02 December 2005

يا قصرعيني




كلّيةْ مِنْ غِير بَوّابَات ,
يا قَصْر عِيني ,
جَرْح مَفْتُوح عَـالشَوَارِع
والنَزِيف رَاجِع إِلـِـيه ,
وأمُرّ فِـيـْك..
ألاقيك عَلَى بَـابْ العَــنَابرْ
جَنْب شِبّاك بالسِيجَارة
والأشّعَةْ
والدُوسِيه,,
و فـ إِيدَكْ الكِيس البِلاستيِك
فيه رِغِيفْ وعِيالْ و بـِيضةْ و الجـِـنِيه
وتـكُحّ..
ينـْـزِف قَـلْبي لِيهْ ؟!
يا جَرْح مِن غِير بَـوّابـاتْ ,
مُلْيُونْ نَبي,فِيكْ..بِيـْـعَانِيكْ
مَبْعُوت,,
ومعصُوبَة عِينيـِه
بـِـيمرّ بيِن أكْوَام بَـشَر ,
بِتئِنّ ,مَا يِعرفشِ ليه ,
يلْعنْ أَبو ُأم المَنَاهِج
والمُحَاضَرات
والبَنَات
والفِيلم فِي السِينِمَا
وأسْعَار البُوفِيهْ..
بـٍتكُحّ..
ينزف قَـلْبي لِيه ؟

9 comments:

radwa osama said...

اكتر من رائع يا محمود ..القصيدة ده حلوه قوى وتوصل للقلب بسرعة..بجد برافو

عمرو عزت said...

بتكتب
ينزف قلبي ليه ؟

جميل

Omar said...

أنا برضه باقول.. الحلو م الحلوين

سامية said...

إيه ده.. ده انت اكتشاف! وعارف إيه أكتر حاجة لفتت نظري؟ إن العامية بتاعتك جميلة جدا

محمود عزت said...

رضوى:

أشكرك يا رضوى
كده إنت خلاص
مش حقبل إنك مرة متكتبيش تعليق
:)


عمّور :

إنت اللي جميل
مش عارف!


عمر :

أشكرك :)
الحلو إنك موجود يا أبو عمر


سامية :

أشكرك!
مبسوط فعلا إنك هنا :)
أشكرك مرة تانية

mzzzza said...

كنت في القصر العيني و عارفه انت بتتكلم عن ايه
أكْوَام بَـشَر
بـٍتكُحّ..
ينزف قَـلْبي لِيه ؟

شكرا لانك اخرجت ما حاولت كثيرا ان اقوله

محمود عزت said...

أشكرك انا بجد!!

:))

ghada said...

فعلا يامحمود كلية منغير بوابات
من حقها تنزف يازميل

Anonymous said...

That's a great story. Waiting for more. Tennis player salary Hatboro and taxes and outrageous fantom vacuum cleaner pressure washer pumps radial axial Nexium hair care products king radiant panel heating systems Krups duties coffee makers tire websites Best portable mp3 player Hummers on 26 comsumer ratings for vacuum cleaners