصطفى و نقول : لا عمرو بقى بهائي خلاص :)) أو زعيم رابطة الملحدين العرب , لما نلاحظ إستغراب الناس من أفكاره أو طريقته في الحياة..


مش حنسى أبدا أخر مصيف طلعناه , لما رحنا العجمي و لقينا الشاليه سيئ جدا رغم وجود حاجات تانية حلوة بره في الشوارع :) , إلا إنه راح مكلم السيد الوالد و طلب منه إننا ننتقل فورا لشاليه أحد الأصدقاء في الساحل الشمالي , و قد كان , رغم إن الجميع قالوا يلا بقى أدينا جينا و خلاص..
كنت ساعتها بجيب حاجات من بره القرية أنا و مصطفى و لما رجعنا إندهشت من عمرو و من نفسي.. ,
الفرق كان ضخم جدا بين إننا نرضى بالعجمي و بين المتعة اللي كانت في الساحل..
حسيت إن فيه ناس بتعرف تختار حياتها و ناس بتلعب عربيات متصادمة :)



إبن حزم بيقول في كتابه الأخلاق و السير :

وأما الذي يعيبني به جهال أعدائي من أني لا أبالي فيما أعتقده حقاً عن مخالفة من خالفته ولو أنهم جميع من على ظهر الأرض , وإني لا أبالي موافقة أهل بلادي في كثير من زيّهم الذي قد تعودوه لغير معنى , فهذه الخصلة عندي من أكبر فضائلي التي لا مثيل لها , ولعمري لو لم تكن فيّ _وأعوذ بالله_ لكانت من أعظم متمنياتي وطلباتي عند خالقي عز وجل وأنا أوصي بذلك كل من يبلغه كلامي فلن ينفعه اتباعه الناس في الباطل والفضول إذا أسخط ربه تعالى وغبن عقله أو آلم نفسه وجسده وتكلف مؤونة لا فائدة فيها.

نفسي أعيش حر زيك يا عمرو , أنا عارف إني كل شوية بقعد أقولك ياعمرو لازم برضه تراعي أدمغة الناس ,بس بجد , أنا بدأت أحس إني بدفع كل يوم من أعصابي و وقتي و تفكيري و روحي مبالغ باهظة مقابل إني أنال رضى الناس و إتفاقي معاهم

فرحك كان جميل جدا , بجد والله , إنت كنت بسيط جدا و حقيقي جدا , و الناس اللي كانوا موجودين كانوا على طبيعتهم بيغنوا و بيصقفوا , أنا كنت واقف زي ثقب أسود كالعادة , زي ما إنت عارف عن عيلتنا الخنيقة , مش بنعرف نعبر عن الفرحة أبدا , رغم كل البلاوي اللي بنعملها في الصالة انا و مصطفى لما نسمع أغنية من "خمسة لخمسة و نص" ولا "أيظن" جاية من الشارع !
و تقف إنت حاطط إيدك في جيبك تتفرج علينا و تضحك من الدكاترة اللي واحد فيهم بيكتب شعر و التاني حيبقى دكتور في الجامعة بتتحكم فيهم جينات إمبابة الأصيلة يا برنس :)

متزعلش من آل خليفة اللي كانوا واقفين بعيد طول الفرح , كان أظرف تعليق سمعته من حد فيهم إنه مكنش مندمج عشان الناس كانوا متحررين شوية !!
مش فاهم , يعني هو اللي بيحصل في الأفراح العادية اللي بتغض عنها العائلة الكريمة الطرف من سهر و مكياج زاعق و رقص و هز الوسط ده إسمه إيه ...فلكلور !!

أنا حبيت الواد محمد مفيد عشان كده , محسسنيش إني شايل هم تفسير الليلة ليه , كان هو اللي أخو العريس مش أنا و عمال بيظبط معانا في كل حاجة , يروح يجيب القسيمة و يوزع الحاجة الساقعة...

على كل حال

أنا قاعد أهو في الأوضة براحتي عمال أكتب و كل شوية أدور عشان أقولك حاجة , ماألاقيش حد ورايا

مش كفاية بقى و تيجي تقعد في أوضتك !!

21 comments:

Stairway to Paradise said...

ربنا يخليكم لبعض

و عقبالك! :)

Nouran said...

هو انت تقول تعالى قعد ف اوضتك ورشا بيتتني عندها وكانت هتعيطلي اش حا انك عندك اخ تاني البنت رشا تعمل ايه
بس بالرغم من ان الفرح كان طاقق بس لن ينسى وربنا يوفقهم
وعقبالك انت ومصطفى

Dananeer said...

ربنا يخليكم لبعض يا محمود
و يجمعكم دايما

مش سهل بجد اكيد
بس هيه دى الدنيا

صور الفرح كانت حلوه اوى و بسيطه
بس مليانه فرحه و عيون بتلمع
بجد احسن حاجه عملوها
مشفتكش فيهم صحيح

Nour said...

:)))

مـحـمـد مـفـيـد said...

حبيبي محمود
فعلا انا ليس لي اخوات اولاد ولكن والله العظيم انت وعمرو ومصطفي احنا طول عمرنا اكتر من اخوات يمكن بعض المشاغل الهتنا قليلا عن بعض لكن بأمر الله من اليوم لن نفترق ابدا الا مع الموت

ربنا يسعده يارب
وعقبالك يا محمود
:)
انت ومصطفي
:)

مـحـمـد مـفـيـد said...

وبعدين يا ابن عمتي
لو مجبتش صوري مش هقولك هعمل فيك ايه
عبد الله هو اللي هيوريك

Anonymous said...

نفسي أعيش حر زيك يا عمرو , أنا عارف إني كل شوية بقعد أقولك ياعمرو لازم برضه تراعي أدمغة الناس ,بس بجد , أنا بدأت أحس إني بدفع كل يوم من أعصابي و وقتي و تفكيري و روحي مبالغ باهظة مقابل إني أنال رضى الناس و إتفاقي معاهم

--------
فهمت بقى؟ اهو دا تقريبا اللى انا كنت بعمله امبارح

المضحك انى لما قعدت افكر شوية بالليل قلت ممممم انا كدا ممكن اكون فى النص بين الناس اللى بتلومنى و محمود (اللى هو الناس اللى بلومهم ):D

وحاولت ارضى نفسى بالحل دا عشان دماغى وجعتنى

طلعت انت كمان واقف على خطوط وسطية اخرى

شكرا للنسبية :)

كأننا على درجات سلالم او واقفين على مربعات ملونة بين الازرق والأحمر ..مين بقى اللى واقف على درجة اللون الكسبانة ؟
الله أعلم ..ممكن كل واحد يقولك أنا
..
أقدر اقول كل درجة هتكسب نسبة وتخسر نسبة
المهم بس كل واحد يعرف يقف على الدرجة اللى هيكسب فيها اللى هو عايزه مش هيخسر اللى هو كان عايز يكسبه

بعد الرغى اللى أون أون دا

عمرو ورضوى
شكرا عشان أرضيتوا حتة فى عقلى كان نفسها فى اللى ينصفها
go on
ومبروك مبروك
-------
مش هكتب أنا مين المفروض أنك عرفت يا أخ محمود

أبو أمل said...

كل سنة وانتى طيب
ربنا يديم المعروف
ويديم مشاعر الأخوة تلك
تحياتى

Epitaph said...

it's my first comment to your blog
though I visit it a lot..and read "sho3'l cairo"

anyway.. this post is really a special one..I am touched..with every little detail of your relation with your brother..and the whole thing about the special wedding..masha Allah

begad..masha Allah..w mabroook! 3o2balak insha Allah
:)

radwa osama said...

يخرب عقلك خلتني اعيط

BlueRose said...

الله يا محمود
تصدق العائلة دي كل اللي اعرفهم منها حاليا (رضوى و انت و عمرو) بيحسسوني انهم عائلتي
ربنا يخليكم لبعض
و يسعد عمرو و رضوى

شيرين said...

عارف يا محمود
انت والله خلتني اعيط
جميله اوي انك توضح مشاعرك بينك وبين عمرو بالسلاسه دي
انت فنان وحساس
وبعدين حلوه اوي
الواد محمد مفيد
عجبتني جدا

Eman M said...

كلامك جامد جداً :(
معلش ما قدرناش نيجى الحفلة إمبارح

mostafa 3ezzat said...

ana fe3lan ma3reftesh 2emt 3amr ella lama meshy
wana 2a3ed fee el 2oda tegy el sa3a 6 balem hagaty 3alashan 3amr hayegy men el sho3'ol .... ba bafteker we akmel
el wahed ba2aloh kam yom hases en el beet mesh zay zaman .......kona dayman ana we mahmoud ne2ool le mama entoo akeed bet7ebo 3amr akter 3alshan 3andoh odah lewahdoh(hezar tab3an)...........
erga3 ya 3am we khod odtak mesh 3ayezha khalas............
ana kaman ba2ool le mohamed mofeed we sheereen en homa elly kanoh shayleen el farah mesh ehna wana kont hases fe3lan en homa ekhwatana
....bas balash fadaye7 ya 3am mahmoud ...men khamsa le khamsa we nos eih ya ragel .lem el dor ehna dakhleen 3ala gawaz ..wala eih

rasha said...

بجد كلامك مؤثر جدا وحسيت انك قولت كل حاجه انا نفسي اقولها بس مش عارفه ايه رأيك نرجع عمرو عندكم ونرجع رضوي عندناو كفايه كدا علشان انا مش قادره خلاااااااص

نيرمين مفيد said...

ايه الكلام الجميل اوى دة والمشاعر الحلوه دى اللى بتشيلها جواك يامحمود انت بجد جميل اوى وربنا مايحرمكم من بعض سلامى لعمتو كتير اوى
ام عهد

mahmoud said...

الله

amazing_angel said...
This comment has been removed by the author.
amazing_angel said...

really nice post!!i think it worth reading ,i was about to cry !!

sendrlla said...

على فكره العروسه دى فستانها حلو اوى وانا اتاكدت انك تعرف حد اسمه ر

وبعدين موضوع العيله المحافظه دا اظاهر والله اعلم انه مرض وتفشى كلنا بنعانى منه

Anonymous said...

الدليل الشامل للمدونات العربية
سياسة ، اقتصاد ، ثقافة ، حوار ،
أدب ، شعر ، فن والمزيد

http://arab-blogs-guide.blogspot.com/