26 January 2007

سايق عليكوا النبي !




سايق عليكم نبي
عَرَبي
ماهوش أجنبي
الصبح
لما تقوموا
شدّوا صِدركم
إتحركوا و اتكلموا
و كأنكم
أساطير تقوم الصبح ,
وتبدأ الأساطير
واحد ..أخيليس
واحد..
عنترة العبسي
لو حتى كان الحلم
متاهة فـ التفسير
أو آخر إمبارح
تنهيدة أو منسي
إصحو كإن الحلم , جنينة أندلسي
وانتو عيون الكحل ,
واسعة
و مذهلة
يمكن أبطل انام
تقوم الأسئلة
متعلقة في السقف
تضوي
و تنطفي
و أخاف أنام
واصحى
أتخضّ من نفسي..
سايق عليكوا النبي !



سايق عليكم نبي..
عربي
ماهوش شاعر
ولا قالـُه , ولا ذنبي
شعري يكون مَذهبي
فاطلع على جَـبَله
يطلع على قلبي
ورده الشيطاني
النافر
العصبي
يلمح لـُمَض عينكم
باهتة و مش دَهَبي
يتشدّ من جدره
يتشدّ على عَصَبي
حتى ولو قافل
شبّاكي و مخبي
عيني عن الدنيا
توجعني دنيتكم
دنيتكم البمبي !
دنيتكم الخنجر ..
ليه الجراب جنبي ؟!
لا أبيض الصفحة
لا مُنْـتـَظـر
ولا نبي
يا دون كيشوت النبيل..
يا دون كيشوت الغبي
يا دون كيشوت الفذ ّ , الراقي و الشعبي
سايق عليك النبي
سيفك ماهوش رَجَزي
بغلك ماهوش خـَبَبي
طب ليه بشوف دايما
في البعد
طواحينك
أنساها ...
تندهلي
تنفخ على لـَـهَبي
فامسك لجامي واروح ..!
يائس
على غضبي
عارف ,
على جهلي
الشعر سيف بتـــّــار
و الشعر
سيف خشبي !
سايق عليك النبي !





سايق عليكم نبي
عربي
للرومي و الفارسي
الحلم نهر العسل
و الكلمة
عيش شمسي..
حفرح و ادندن قوي
لو شفتكم أحرار
أبطال ملاحم يوناني
أو سِيـَر مَغاوير
واحد ..أخيليس
واحد
عنترة العبسي
و عنيكم الباهتة
بيطق منها شرار
نشوة إيدين السما
بتلامس الإنسي
يترجّ حلمه العجوز
يضوي
فؤاده الصبي
حفرح و ادندن قوي ..
سايق عليكوا النبي !



8 comments:

bani-adam said...

اجمل شئ في اللي بتكتبه,و ده رأي سمعته من واحد تاني,انه بيخلي الواحد لا اراديا يكمل قرايه لحد الاخر,سواء كان فايق او مش مركز.
تاني حاجة بقي,اني دبيت المشوار لحد معرض الكتاب,و في الاخر مقلتش شغل كايرو نزل, ايدك بقي علي تمن البنزين.
يلا كل سنه و انت طيب.

محمود عزت said...

بني آدم باشا
ياريس ربنا يكرمك
والله أنا منتظر ينزل زيك بالظبط !
حق البنزين عندي
و لايهمك :)
منور يا ريس

أحمد عبد الهادى said...

جميلة يا محمود و عجبتنى أوى _يترج حلمه العجوز يضوى فؤاده الصبىـ

قفلات المقاطع التلاتة كلها جميلة جدا

Nour said...

!!الله يا مولانا:).. قصدي يا قريني

m shalaby said...

malhash 7al gamda awi ya man

Dananeer said...

حلو يا محمود

Anonymous said...

جميل..
سايق عليك النبي دُمْ بخير!

Zeinobia said...

حلو اوى