29 September 2006

حاضر




بقوم الصبح متكركب
و متضايق ,
و متلخبط
فـ صِدري ,
فوج حمام قايم
من الخضة ,
بيتخبّط
و عيني , شّباكين عسلي
عليها ستاير المهموم
ما كان بده ينام و يقوم
يلاقي
الدنيا مش إبريل !
جميل
العمر لو أصبح
ألاقيني , فـ كوخ عـ النيل
و عـ الشباك
ألاقيكي



و تبتسمي
"صباح الخير"
تفتح وردتي فيّا
و ادوق فـ شفايفي , طعم التوت
" و ليه عـ الدرس متأخر ؟! "
و " روح الدرس يا محمود ! "
و زي الطفل اقول :
" حاضر"
واقول "طيب" , واروح حاضر
وانا أعند عباد الله
رئيس مجلس إدارة " ليه ؟"
و شيخ حضرة طريقة " لا ! "
و يتقاللي , " برافو عليك" !
و "شاطر " !
فـ ابتسم ليكي !
تعاتبيني على التأخير
متعجبكيش تلاكيكي
أنا أصلي ,
طبيب فطري
حعالج , كل خلق الله
ولا تلزم دروس عملي
ولا نظري , و شُروح و سواه
أخفف بالكلام همّي
يدواي
السامعين , معناه
و أشاور عـالطريق , وأنده
و اقول
الناوي , يتبعني
يا يشفينا الكلام جُمْـلة
يا عِبرة
للي يسمعني !

و حاضر
حاجي فـ المواعيد
و ححضر فـ الدروس قبلك
ولاشفتش أنا عمري
ولا قابلت من قبلك
بنات..
بتسيب مطارحها ,
مكان ما تقوم
ورود وردي
و لا تلمس شجر مايل
يفوق..
يخضّر و يندّي
و تضحكلي
أقول حاضر !



بقوم الصبح
متكركب
و خايف أفتح الشباك
تكون الدنيا مش فاتحة
لشباكي
شبابيكها
و لسه الناس على حبالهم
غسيل كاره مشابكها
و نفسه يطير
و يتحوّل ,
نوارس , عالمحيط حتروح
و لسه الحلم , أغنية
فـ صوت البنايين , مبحوح
يا روح ياللي ما بعدك روح
يا عيشك ماسك الدفة
يا ينقذني
طلوع الروح
ولا أصحى
و اقول حاضر



24 comments:

Dmo3 Al Kohl said...
This comment has been removed by a blog administrator.
Dananeer said...

شعرك حساس و رقيق اوى يا محمود

Anonymous said...

كلام مكرر.. ليس كلامك و لكن تعليقي علي كلامك !
حاولت أن أبحث عن كلمات أخري تفي روعة شعرك و لكني عجزت فسامحني. لا أملك سوي التصفيق بشدة و أن أقول لك "رائع" و دمت مبدعاً تلمس بكلماتك أعمق نقطة بقلب قارئها!

محمد سيد حسن said...

إنت اللي بدعتها فاستحمل بأى

نص بلاسيبو يا محمود


أنا

bluestone said...

بقوم الصبح متكركب
و متضايق ,
و متلخبط
فـ صِدري ,
فوج حمام قايم
من الخضة ,
بيتخبّط
--
العمر لو أصبح
ألاقيني , فـ كوخ عـ النيل
و عـ الشباك
ألاقيكي
و تبتسمي
"صباح الخير"
تفتح وردتي فيّا
و ادوق فـ شفايفي , طعم التوت
" و ليه عـ الدرس متأخر ؟! "
و " روح الدرس يا محمود ! "
و زي الطفل اقول :
" حاضر"
واقول "طيب" , واروح حاضر
وانا أعند عباد الله
رئيس مجلس إدارة " ليه ؟"
و شيخ حضرة طريقة " لا ! "
و يتقاللي , " برافو عليك" !
و "شاطر " !
---
الله ينور عليك .. وربنا يكرمك بجد على الكلام الجميل ده
مفيش حاجة في الدنيا اجمل من ان الواحد يقرا على الصبح كلام بالرقة والجمال ده ....

متشكرين
متشكرين بجد

عمرو عزت said...

جميلة

Abd El Rahman Gado said...

جامدة جدا .. استاذ

dreaming bird said...

بقوم الصبح
متكركب
و خايف أفتح الشباك
تكون الدنيا مش فاتحة
لشباكي
شبابيكها
و لسه الناس على حبالهم
غسيل كاره مشابكها
و نفسه يطير
و يتحوّل ,
نوارس , عالمحيط حتروح
و لسه الحلم , أغنية
فـ صوت البنايين , مبحوح
يا روح ياللي ما بعدك روح
يا عيشك ماسك الدفة
يا ينقذني
طلوع الروح
ولا أصحى
و اقول حاضر





تحفه يا محمود بجد
انت فنان
و لو ما نزلكش ديوان انا ممكن يجرالى حاجة
موهبتك طاقة كبيرة ما تحرمناش منها

مـحـمـد مـفـيـد said...

بقوم الصبح
متكركب
و خايف أفتح الشباك
تكون الدنيا مش فاتحة
لشباكي
شبابيكها

قمه الاحساس والتعبير الرائع
جلمده جدا يا حوده

Jojoo said...

نوووووووووور يا نوووور يا نوووووور انت صبابا ...ربنا يكون معاك

mzzzza said...

ربنا يعينك علي الى فـي قلبك يا محمود بجد
ربنا يعينك :)

green eyes said...

بقوم اصبح متكركب و متضايق ومتلخبط فصدرى فوج حمام قايم من الخضه بيتخبط.... تعبير رائع عجبنى أوى
كله جميل يا محمود

Dmo3 Al Kohl said...
This comment has been removed by a blog administrator.
محمود عزت said...

الأخ وليد

أولا أهلا بيك
ثانيا أكيد أنا مش عامل المدونة مساحة إعلانية
أنا مش حاطط لنك لمدونة أخويا, ده مش معناه إنها مش عاجباني!
وإنت مدونتك جميلة و كل شئ
إعتبرها مسألة شخصية معلش



دنانير

أشكرك :)



محمد سيد حسن

نورتنا يا ريس , إحنا إتفقنا , بلاسيبو جلاكسو !


blue stone
أشكرك أنا :)
نورتينا يا فندم



عمرو باشا :
شكرا


عبد الرحمن جادو :
أشكرك
:)


دريمنج برد :
ربنا يكرمك يا ياسمين :)
قولي يارب



محمد مفيد :
أشكرك يا أبو عبده :)


جوجو :
صبابا ! , ماشي , و لايهمك ! :)


mzzza :
الله يعين الجميع ,
أشكرك :)



عيون خضرا :
كله جميل ؟ :))
طيب يا فندم , اشكرك

Guevara said...

التعليق اللي لقيته ينفع إني أجيب القصيدة كوبي بيست زي ما هي و أحط في آخرها تلت علامات تعجب .. اعتبرني عملت كدة .. و متشكر جداً

Pianist said...

من زمان ماسمعتش شعر عامية بالحلاوة دي

كلامك جه في الجون

عمرو said...

إيه الحلاوة دي يا عم محمود :)

واحشنا شعرك من زمان.. بس واضح إنه كل تأخيرة وفيها خيرة :) ربنا يفتح عليك يا محمود وتسعدنا كمان وكمان

Dmo3 Al Kohl said...

المعنى وصلنى
وكلامك صدقته

haisam (jarelkamar) said...

الله
!!!!

Engy said...

جميلة قوىقوى قوى

Hope said...

As usual beautiful, creative, touching, etc etc
My favourite part...
بقوم الصبح
متكركب
و خايف أفتح الشباك
تكون الدنيا مش فاتحة
لشباكي
شبابيكها

7elwa awi!

Omar said...

محمود/ معاييش ايميلك.. عايز الحن القصيدة العظيمة دي لو معندكش مانع - اوعى يكون عندك :-)- وطبعاً هاحتاج اظبط شوية حاجات لأسباب موسيقية، فياريت تبعتلي ايميلك عشان ابعتلك شكلها قبل ما تتلحن وتقول لي ملاحظاتك، وبعدين ننسق عشان اسمعهالك
ابعتلي يا ريت: tagreba@hotmail.com

شوق الياسمين said...

أنا بس حبيت أقولك انها
مش عارفه أقولك ايه
سحرتنى

Anonymous said...

chaque fois je lis ces mots et je me disais ssi c etait à moi qu elles sont dites
merci