16 December 2005

..مَــفْضِلشْ حـَــدْ


مَفْضِلشْ حَدْ ,
يِسْألْ رَصِيفْ الشَارع الفاضِي ,,
عَلَى اللي مرّ مِنْ جُمَعَةْ ,,
و قَعَدْ
خَــلّصْ بُكا مَنَعُهْ الزِحَامْ
نَشّفْ دُمُوعُهْ ,,
وقــَـامْ
عَلَى الحِيطَةْ إتْسَنَدْ


مَفْضِلشْ شِبـّاك ,
غِيرْ شَبَابِيكْ البُيوتْ المَيّتة ْ
مَقفولةْ الرّيــحَـةْ
مَجْرُوحةْ الشُــرّاعْ
تِلْمِسْهَا ,,
يِوجعْهَا الصُباعْ
شِبّاكِي , كانْ فُوق فـ الهَـوا
واقِفْ لِوحْدُه
لمّا كُل حِيطان جِيرانـّـا
فـ الشِتِا
خَدْهَا الهَـدَدْ

مَفْضِلشْ حَدْ
إلا الوَلَـدْ
حيَحُطْ فُـوقْ الحَرْفْ , نُقْطَةْ
يِنْفِجِرْ
يِطلَعْ نَهَارْ
يِطلَعْ عَلَى عَوَامِيدْ حُرُوفُهْ
يــِعلّقْ الزِيــنَةْ و يُبُوسهَــا
لمّا مٍنْ شِباكْهـا بـصـّـتْ
عَالجَنَايِنْ و الدَوَايرْ
و النَافُورَةْ
و الدِيارْ
اللي مِلّونْها الوَلَــدْ
بالــلِيلْ
ولا بِيهْ حَسّ حَدْ

مَفْضِلشْ حَدْ

9 comments:

سامية said...

يا خبر ابيض! ده حاجة جميلة بجد! القصيدة من المقطع الأول خطفتني

أشكرك على متعة القراءة..حقيقي يا محمود حاجة تفتح النفس.. إستمر وما تتأخرش علينا كتير

Omar said...

ولد :)

hesterua said...

نفسى اكتب الكلام ده

محمود عزت said...

سامية :

الجميل وجودك! :)
أشكرك
متتأخروش علينا إنتوا بس!


عمر:

باشا!



أحمد :

بتكتب أحسن منه :)

عمرو said...

مَقفولةْ الرّيــحَـةْ
مَجْرُوحةْ الشُــرّاعْ
تِلْمِسْهَا ,,
يِوجعْهَا الصُباعْ

الله

tamer said...

تسلم محمود على القصيدة الحلوة


وفقنا الله لما فية الخير


مع خالص تحياتى

محمود عزت said...

عمرو:

وجودك يسعدني :)


تامر:

أشكرك
تسلم يا باشا

ماشى الطريق said...

إيه الحلاوة دى

محمود عزت said...

ماشي الحال:

شكرا يا باشا!