21 March 2006

,....الست اللي في المطبخ




الست اللي في المطبخ ,
بتظبّط الميزان
بين كل ما أنا بشتهي
و الكون
و تحضر الدنيا لعيني
عشان أقوم
ألاقي جنب سريري , فـ الصبح
اللبن ,
بوسة قطيفة ,
و دعوة أكون
مبسوط ,
و فرحان ,
يعملولي ,
فـ الميدان تمثال!
هيّ اللي فـ الأمثال..
تقول :
"كون , منه كون يُخرج ,
و شمس و ِضلّ ,
ليه بيكون ,
يدور حواليه "
أمي ,
يا آخر شجرة في التاريخ
تطرح ولد ,
يفضل متبّت عـ الغصون..
فتميل عليه
كان نفسي أقول فيكي ,
اللي ما قالوا بشر
لكن دا بس , اللي العيال السودا زيي ,
للأسف ,
تقدر عليه


07 March 2006

شاطِر حسن




شاطِر حسن..
من أول الحدّوتة قال :
الحلم سلطاني !
و شال ,
إسمه و روّح ,
من حواديت العيال .
بنت السلاطين الجميلة ,
لو يجيب ليها الفيونكة
اللي خطفها الغول ,
فـ غابة ,
بعد ضلمة ,
و بعد آلاف الجبال
راح يشكروه ,
يدّوله حاجة
بس ست الحسن كانت
إشترت
مليون فيونكة
و نسيت اللي راح و حارب
ألف وحش وْ غول
وعانى ,
ودمه سال
واللي كل اللي حكاه ليها
و قالتله بعدها :
شاطِر , حسن.
أيوه صحيح...
شاطِر حسن ,
علشان نسي الرحلة و قال :
الحلم سلطاني !
و شال ,
إسمه و سافر ....
من حواديت العيال



02 March 2006

حبيب قلبي , تعب قلبي , شغل قلبي


كل العيال كان نفسها , تبقى علاء الدين
وانا نفسي كنت ,
أبقى اللي فـ القُـمقُم , عشانْ
أطلعلكُم!
ولاحد فيكوا يبات حزين ,
ولا حزن , يوجع قلبكم
بس اللي فـ القمقم ,
حيرجع
قمقُمه ,
حيلاقي مين....؟