18 January 2007

أجي أقول أقولك , فبسكت ما أقولش





1


كتير جدا بحس إني عايز أتكلم بشكل موجــِـع , كإني لو ما أتكلمتش فيه حاجة حتموت مش حعرف أقولها بعدين للأبد , عشان كده بحس إني متغاظ جدا من أي حد و من كل حد لما بتجيلي فكرة كتابة و أنا في الميكروباص مثلا أو في مكان مش حلاقي فيه حاجة أسجل بيها اللي عايز أقوله...ببقى عصبي و ممكن أتنرفز و مش عارف أركز في حاجة..


2

أنا لما بحب أقول , بحس إني ممكن أفضل أتكلم في عشرين موضوع مختلف بلا إنقطاع لمدة عشرين سنة قدام , بحس إني لسه مقلتش حاجة و إني عامل زي البير الفايض على حوافه , الموضوع ده مش بيدوم , بعدها ممكن أحس إني ثقب أسود ضخم مش عارف أقول أي حاجة أو مش عايز..


3

كتير من الكلام مش كتابة , لكن كل الكتابة كلام , عشان كده كان أحد أحلامي في هذا الكون , بالإضافة إلى كوخ خشبي في وسط خضرة شاسعة واقف في شباكه انا و سوسن , إني ألاقي صوان أذن واقع في الطريق
أمسكه و أفضل أحكي أحكي أحكي , و أشيله في جيبي و كل ما أحكي أطلعه , مش مهم يكون وراه أذن داخلية تحلل أنا بقول إيه أو تقعد كل شوية تبعت لي إشارات موجبة أو سالبة
الناس بتحكي عشان تحكي , غالبا مش عشان تسمع رأيك أو تفهمك الحكاية , ده بيبقى أخر شيء هما محتاجينله..
إحنا بنحكي عشان نحكي


4

سوسن مثلا إنسان بيحب يسمع كويس جدا , بتسمع بإتقان و تركيز و هدوء , مش بتتكلم كتير أو ساعات مش بتتكلم خالص و أنا منطلق بقول ميت ألف حاجة في نفس الوقت
بحس براحة مطلقة إني مش مضطر كل شوية أحافظ على صوتي في المقدمة لإنها مثلا حتقاطعني أو حتعلق في النص إنها برضه مرة حصل كذا و كذا
أنا بتكلم مع سوسن في نص ساعة عشر أضعاف الكلام اللي ممكن يتقال في يوم كامل , بحس إني إرتحت و قلت و راضي تماما و مش عايز أكتر من كده..
حتى لو كان نقاش , وقلت و قالت , برضه بحس إن الكلام كان سلس زي موجة بتمد و ترجع بكل سلاسة


5

سوسن هي الوحيدة اللي بعرف ألقي قدامها شعر ...دد





12 comments:

Nour said...

ولد يا قريني.. أنا خايفة عليكو من الحسد.. داري على "سوسنك" تقيد يابني!!..بعدين إيه رأيك في البيت اللي ف أغنية نانسي عجرم الجديدة؟ أظن متفصل على حلمك :)

Nour said...

آه. نسيت أقولك إنك في كل حاجة جديدة بتكتبها بتأكدلي موضوع القرين ده يا محمود بجد.. سلملي على سوسن
:)

مـحـمـد مـفـيـد said...

يخرب عقلك يا واد
ده انت طلعت نمس وقال بتقول عليا مقطع السمكه وديلها ده انت تيجي تديني درس
ايه يا واد الحاجات الحلوه دي
اول ما اشوف سوسن هقولها
ربنا يخليكوا لبعض ويجمع بينكم في الخير دائما واكيد هي انسانه تستحق كل اللي بيتقال عليها
واول ما تروح المكان الشاسع انت وسوسن هسلط عليك عبد الله
:))))

محمد الشلفي said...

محمود ،كأني أنا اللي كاتب

bani-adam said...

...,جميل جدا بشكل غير طبيعي
اعتبر بلوجك ده هو صوان الاذن اللي بتقول عليه و افضل احكي عليه,اكيد حيكون كل الحكي ده بنفس جمال التوبيك.
و لو لقيت الكوخ اللي بتقول عليه ابقي قوللي لقيته منين عشان عايز اشتري واحد.

Mohamed Mehrez said...

ربنا يخليكو لبعض ويتمم لك على خير
ويحفظكم من العين
تعالى يا واد يا محمود أما ابخرك
:D

Moia said...

الله :)
ربنا يخليكوا لبعض يا رب :)
اسمع كلام نور :))

ملكة said...

حاسة إني عايزة أقولك شكرا
وبصراحة
مش لازم أقولك سبب الشكر ده إيه
وبغض النظر إننا منعرفش بعض أساسا
ولا أنا أعرف سوسنة
بس المهم
شكراً
أو أقولك
شكرا ليكوا انتم الاتنين
ربنا يخليكم لبعض:)

m shalaby said...

begad e7sas 3ali awi we rabena yewafa2ak wa a7eb a2oul leek enta we sawsan moqadaman ( barak allaho lakoma wa barak 3alikoma wa gama3a bainakoma fi 7'air.)

إبـراهيم ... معـايــا said...

زي ما انتا ملااااحــظ إنتا كتبتنا كلنا ، بتوحشني يا واد يا محمود ....



أنا كنت بتغلب على الأفكار دي بطريقتين ، الأولى إني كنت بكتب وأنا ف الميكروباص فعلاً ، والثانية فكرة التسجيل ، بس يبدو إن الفكرة الأولى أفضـل !

ابقى عدي بقى . . . ، وسلااامي لسوسن :)


حلو اسم سوسن ده والله



تسلم يا سيدي

محمود عزت said...

ٌقريني :
يا سلام , ده البيت و الأغنية و نانسي كمان متفصلين على الحلم !
ولا بلاش..لا سوسن تزعل ! :))


شلفي باشا:
كإنك اللي كتبت والله


بني آدم باشا:
حتبقى جيران يا ريس متقلقش حقولك أكيد :))
.

محرز باشا:
بخر بخر يا عم الحاج
ربنا يكرمك يا باشا


مويا:
حاضر يا فندم :)


ملكة :
أنا اللي بشكرك بجد
إنتي متعرفيش ليه
بس انا فعلا بشكرك :))



m shalaby
شكرا يا فندم , ربنا يكرمك


إبراهيم معاه

واحشني ياض !!
تسلم إنت
خليك أون تاتش

ام عبدالله said...

ازيك يامحمود سوسن فعلن تستحق الكلام الجميل ده ربنا يخليكم لبعض بس انا معرفش انك رومانسى اوى كدة