14 December 2005

يــَـا شــِـيخْ أيــْـمَنْ

.



يــِبْكي القَمَر مَجرُوحْ
والنَاسْ بِعيدْ,
بــِتْرُوحْ
أسْمَعْ أنِينْ النـّـايْ
أبْكي,,
حَلاوةْ رُوحْ !


********


شِيخِي ,يقُولْ إقْرَا
أقولْ آيةْ
و سِحِرْ الكِلْمَة جُــوّايا
بيبْهرْنـِي,,

"ياشِيخْ...لِيهْ رَبِنا بـِيْقُولْ
عَلَى الإنْسَانْ,,
ظــَـلُومْ و جَهُولْ "


ويِضْحَكْ شِيخِي :
"يا مَحْمُودْ
عُيونَكْ,,
لسّه عِينْ مَوْلــُـودْ
تـُـبصّ تـُـشوفْ بَيَاضْ إيـدْهَا
ولا شَافتْ إيدينا السُودْ "
و مَا أفْهَمْ !
يــِقُولْ : رددّ
أرددّ سُورةْ الإنسانْ
أرددّ سُورةْ الرحمـنْ
وشِيخِي,,
واسمهْ "أيَمَنْ ",,
كانْ
فـِ عِينْ مَحْمُودْ
(عَلي)
و (عُثْمانْ) !

يِقُولْ : رَأيَكْ ؟
أقولْ : مَااعرفْ
يقولْ : حَاولْ,,تـُـشوفْ النـُورْ
و إوْعَي تقُول أنا مَاعرفْ
وقولْ حاعرفْ
و عدّي
وثـــُـورْ


فشوف ْوافهم ,,


فـ لــِـيلةْ العِيدْ
خَدوا شِيخِي,,
ورا الضَلْمَةْ, هِناك لِبعيدْ
و جِينا الصُبْح عَـ الجَامِعْ
تزغْزغْنا هُدُوم العِيدْ
جِرينا , تُجرّنـَـا اللعبة ْ
على شِيخنا
نبـُـوسْ الإيدْ
قالولــنا الشيخْ
خَدُوهْ بالليلْ , لِزنْزَانةْ
و مش راجعْ,,,

وقفنا يتامى في الشارع

"يا شيخ أيمن
خدوك بالليل؟!"

عِيالْ
جُوّاها ألفْ سُؤالْ
تُشوفْ عِيدْها
سَوادْ,,
و حَدِيدْ


يا شِيخْ أيْمَنْ
أنا مَحْمُودْ,,
خلاصْ
مابقتشْ أنا المَوْلـُـودْ
وإيدي,
ما بَقِتْ بِيــضا,,
نِسيتْ الآيةْ
و الغايةْ
و طَعمْ الركعةْ
والمِيضَا,,
و قـَـلْبي خلاص
سوادْ مَسدُودْ
يا شِيخْ أيمنْ
أنا مَحْمُودْ!


9 comments:

radwa osama said...

وانا رضوى
القصيدة رغم انى قريتها قبل كده لكنى استمتعت جدا وحبيت الشيخ ايمن رغم انى بكره الشيوخ وبخاف منهم

Nour said...

اللـــــــــــــــــــــــــــــــه

يخرب بيت الجمال

:)

محمود عزت said...

أمال إيه أخبار الشيخ عمرو عزت
:)

أشكرك يا رضوى :)

محمود عزت said...

إزيك يا قريني!
عجبك اللي كتبه القرين نور؟

أشكرك :)

mzzzza said...

اشهد ان لا اله الا الله
يا شيخ ايمن انا محمود

اشهد ان لا اله الا الله
بحد اخدت روحي معاك
جميل يا محمود

محمود عزت said...

أشكرك يا mzzz :)

ghada said...

اعتقد ان اجمل ذكرى للانسان ذكرى الشيخ الذى علمنا القراءن
ونحن صغار
فنحن نولد على يدية ولكن فى اطهر مكان فحبة تماما مثل حب الام
منزة عن اى غرض غير اننا مشتركان فى التجمع فى بيت وعلى كلام اللة منذ نعومة اظفارنا
هذة عن تجربة حقيقية
صدقا

ghada said...

سلامى للشيخ محمد عبد الحميد
واستاذتى الينية زينب
رحمهما اللة ان كانا احياء ام اموات

Anonymous said...

Wonderful and informative web site. I used information from that site its great. film editing schools